როგორ შეგიძლიათ მიიღოთ დუბაიში ცხოვრებისა და მუშაობის უფლება?  - ინტერვიუ სპეციალისტთან

დუბაი მაღალანაზღაურებადი სამსახურებით, დასაქმების შესაძლებლობებით, ბიზნესის კეთების სიმარტივითა და კრიმინალის დაბალი მაჩვენებლით, მსოფლიოში ერთ-ერთი ყველაზე მიმზიდველი ქალაქია ცხოვრებისა და მუშაობისთვის.

მიუხედავად იმისა, რომ ცხოვრების ხარჯები საკმაოდ მაღალია, დუბაი არის შესაძლებლობების ადგილი, სადაც ბევრი შრომითა და თვითგანვითარებით ექსპატები თავის დამკვიდრებას ახერხებენ.

დუბაიში სამსახურისა და საცხოვრებლის მოძიებისას დიდ როლს თამაშობს სწორი კონტაქტები, რომელიც დაგეხმარებათ ხარჯების დაზოგვაში და სწრაფად ადაპტაციის შესაძლებლობას მოგცემთ.

როგორ უნდა მივიღოთ ქალაქში მუშაობისა და ცხოვრების უფლების უფლება, რა დოკუმენტებია ამისთვის საჭირო და რომელი ვაკანსიებია ყველაზე მოთხოვნადი, ამის შესახებ დეტალურად საუბრობს ტურისტული კომპანია Diana Holiday-ს დამფუძნებელი და დუბაის უძრავი ქონების ექსპერტი, დიანა ნანუაშვილი, რომელიც აღნიშნულ საკითხებთან დაკავშირებით კონსულტაციას უწევს როგორც საქართველოს, ისე უცხოეთის მოქალაქეებს.

დასაქმების რა შესაძლებლობები არსებობს დუბაიში და რომელი სფეროებია ექსპატებისთვის უფრო მიმზიდველი?

არაბთა გაერთიანებული საამიროები ეკონომიკური ჰაბია დუბაი, სადაც როგორც ადგილობრივებისთვის, ისე ექსპატებისთვის ბევრი შესაძლებლობა არსებობს. დუბაიში მსოფლიოს უმსხვილესი კომპანიები, გრანდიოზული, მრავალმილიონიანი პროექტები და ბიზნესებია თავმოყრილი, შესაბამისად, დასაქმებისა და პროფესიული წარმატების მიღწევისთვის ყველა პირობაა შექმნილი. პროფესიონალი, მოტივირებული და შრომისმოყვარე ადამიანები აქ არსებული ბიზნესებისთვის ყოველთვის პრიორიტეტულია.

იქიდან გამომდინარე, რომ წლებია, დუბაიში ვცხოვრობ და გარკვეული პროფესიული გამოცდილება დამიგროვდა, შემიძლია დავასახელო ყველაზე მოთხოვნადი და მაღალანაზღაურებადი სფეროები: აღმასრულებელი დირექტორი (CEO), ვებდეველოპერი, სამშენებლო დირექტორი, მფრინავი, IT სპეციალისტი, ექიმი (მაგალითად ქირურგი) და მარკეტოლოგი (ვაკანსია განსაკუთრებით მოთხოვნადია მსხვილ კომპანიებში). ამასთან, ბიზნესის რეგისტრაციის სიმარტივისა და რესურსებზე ხელმისაწვდომობის გამო დუბაიში დაფუძნებულ სტარტაპებს განვითარების მეტი შესაძლებლობა აქვს.

ჩამოთვლილ პოზიციებზე მინიმალური ანაზღაურება 50 000 დირჰამია (დაახლოებით 13 600$) და იზრდება სამუშაო ადგილისა და კვალიფიკაციის მიხედვით. კონკურენცია მაღალია, თუმცა სპეციალისტის შრომა აქ აუცილებლად ფასდება.

როგორ იღებს უცხოეთის მოქალაქე დუბაიში ცხოვრებისა და მუშაობის უფლებას, რა მოთხოვნები უნდა დააკმაყოფილოს მან ამისთვის?

ჩემი გამოცდილებით, არაბეთის გაერთიანებულ საამიროებში წარმატების მისაღწევად დიდი ენერგია, შრომა და ალბათ იღბალიც არის საჭირო. არ უნდა დანებდე და საკუთარი თავი ბოლომდე მოსინჯო.

