თბილისში ორი სხვადასხვა ლოკაციიდან მსვლელობა მიმდინარეობს - რა ვითარებაა ახლა ცენტრალურ გამზირებზე?
მეტროსადგურ "მარჯანიშვილის" მიმდებარე ტერიტორიიდან ოპოზიციური პარტიებისა და მოქალაქეების საპროტესტო მსვლელობამ მტკვრის მარცხენა სანაპიროზე გადაინაცვლა, საიდანაც პრეზიდენტის ადმინისტრაციასთან გეგმავენ მისვლას.
მსვლელობის გამო, მარცხენა სანაპიროზე მოძრაობა ნაწილობრივ შეზღუდულია.
- ასევე, აქციის მონაწილეები გზაში შემხვედრებს პროტესტში მონაწილეობის მიღებისკენ მოუწოდებენ.
აღნიშნულ მსვლელობაში მონაწილეობენ "ერთიანობა - ნაციონალური მოძრაობისა" და კოალიცია "ძლიერი საქართველოს" ლიდერები და წევრები.
როგორც აქციის მონაწილეები აცხადებენ, მსვლელობას მეტროსადგურ "უნივერსიტეტიდან" წამოსული აქციის მონაწილეები შეუერთდებიან, რომელშიც "კოალიცია ცვლილებისთვის" ლიდერებიც მონაწილეობენ.
მეტროსადგურ "უნივერსიტეტიდან” მსვლელობით წამოსულ აქტივისტებთან ერთად არის ელენე ხოშტარია, რომელმაც “ინტერპრესნიუსს” განუცხადა, თუ სად დასრულდება დღევანდელი მსვლელობა, ამის შესახებ წინასწარ შეგნებულად არ საუბრობენ.
“ჩვენ ვართ ყოველდღიური ქუჩის პროტესტის რეჟიმში, რომელსაც სხვადასხვა ფორმა აქვს. რუსთაველზეც იყო უზარმაზარი ორი მიტინგი. ასევე, დავდივართ სხვადასხვა ქუჩაში. დღეს არის ორი ლოკაცია, საიდანაც მოეწყობა მსვლელობა. მარშრუტს წინასწარ არ ვამბობთ, როგორც გადავწყვეტთ ისე ვივლით ქალაქში. დიახ, ჩვენ, საქართველოს მოქალაქეები ჩვენს ხელში ვიღებთ ძალაუფლებას , “კოალიცია ცვლილებისთვის” და პროდასავლური ოპოზიციური პარტიები ამ პასუხისმგებლობას ვიღებთ, რომ დიახ, ქუჩაში წყდება დღეს[…] იმიტომ, რომ კონსტიტუცია მოპარულია და ბოლომდე ვიბრძოლებთ. ფორმები იქნება სხვადასხვა, ამას ჩვენ, რა თქმა უნდა, “ქართულ ოცნებას” წინასწარ არ შევატყობინებთ. “ქართული ოცნება” ვერ შეძლებს ამ ქვეყნის მართვას”, - განაცხადა ელენე ხოშტარიამ.