"ვალენსიაში მცხოვრები გიორგი მამარდაშვილი და გიორგი ქოჩორაშვილი ოჯახებთან ერთად თავს კარგად გრძნობენ და უსაფრთხო სიტუაციაში იმყოფებიან" - GEO TEAM
ესპანეთში, წყალდიდობის შედეგად დაღუპულთა რაოდენობა 62-მდე გაიზარდა. ესპანეთის პრემიერ-მინისტრმა, პედრო სანჩესმა სატელევიზიო მიმართვა გაავრცელა, რომელშიც განაცხადა, რომ ქვეყნის მთავრობა ვალენსიის რეგიონში წყალდიდობის შედეგად დაზარალებულების დასახმარებლად ყველაფერს გააკეთებს.
- სამხრეთ-აღმოსავლეთ ესპანეთში, მოსულმა უხვმა ნალექმა, რომელსაც რიგ ადგილებში სეტყვა მოჰყვა, წყალდიდობა გამოიწვია. სტიქიამ გაანადგურა ინფრასტრუქტურა. დანგრეულია სახლები, დაზიანებულია ასობით ავტომობილი.
ვალენსიაში იმყოფებიან ქართველი ფეხბურთელები გიორგი ქოჩორაშვილი და გიორგი მამარდაშვილი. ცნობილია, რომ ისინი ესპანური საფეხბურთო კლუბის შემადგენლობაში იმყოფებიან და ამის გამო ძირითად დროს სწორედ ამ ქვეყანაში ატარებენ.
GEO TEAM-მა ცოტა ხნის წინ გაავრცელა ინფორმაცია, რომ ორივე ქართველი ფეხბურთელი უსაფრთხოდ არიან.
"გუშინ ღამით ვალენსიაში წყალდიდობა და შტორმი მოხდა, რამაც სამწუხაროდ, ათეულობით ადამიანის სიცოცხლე იმსხვერპლა და ასეულობით დაშავებულია.
ვალენსიაში მცხოვრები საქართველოს ნაკრების ორივე ფეხბურთელი, გიორგი მამარდაშვილი და გიორგი ქოჩორაშვილი ოჯახებთან ერთად თავს კარგად გრძნობენ და უსაფრთხო სიტუაციაში იმყოფებიან.
Geo Team მხარდაჭერას უცხადებს ჩვენი ბიჭების კლუბებს, მათ ქალაქსა და მაცხოვრებლებს. თანაგრძნობას ვუცხადებთ დაღუპულთა ოჯახებს" - ნათქვამია ინფორმაციაში.
წაიკითხეთ ასევე:
- უმძიმესი ფოტო/ვიდეო მასალა ესპანეთიდან, სადაც წყალდიდობის მსხვერპლთა რიცხვი 62 -მდე გაიზარდა - დაკარგულების სამძებრო სამუშაოები გრძელდება
- "მადლობას გიხდით მთელ საქართველოს... ჩვენ ერთად ვერცერთი სტიქია და ვერაფერი მოგვერევა" - ვალენსიის რეგიონი სტიქიას ებრძვის: რას წერს "ლევანტეს" ადმინი ქართულ ენაზე?