გერმანიის არჩევნებში სავარაუდო ჩარევის გამო, ევროკავშირი ილონ მასკის "დასჯას" განიხილავს
გერმანიის მომავალ არჩევნებში სავარაუდო ჩარევის გამო, ბრიუსელი ილონ მასკის "დასჯას" განიხილავს.
-
მედიის ინფორმაციით, ევროკომისიაზე იზრდება ზეწოლა, გამოიყენოს სამართლებრივი უფლებამოსილება სოციალური მედიის პლატფორმებზე, რათა არჩევნების წინ მილიარდერი შეაკავოს.
ევროკავშირში არსებობს შიში, რომ მასკი უკიდურესი მემარჯვენეების გაძლიერებასა და კრემლის პროპაგანდის გავრცელებას ცდილობს.
შეშფოთების ერთ-ერთი მიზეზი ისაა, რომ მსოფლიოში უმდიდრესმა ადამიანმა შეცვალა თავისი სოციალური ქსელის, X-ის ალგორითმი, რათა მისი პოსტები მომხმარებლებს ე.წ. timeline-ის თავში გამოუჩნდეთ.
ბოლო კვირების განმავლობაში, მასკმა პარტია "ალტერნატივა გერმანიისთვის" (AfD) გერმანიის "უკანასკნელ იმედად" მოიხსენია, ასევე ალის ვაიდელი, კანცლერის პოსტზე უკიდურესი მემარჯვენე პარტიის კანდიდატი, 23 თებერვლის არჩევნების წინ, ინტერვიუზე მიიწვია.
- ევროკავშირის მაღალჩინოსანმა წყარომ Telegraph-ს განუცხადა, რომ "მნიშვნელოვანია შევისწავლოთ, თუ როგორ აჩენს ალგორითმი გარკვეულ კონტენტს".
ევროკომისიაში აცხადებენ, რომ X-ზე კონტენტის გამოქვეყნებისას მასკი პასუხისმგებელია ნებისმიერ სისტემურ რისკებზე, მათ შორის რისკებზე, რომლებიც შესაძლოა არჩევნებში ჩარევას უკავშირდებოდეს".
ცნობისთვის, გერმანიის კანცლერი ოლაფ შოლცი ილონ მასკმა "არაკომპეტენტურ სულელად" მოიხსენია, რასაც შოლცის განცხადებაც მოჰყვა. ამ უკანასკნელმა მილიარდერს "ტროლი" უწოდა. განცხადება გააკეთა კანცლერის წარმომადგენელმა, რომელმაც თქვა, რომ "მასკი ქვეყნის ამომრჩეველთა გადაწყვეტილებაზე გავლენის მოხდენას ვერ შეძლებს.
ევროპარლამენტი მაქსიმალურად შეეცდება, კომისიას ზომების მიღება აიძულოს, თუ ჩაითვლება, რომ მასკი გერმანიის არჩევნებზე გავლენის მოხდენას ცდილობს.