იმისათვის, რომ დუბაიში დასაქმდეთ, ინგლისური ენის ფლობა აუცილებელია. ასევე ძალიან დაგეხმარებათ კავშირები. ხშირად მომმართავენ ხოლმე საქართველოდან და მთხოვენ, დავაკვალიანო სხვადასხვა მიმართულებით, იქნება ეს ცხოვრებისა თუ მუშაობის უფლების მოპოვება და საცხოვრებლის მისაღები პირობებით მოძიება. მე ყოველთვის მზად ვარ, კონსულტაცია გაგიწიოთ.

დუბაიში სამსახურის მოძიების თვალსაზრისით ყველაზე პრაქტიკული პლატფორმა Linkedin-ია. გასაუბრებას გაივლით ონლაინ და დასტურის შემთხვევაში, დამსაქმებელი კომპანია სრულად უზრუნველყოფს ვიზისა და სხვა საბუთების ხარჯებს. აქვე გეტყვით, რომ შესაძლოა, თავდაპირველად მაღალი ანაზღაურება და თქვენთვის ბოლომდე მისაღები პირობები არ გქონდეთ, მაგრამ მაინც გირჩევთ გარისკვას, რადგან კომპანიამ შესაძლებლობა მოგცათ, გამოცდილების გარეშე დასაქმებულიყავით. შემდეგ უკვე თქვენი მოტივაციის, ცოდნისა და უნარების შესაბამისად მოგეცემათ კარიერული ზრდის საშუალება, შესაბამისად, გაგიუმჯობესდებათ პირობებიც.

თუ სამსახურის დისტანციურად მოძიების შესაძლებლობა არ გხიბლავთ და მაინც ჩამოსვლა გადაწყვიტეთ, კავშირების გარეშე გაგიჭირდებათ, რადგან ცხოვრების ხარჯები საკმაოდ მაღალია. ამიტომაც გირჩევთ, საქართველოდანვე დაიჭიროთ თადარიგი, გადაავლოთ თვალი ვაკანსიებს და დასაქმების გარანტიით ჩამოხვიდეთ.

დუბაიში ცხოვრების უფლების მისაღებად უნდა გქონდეთ სამსახური ან პირიქით - ცხოვრების უფლება და შემდეგ შეძლებთ დასაქმებას. გასათვალისწინებელია, რომ უცხო ქვეყნის მოქალაქეებს საამიროებში მოქალაქეობას არ ანიჭებენ, მათ მხოლოდ სამუშაო ვიზის ან ცხოვრების უფლების მიღება შეუძლიათ.

საინტერესოა სწორედ დოკუმენტაციის ნაწილი. როგორ უნდა მივიღოთ სამუშაო ვიზა ან დუბაიში ცხოვრების უფლება?

ვიზის მიღება რთული არ არის, უბრალოდ გარკვეულ პირობებს უნდა აკმაყოფილებდე. არსებობს სხვადასხვა ტიპის ვიზა:

1. სამუშაო ვიზა - როცა თავად ხარ დასაქმებული;
2. სპონსორის ვიზა - მაგალითად მეუღლეს ან ოჯახის სხვა წევრს აქვს სამსახური, მაღალი შემოსავალი და თქვენი ცხოვრების ხარჯებს უზრუნველყოფს;
3. ფლობთ უძრავ ქონებას, რომელიც აღემატება მილიონს და ცხოვრების უფლებას ყოველ 2-3 წელიწადში ერთხელ აახლებთ;
4. ბიზნეს ვიზა - დოკუმენტი გენიჭებათ მაშინ, თუკი თვითონ არეგისტრირებთ ბიზნესს და მართავთ მას;
5. 10-წლიანი ოქროს ვიზა - ეს დუბაის ახალი პროექტია და პროფესიონალთა შესანარჩუნებლად საკმაოდ წარმატებულიც აღმოჩნდა. ოქროს ვიზა გენიჭებათ იმ შემთხვევაში, თუკი გაქვთ უმაღლესი განათლება, ცხოვრობთ არაბეთის გაერთიანებულ საამიროებში და ერთ კომპანიაში 5 წელზე მეტია მუშაობთ ან განსაკუთრებული წვლილი მიგიძღვით ქვეყნის განვითარებაში, ხართ მეცნიერი, მკვლევარი და ა.შ.

რა გადასახადების გადახდის ვალდებულება აქვს უცხოეთის მოქალაქეს დუბაიში ცხოვრებისა და მუშაობის შემთხვევაში?

