ანჯელინა ჯოლის მამამ ქალიშვილი ღაზის სექტორის მხარდამჭერი განცხადებების გამო გააკრიტიკა - "იმედგაცრუებული ვარ, რომ ჩემს შვილს, ისევე როგორც ბევრს, არ ესმის..."

ჰოლივუდის მსახიობმა, ანჯელინა ჯოლის მამამ ჯონ ვოიტმა პირად ბლოგზე გამოქვეყნებულ ვიდეოში ისრაელ - "ჰამასის" ომზე ქალიშვილის პოზიცია დაგმო. მან ანჯელინას "ინსტაგრამზე" გამოქვეყნებულ ღაზის სექტორის მხარდამჭერ პოსტს "სრული სისულელე“ უწოდა.

"ძალიან იმედგაცრუებული ვარ, რომ ჩემს ქალიშვილს, ისევე როგორც ბევრს, არ ესმის ღვთის ჭეშმარიტების შესახებ. ეს შეეხება ღვთის მიწის, ებრაელთა მიწის ისტორიის განადგურებას. ისრაელის არმიამ უნდა დაიცვას თავისი მიწა და ხალხი", - ამბობს ვოიტი.

მან დასძინა, რომ "ჰამასის" გეგმაა მსოფლიომ იფიქროს, რომ ისრაელი პალესტინელ ბავშვებს კლავს. თუმცა, მისი თქმით, ისრაელი მხოლოდ თავის ტერიტორიებს იცავს.

"ისრაელის ხალხი ზრუნავს ადამიანებზე. მათ უყვართ, ზრუნავენ... აკეთებენ იმას, რასაც ეს ცხოველები ვერ ხვდებიან. სამართლიანობა გაიმარჯვებს", - დასძინა ვოიტმა.

• ანჯელინა ჯოლის პოზიცია ისრაელის ომთან დაკავშირებით

შეგახსენებთ, ანჯელინა ჯოლიმ განაცხადა, რომ "ჰამასის" მებრძოლებს ტერორისტებად მიიჩნევს, მაგრამ ღაზის სექტორში ადამიანების დაღუპვას ვერ გაამართლებს. მან ასევე მოუწოდა ისრაელს, შეწყვიტოს აფეთქებები ღაზაში.

"პალესტინელების და ისრაელელების სიცოცხლე, ასევე მსოფლიოში ყველა ადამიანის სიცოცხლე თანაბრად მნიშვნელოვანია. ყველაფერი, უნდა გაკეთდეს, რათა თავიდან ავიცილოთ მშვიდობიანი მოსახლეობის მსხვერპლი", - წერს მსახიობი ინსტაგრამზე.

ჯოლის პოზიცია სოციალური ქსელში უამრავმა ადამიანმა გააკრიტიკა, მაგრამ ამან ვერ შეაჩერა მსახიობი და მოგვიანებით კვლავ დაუჭირა მხარი ღაზის სექტორს.

"ღაზა თითქმის ორი ათეული წელია, ღია ცის ქვეშ არსებული ციხეა და სწრაფად ხდება მასობრივი სასაფლაო. დაღუპულთა 40% უდანაშაულო ბავშვია. მთელ ოჯახებს კლავენ. მიუხედავად იმისა, რომ მსოფლიო უყურებს, მრავალი მთავრობის აქტიური მხარდაჭერით მილიონობით პალესტინელი მშვიდობიანი მოქალაქე - ბავშვები, ქალები, ოჯახები კოლექტიურად ისჯებიან: არ აქვთ საკვები, მედიკამენტები და ჰუმანიტარული დახმარება, რაც საერთაშორისო სამართალს ეწინააღმდეგება“, - განაცხადა მსახიობმა.