27
აპრილიდღის ზოგადი ასტროლოგიური პროგნოზი
46 წლის მამაკაცი, რომელმაც თანასოფლელი 10 წლის ბიჭი გააუპატიურა დაახლოებით ერთ წელიწადში თავისუფალი იქნება. უფრო მალე გათავისუფლდება 65 წლის მამაკაცი, რომელმაც 4 წლის გოგონასთან გარყვნილი ქმედება ჩაიდინა. ბრალდებული, დაზარალებული გოგონას მეზობლად საცხოვრებლად, რამდენიმე თვეში დაბრუნდება.
საზოგადოების მღელვარება ამჯერად პედოფილებთან დაკავშირებით პროკურატურის გადაწვეტილებამ გამოიწვია. ბავშვების გაუპატიურებისთვის და მათთან გარყვნილი ქმედებისთვის დაკავებულებთან საპროცესო შეთანხმებების გაფორმებით განსაკუთრებით აღშფოთებულები, დაზარალებულ მცირეწლოვანთა ოჯახის წევრები არიან.
10 წლის ბიჭის გაუპატიურებაში ბრალდებულ 46 წლის მამაკაცს, ბრალის შემსუბუქების შედეგად, სასამართლომ თავისუფლების მხოლოდ წელიწადნახევრით აღკვეთა მიუსაჯა.
რაც შეეხება 4 წლის გოგონას მიმართ გარყვნილი ქმედების ბრალდებით დაკავებულ 65 წლის მამაკაცს, მის მიმართ წაყენებული ბრალდება თავისუფლების 2 წლამდე აღკვეთას ითვალისწინებდა, თუმცა მას შემდეგ რაც მან დანაშაული აღიარა, პროკურატურამ მასთან საპროცესო შეთანხმება გააფორმა და მამაკაცს მხოლოდ 6 თვიანი პატიმრობა მიესაჯა.
ორივე ფაქტი "ამბები-გე"-ს ორივე საქმის ბრალდების მხარის პროკურორმა, თინათინ ზუბაშვილმა დაუდასტურა. თინათინ ზუბაშვილი ბრალდებულთან საპროცესო შეთანხმების გაფორმებას იმ გარემოებით ხსნის, რომ ჩატარებული გამოძიების შედეგად ძალადობის ფაქტი არ დადასტურდა და შესაბამისად ბრალდებულს მუხლი შეეცვალა.
"თავდაპირველად დაკავებულს სხვა ბრალდება ჰქონდა წაყენებული, თუმცა შემდეგ სხვა ბრალდება წარედგინა - სქესობრივი კავშირი მცირეწლოვანთან, რომელიც თავისუფლების 3 წლით აღკვეთას ითვალისწინებს. შემდეგ უკვე მას საპროცესო შეთანხმების საფუძველზე სასამართლომ სასჯელი წელიწადნახევრით განუსაზღვრა", - აღნიშნა პროკურორმა.
თინათინ ზუბაშვილი მიიჩნევს, რომ აღნიშნულ ორივე შემთხვევაში ბრადებულებისთვის გამოტანილი სასჯელი ზომიერია.
"რამდენად გამართლებულია ჩემი გადაწყვეტილება ეს თქვენ უნდა შეაფასოთ. მე მიმაჩნია, რომ ორივე შემთხვევაში სასჯელი ზომიერია. 6 თვე მაგ ასაკის - 65 წლის მამაკაცისთვის, ზომიერი სასჯელია", - მიაჩნია პროკურორს.
არ არის გამორიცხული, პროკურატურამ ასევე საპროცესო შეთანხმება გააფორმოს 9 წლის მოზარდის მიმართ 2012 წლის ზაფხულში ჩადენილი გარყვნილი ქმედების გამო დაკავებულ 57 წლის მამაკაცთანაც.
ამ საქმის პროკურორი ნათია მუხიაშვილია, რომელიც აცხადებს, რომ ამჟამად საქმის არსებითი განხილვა მიმდინარეობს და ჯერ უცნობია ბრალდებულთან საპროცესო შეთანხმება გაფორმდება თუ არა.
მისივე თქმით, საქმე სექტემბრისთვის არის გადადებული, ამასთან, ბრალდებული დანაშაულს აღიარებს. შესაბამისად, მსგავს დანაშაულზე საპროცესო შეთანხმების გაფორმება შესაძლებელია.
"ბრალის აღიარება საპროცესო შეთანხმების გაფორმების ერთ-ერთი საფუძველია. ნებისმიერ დანაშაულზე ამის საფუძველი არსებობს თუ ბრალდებული ბრალს აღიარებს. ეს არ არის გაუპატიურება, ან გაუპატიურების მცდელობა, ეს არის გარყვნილი ქმედება, სხვა მუხლი და სხვა სასჯელია", - აღნიშნავს პროკურორი.
არის თუ არა პედოფილებისთვის მისჯილი სასჯელი ადეკვატური. საზოგადოების ნაწილი პროკურატურას კიდევ უფრო მკაცრად აკრიტიკებს და მიიჩნევს, რომ მსგავსი გადაწყვეტილებები პედოფილებს მხოლოდ წაახალისებს და ქვეყანა რთულ ვითარებაში აღმოჩნდება.
ფსიქოლოგები კი ყურადღებას არა სასჯელზე, არამედ პედოფილიის გამომწვევ მიზეზებზე ამახვილებენ. მათი თქმით, როდესაც საზოგადოება ე.წ. საზიარო ნორმებს კარგავს, ის ბოლოს ისეთ მძიმე შედეგებამდე მიდის, როგორიც მეორე ადამიანის თავისუფლებების შეზღუდვაა.
როგორც ფსიქოლოგი ნანა ჩიჩუა ამბობს, ამ საზოგადოებივ ნორმებს ანომიას უწოდებენ და როდესაც საზოგადოებაში ანომიის პრობლემა ჩნდება, საზოგადოების თითოეული წევრი ურთიერთაგრესიას გამოხატავს.
ამ კონკრეტულ შემთხვევაში კი ჩიჩუას მიაჩნია, რომ ნებისმიერი სასჯელი მოკლევადიანი პრევენციაა და ყურადღება ძირითადად საზიარო ნორმების გაფრთხილებისკენ უნდა იყოს მიმართული.
"სექსუალურ ძალადობაზე ნებისმიერი სასჯელი არის დროებითი, მოკლევადიანი პრევენცია", - დასძინა მან.