თავდაპირველად უნდა გავითვალისწინოთ, რომ საამიროებში არსებული გადასახადები საქართველოსგან მკვეთრად განსხვავდება, რაც ბევრისთვის ერთგვარი შოკიც არის ხოლმე. იმისათვის, რომ არსებული სურათი უფრო მკაფიოდ დაგანახოთ, ორი ურთიერთსაპირისპირო ვარიანტი განვიხილოთ:

1-ლი ვარიანტი: დუბაიში ყველაზე ძვირი უძრავი ქონების გადასახადია. 3-4-სულიან ოჯახს მინიმუმ ორსაძინებლიანი აპარტამენტი დასჭირდება, რომლის ფასიც თვეში 1500-3000$-დან იწყება და შეიძლება 10 000$-ს გადასცდეს. ბინის ღირებულება დამოკიდებულია ადგილმდებარეობასა და საცხოვრებელ პირობებზე. ამას ემატება კომუნალური გადასახადები საორიენტაციოდ 500$-ის ოდენობით და ტრანსპორტირება და კვება დაახლოებით 1000$-დან ზემოთ. არ უნდა გამოგვრჩეს სკოლის ხარჯებიც: ექსპატებისთვის ყოველთვიური გადასახადი იწყება 1000 დირჰამიდან (დაახლოებით 270$) და იზრდება 8 000 დირჰამამდე (დაახლოებით 2200$).

მიუხედავად იმისა, რომ დუბაიში ცხოვრების ხარჯები საკმაოდ მაღალია, ზოგად ფასებთან შედარებით ბიუჯეტური კვების ობიექტებისა თუ საცხოვრებელი ბინების პოვნა მაინც შეგიძლიათ. მაგალითად, ზოგიერთ კვების ობიექტში კვება შეიძლება 10$ დაგიჯდეთ, მაშინ, როცა ძვირადღირებულ რესტორნებში ერთი სადილის ფასი შეიძლება 3000$ და მეტი იყოს.

მე-2 ვარიანტი: დუბაიში ცხოვრობენ ისეთი ექსპატებიც, რომლებიც თვიდან თვემდე თვითგადარჩენისთვის მუშაობენ ძალიან ცუდ პირობებში და დაბალ ხელფასზე. ძველ ქალაქში არსებობს უბნები, რომლებსაც „პატარა ინდოეთსა“ და „პატარა ბანგლადეშს“ ეძახიან. დუბაის განვითარებულ ნაწილთან შედარებით აქ ჰიგიენური პირობები საკმაოდ დაბალ დონეზეა, ვერც საკვების ხარისხზე ვიტყოდი კარგს და ვერც საცხოვრებლებზე. აქ მხოლოდ ლოგინს თუ იქირავებდით.

რომ შევაჯამოთ, თუ გაქვთ მოტივაცია, პროფესიული ზრდის პერსპექტივა და მაღალი კვალიფიკაცია, შეძლებთ მარტო ან ოჯახთან ერთად პირველ ვარიანტს გასწვდეთ.

რამდენად მაღალია მომართვიანობა საქართველოს მოქალაქეების მხრიდან დუბაიში დასაქმებასა და ცხოვრების უფლების მიღებასთან დაკავშირებით?

დიახ, ხშირად მომმართავენ როგორც ტურისტული მიზნებით, ისე დასაქმებისა და უძრავი ქონების თაობაზე. ბოლო პერიოდში ინტერესი განსაკუთრებით გაზრდილია. ძალიან მნიშვნელოვანია, როცა შეგიძლია ვინმესგან მიიღო ზუსტი და ამომწურავი ინფორმაცია და მომზადებული ჩახვიდე დუბაიში, სადაც უკვე დაგხვდება გარანტირებული სამსახური და საცხოვრებელი ადგილი.

აღნიშნულ საკითხებთან დაკავშირებით აქტიური კომუნიკაცია მაქვს საქართველოს მოქალაქეებთან, რომლებისთვისაც ენის ბარიერის არ არსებობა და სანდო რეკომენდაციების მიღება მნიშვნელოვანია.

დუბაიში სამოგზაურო ტურებთან და უძრავ ქონებასთან დაკავშირებით კონსულტაციის მისაღებად მიმართეთ დიანა ნანუაშვილს ფეისბუქის ან ინსტაგრამის საშუალებით ან დაუკავშირდით WatsApp-ით ნომერზე +971 50 713 4372.

ასევე დაგაინტერესებთ: რა ღირს დუბაიში ბინის შეძენა ან დაქირავება და რა შემთხვევაში მიიღებთ რეზიდენტის უფლებას? - ინტერვიუ უძრავი ქონების ექსპერტ დიანა ნანუაშვილთან

NS