პარტნიორები:
ავტორი:

ისრაელის არმია ლიბანში სახმელეთო შეჭრისთვის ემზადება, მსოფლიო ლიდერები კი მხარეებს დროებითი ზავის დადებას სთხოვენ - მორიგ მასშტაბურ კონფლიქტამდე ერთი ნაბიჯი რჩება

ისრაელის არმია ლიბანში სახმელეთო შეჭრისთვის ემზადება, მსოფლიო ლიდერები კი მხარეებს დროებითი ზავის დადებას სთხოვენ - მორიგ მასშტაბურ კონფლიქტამდე ერთი ნაბიჯი რჩება

ისრაელის არმიის სარდალმა ჰერცი ჰალევიმ განაცხადა, რომ ქვეყნის შეიარაღებული ძალები ლიბანში სახმელეთო შეჭრისთვის ემზადებიან.

ჰალევის თქმით, ქვეყნის საჰაერო ძალები საჰაერო დარტყმებს ლიბანის საზღვარზე და უფრო შორეულ რაიონებზე გააგრძელებენ, რათა გზა გაუხსნან სახმელეთო შეჭრას, რომელიც ჩრდილოეთ ისრაელის მცხოვრებლებს საშუალებას მისცემს დაბრუნდნენ თავიანთ სახლებში “ჰეზბოლასთან“ დაკავშირებული საფრთხის გარეშე.

სარდლის ცნობით, სახმელეთო სამხედრო ინვაზიის მოსამზადებლად ქვეყნის ჩრდილოეთში ორი დამატებითი ბრიგადა გამოიძახეს.

თავის მხრივ, ლიბანის ტრანსპორტის მინისტრის ალი ჰამიეს თქმით, რომელიც წარმოადგენს “ჰეზბოლას“ პოლიტიკურ ფრთას - აღნიშნული შეჭრა ისრაელის სამხედროებისთვის მძიმე შედეგებით დასრულდება.

ისრაელმა მასიური საჰაერო თავდასხმები ლიბანის ნაწილში რამდენიმე დღის წინ დაიწყო. დაიღუპა 600-მდე ადამიანი და დაშავდა ასობით მოქალაქე, დასახლებული პუნქტები დატოვეს ადგილობრივებმა. აღსანიშნავია, რომ ლიბანურმა დაჯგუფება “ჰეზბოლამ“ თელ-ავივისკენ ბალისტიკური რაკეტა გაისროლა. ისრაელის არმიის წარმომადგენლის თქმით, რაკეტა გაანეიტრალეს.

“ჰეზბოლა“ ირწმუნება, რომ დარტყმის სამიზნე იყო ისრაელის სადაზვერვო სააგენტო მოსადის შტაბ-ბინა, რომელიც მდებარეობს თელ-ავივის გარეუბანში. თუმცა, ისრაელის ხელისუფლება აცხადებს, რომ რაკეტა საცხოვრებელი რაიონისკენ იყო დამიზნებული.

ამასთანავე, ჯგუფი ისრაელის დაზვერვას ადანაშაულებს ათასობით პეიჯერისა და რაციის აფეთქების ორგანიზებაში, რომელსაც იყენებდნენ “ჰეზბოლას“ წევრები.

  • წამყვანი ძალები ზავს ითხოვენ

ერთობლივ განცხადებაში 11-მა ქვეყანამ და ევროკავშირმა ისრაელს და “ჰეზბოლას“ სამკვირიანი ზავის დადებისკენ მოუწოდეს. მათი მოთხოვნაა, მხარეებმა კონფლიქტის მშვიდობიანი გზით მოგვარება სცადონ.

ნიუ-იორკში გაეროს გენერალური ასამბლეის სესიაზე მიღებულ განცხადებაში ნათქვამია, რომ ისრაელსა და “ჰეზბოლას“ შორის არსებული კონფლიქტი შესაძლოა გამწვავდეს მთელ რეგიონში, რაც არავის ინტერესებში არ შედის.

განცხადებას ხელი მოაწერეს აშშ-მ, საფრანგეთმა, დიდმა ბრიტანეთმა, გერმანიამ, იტალიამ, იაპონიამ, კანადამ, ავსტრალიამ, საუდის არაბეთმა, არაბთა გაერთიანებულმა საამიროებმა, კატარმა და ევროკავშირმა.

აშშ-ს პრეზიდენტმა ჯო ბაიდენმა და საფრანგეთის პრეზიდენტმა ემანუელ მაკრონმა ცალკე განცხადება გააკეთეს მშვიდობიანი მოგვარების აუცილებლობის შესახებ.

“ლიბანსა და ისრაელს შორის არსებული ვითარება წარმოადგენს უფრო ფართო რეგიონული ესკალაციის მიუღებელ რისკს. ეს არავის ინტერესშია, არც ისრაელელი და არც ლიბანელი ხალხის. დიპლომატიური შეთანხმების დროა, რომელიც საშუალებას მისცემს მშვიდობიან მოსახლეობას საზღვრის ორივე მხარეს უსაფრთხოდ დაბრუნდნენ თავიანთ სახლებში. თუმცა, დიპლომატია წარმატებას ვერ მიაღწევს ამ კონფლიქტის ესკალაციის ფონზე. ამგვარად, მოვუწოდებთ დაუყონებლივი, 21-დღიანი ცეცხლის შეწყვეტისკენ ლიბანისა და ისრაელის საზღვრის გასწვრივ, რათა მივცეთ სივრცე დიპლომატიას კონფლიქტის დიპლომატიური მოგვარებისთვის“, - აღნიშნულია ერთობლივ განცხადებაში.

ისრაელის არმიამ მასობრივი დარტყმები ლიბანზე ორშაბათს დაიწყო. ისრაელის ხელისუფლება აცხადებს, რომ ისინი მხოლოდ “ჰეზბოლას“ ინფრასტრუქტურას ურტყამენ.

“ჰეზბოლას“ განცხადებაში კი ნათქვამია, რომ ჯგუფმა ოთხშაბათს 06:30 საათზე გაუშვა ბალისტიკური რაკეტა თელ-ავივისკენ, ღაზას სექტორში პალესტინელების "მამაცი და კეთილშობილური წინააღმდეგობის" მხარდასაჭერად და "ლიბანისა და მისი ხალხის დასაცავად".

BBC-სთან ინტერვიუში ლიბანის ჯანდაცვის მინისტრმა ფირას აბიადმა ქვეყანაში მომხდარს “სისხლიანი ხოცვა“ უწოდა.

“ჰეზბოლამ პირველად დაუმიზნა რაკეტები თელ-ავივის ზონას“, - წერს ისრაელის გამოცემა Haaretz Ynet-ი შემთხვევის შესახებ.

ისრაელის პრემიერ-მინისტრმა ბენიამინ ნეთანიაჰუმ პირობა დადო, რომ სამხედროები გააგრძელებენ ოპერაციებს“ჰეზბოლას“ წინააღმდეგ.

ბოლო მონაცემებით, ლიბანში ისრაელის ავიაციის მიერ განხორციელებული ავიაიერიშების შედეგად დაღუპულთა რაოდენობა 600-მდე გაიზარდა. ისრაელის შეიარაღებული ძალების მიმდინარე სპეცოპერაციას, სახელად “ჩრდილოეთის ისრები", რომელიც ჯერჯერობით მხოლოდ მასობრივი საჰაერო დარტყმებით შემოიფარგლება, საკმაოდ მძიმე შედეგები მოჰყვა.

წყარო

იხილეთ ასევე:

ტეგები თემაზე: