ფოთის პორტის 200-ზე მეტი მუშა-მოსამსახურე გაფიცულია
ფოთის პორტის მე-14 ნავმისადგომის 4 სარეზერვო ბრიგადის 200-ზე მეტი მუშა-მოსამსახურე ამ დრომდე გაფიცულია. როგორც "ინტერპრესნიუსის" კორესპონდენტი იუწყება, მათი განცხადებით, სამუშაო ადგილებზე დაბრუნებას არ აპირებენ, ვიდრე კონტაქტზე არ გამოვლენ ის ადამიანები, რომლებიც გადაწყვეტილებებს იღებენ.
გაფიცულთა მოთხოვნებია სამუშაო პირობების გაუმჯობესება, სამუშაოს შესაბამისი ანაზღაურება და ხელშეკრულებების გაფორმება.
"ნავმისადგომის მუშაობა შეჩერებულია. ორი დღეა, უკვე არავინ არ გამოგვეხმაურა ხელმძღვანელობიდან. აქციას გავაგრძელებთ, ვიდრე არ დაგველაპარაკებიან", - განაცხადა "ინტერპრესნიუსთან" საუბარში ერთ-ერთმა გაფიცულმა ავთანდილ თუნთიამ.
გაფიცულებს გუშინ ღამით შეუერთდნენ სხვა ნავმისადგომების მეამწეებიც, მთლიანობაში 45 ადამიანი, რამაც პორტის მუშაობის შეფერხება გამოიწვია. გაფიცულთა ინფორმაციით, აღნიშნულის გამო რამდენიმე მათგანი სამსახურიდან უკვე დაითხოვეს.
"სათითაოდ დაგვირეკეს და გვითხრეს, რომ გაგვათავისუფლეს. იმასაც ამბობენ, რომ სიტუაციის დალაგების შემთხვევაშიც კი, ამ 45 ადამიანიდან 4 ადამიანს, ვინც ჩვენს უფლებებზე ხმა ამოვიღეთ, არ დაგვაბრუნებენ სამსახურებში",-აცხადებს ერთ-ერთი თანამშრომელი პაატა მირცხულავა.
ამასთან, ორი დღის წინ "ინტერპრესნიუსთან" საუბარში ფოთის პორტის გენერალურმა დირექტორმა ჯოზეფ ქროულმა განაცხადა, რომ გაფიცულები არ არიან პორტის ძირითადი თანამშრომლები და თავიანთ საქმიანობას პორტის საჭიროების მიხედვით ახორციელებენ. მისივე განცხადებით, ისინი, როგორც დაქირავებული მუშახელი, ქართულ ბაზარზე არსებული ანაზღაურების მაქსიმუმს იღებენ. ქროულიმ, საკითხის შესწავლასა და სამუშაო პირობების გაუმჯობესებაზეც ისაუბრა.
გაფიცულებს ფოთის მაჟორიტარი დეპუტატობის კანდიდატი ეკა ბესელია დღეს შეხვდება.
ბაია პატარაიას თათია სამსახარაძე და უფლებადამცველები დაუპირისპირდნენ - „სამი წელია პირში წყალი მაქვს დაგუბებული...“
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
