27
აპრილიდღის ზოგადი ასტროლოგიური პროგნოზი
ალბათ გსმენიათ, უძაღლო ქვეყანაში კატებს აყეფებდნენო. ჰოდა, კატებმა და ძაღლებმა ყეფა რომ არ დაიწყონ, მერიასთან აქცია-ბრიფინგი არ "გამართონ" და თავშესაფრის მოთხოვნით ჩინოვნიკებს კარი არ "აუტალახონ", თბილისის საკრებულომ "თბილისში, ძაღლებისა და კატების მოვლა-პატრონობისა და მათი პოპულაციის მართვის წესი" დაამტკიცა. მეტიც, უპატრონო ძაღლებსა და კატებს 300-ადგილიანი თავშესაფარიც კი აუშენა.
წესის თანახმად, ცხოველები 4 კატეგორიად დაყვეს: პატრონიანი, უმეთვალყურეო, მიკედლებული და უპატრონო. უმეთვალყურეო ცხოველს, პატრონიანის, ან უპატრონოს სტატუსს, თავშესაფარში გადაყვანიდან 10 დღის ვადაში დაუდგენენ. ცხოველის პატრონი ვალდებულია, უზრუნველყოს მისი ისე შენახვა და მოვლა-პატრონობა, რომელიც კონკრეტული ჯიშის ცხოველის ბიოლოგიურ და ეტოლოგიურ თავისებურებებს შეესაბამება. კერძოდ, ცხოველის სათანადო კვება და დაწყურვება; ფიზიკური აქტივობა; საძილე ადგილის განთავსება, გათბობა და განათება; მდედრი ცხოველის შეჯვარების შემთხვევაში, მათი ნაშიერისა და ცხოველისათვის სათანადო პირობების შექმნა.
დაუშვებელია ცხოველის უპატრონოდ მიტოვება. თუ პატრონს აღარ სურს მისი მოვლა, ამ შემთხვევაში პატრონი ვალდებულია, ცხოველი თავშესაფარში ჩააბაროს. წესის თანახმად, ცხოველთა შორის ბრძოლის გამართვა აკრძალულია, იკრძალება კვების ობიექტებში, სასურსათო მაღაზიებსა და აფთიაქებში ცხოველთა შეყვანაც. ცხოველის გვამის დამარხვა დასაშვებია მხოლოდ სპეციალურ ადგილას, ბიოთერმულ ორმოში. პატრონი ვალდებულია, ცხოველის იდენტიფიცირება სამი მეთოდით მოახდინოს: მიკროჩიპირებით, ტატუირებითა და სპეციალური ყელსაბამით, რომელზეც მითითებული უნდა იყოს ცხოველის პატრონის გვარი, სახელი, მისამართი და საკონტაქტო ტელეფონის ნომერი. ძაღლების გასეირნება და საზოგადოებრივი ტრანსპორტით გადაყვანა (გარდა დეკორატიული ძაღლებისა), დასაშვებია მხოლოდ საბელითა და ალიკაპით. ცხოველის პატრონი ვალდებულია, არ დააბინძუროს საზოგადოებრივი სივრცე, დაბინძურების შემთხვევაში კი ადგილი უნდა დაასუფთაოს. წელიწადში ერთხელ, აუცილებელია ცხოველის ვეტერინარულ-სანიტარული შემოწმება. დაავადების შემთხვევაში, პატრონმა დაუყოვნებლივ უნდა შეატყობინოს ვეტ-კლინიკას. იმ შემთხვევაში, თუ ცხოველი მოკვდება, პატრონი სათანადო ზომების მისაღებად ვეტ-კლინიკას ან უფლებამოსილ ორგანოს უნდა დაუკავშირდეს. რაც შეეხება უპატრონო ცხოველებს, უფლებამოსილი ორგანო ვალდებულია ისინი დაიჭიროს, იზოლაციაში მოაქციოს და ვეტერინარული ზედამხედველობა განახორციელოს.
დაუშვებელია ცხოველის დაჭერა მათთვის ტკივილის, ტანჯვისა და სტრესის მიღების გზით. მეტიც, ცხოველების შეპყრობა ან მათი მოკვდინება, მხოლოდ ჰუმანური გზითაა დასაშვები, მათთვის ფიზიკური და მენტალური ზიანის მიუყენებლად. ახალი წესის მიხედვით, მოკვდინებას მხოლოდ ის ცხოველი ექვემდებარება, რომელსაც კომპეტენტური ვეტერინარის დასკვნის საფუძველზე, ადამიანისთვის საშიში, ერთ-ერთი უკურნებელი დაავადება მაინც დაუდგინდება. კერძოდ: ლისტერიოზი, ტოქსოპლაზმა, ტულარემია, ლუპტოსპიროზი, ტუბერკულოზი, ეხინაკოკოზი, ლეიშმანიოზი, პიროპლაზმა, დემოდეკოზი, ტეტანუსი, სტაფილოკოკი, სტრეპტოკოკი, მკეჭავი მუნი, ბრუცელოზი, ციმბირული წყლული, თურქული ან სალმონელოზი. ასეთ შემთხვევაში, ცხოველის მოკვდინება დასაშვებია მხოლოდ და მხოლოდ ვეტერინარის მიერ, თავშესაფარში. თავშესაფრის გარეთ კი ცხოველთა მოკვდინება შესაძლებელია მხოლოდ მათი ტანჯვის შესაწყვეტად, როდესაც ვეტერინარული დახმარების მიღება არაეფექტურია, ან ცხოველთა აგრესია ადამიანებს ან სხვა ცხოველებს აშკარა საფრთხეს უქმნის. ცხოველთა მოკვდინება დაუშვებელია დახრჩობით, გაგუდვით, მოწამვლით, ელექტრომუხტის გამოყენებით, მექანიკური დაზიანების მიყენებით, ასევე იძულებითი შიმშილით, წყურვილითა და სხვა არაჰუმანური მეთოდებით. თბილისის საკრებულოს დეპუტატმა, ლაშა იმედაშვილმა "ვერსიასთან" საუბრისას განმარტა: "ეს მნიშვნელოვანია ქალაქისთვის, ვინაიდან მოსახლეობა შეწუხებული იყო. თავშესაფარი 300 ძაღლზეა გათვლილი. მართალია, ცოტაა, მაგრამ ეს პირველი ნაბიჯია, რასაც სხვა, მსგავსი ტიპის თავშესაფრების მოწყობა მოჰყვება. დროა, ეს პრობლემა ერთხელ და სამუდამოდ მოგვარდეს და თბილისი ცივილიზებულ ქალაქს დაემსგავსოს".
ნინო ხარშილაძე
გაზეთი "ვერსია"
