25
აპრილიდღის ზოგადი ასტროლოგიური პროგნოზი
ევგენი პრიგოჟინის მოსკოვზე გალაშქრება და ე.წ. სამართლიანობის მარში, დიდი ალბათობით, რუსეთში დიდ ცვლილებებს გამოიწვევს. უკვე შეძლება ითქვას, რომ ზედაპირზე ამოტივტივდა ბევრი ისეთი ფაქტი, რაც აქამდე ბევრისთვის უცნობი იყო. უპირველეს ყოვლისა კი ის, რომ რუსეთის პრეზიდენტის ვლადიმირ პუტინის ხელისუფლება მნიშვნელოვნად შერყეული და ავტორიტეტი დაცემულია.
მიუხედავად იმისა, რომ პუტინმა პრიგოჟინის მოქმედებებს შეიარაღებული ამბოხი უწოდა და ყველა ძალოვან უწყებას მისი შეჩერება უბრძანა, აღმოჩნდა, რომ პრეზიდენტის ეს დავალება სრულად უგულებელყოფილი დარჩა.
მეტიც, "ვაგნერს“ სხვადასხვა ქალაქებში პოლიცია ესალმებოდა, მოსახლეობა თბილად ხვდებოდა... აფრენილი ვერტმფრენები კი, რომლებსაც პრიგოჟინის კოლონები უნდა გაენადგურებინა, ერთი მეორეს მიყოლებით განადგურდა. მთლიანობაში სულ მცირე 5 ვერტმფრენია განადგურებული, მათ შორის ერთი მოწინავე კა-52 და სატრანსოპრტო ილ 22.
ამ ორი საფრენი აპარატის ეკიპაჟის წევრები ვერ გადარჩნენ. როდესაც პრიგოჟინს ჰკითხეს, ილ 22-ს რაღას ერჩოდითო, მან განაცხადა, რომ კოლონაში სულელი ჯარისკაცი ჰყავდა, რომელიც რაც კი დაფრინავდა, ყველაფერს აგდებდა. "ვაგნერის“ მეთაური გარდაცვლილების ოჯახებს კომპენსაციის გადახდას დაჰპირდა.
მოკლედ, პუტინს არ დაემორჩილა არც სასაზღვრო, არც რეგიონალური პოლიცია. "ვაგნერმა“ მინიმალური წინააღმდეგობით თითქმის მოსკოვის ოლქამდე ჩააღწია. როდესაც პუტინმა დაინახა, რომ პრიგოჟინის გამჩერებელი მის გვერდით აღარავინ იყო, როგორც ჩანს, დათანხმდა, რომ ნებისმიერ ფასად გაეჩერებინათ. ამიტომ, პრეზიდენტმა, რომელიც დილით ამბობდა, რომ შეიარაღებული ამბოხის ავტორები სასტიკად დაისჯებოდნენ, ბელარუსის პრეზიდენტს ალექსანდრ ლუკაშენკოს სთხოვა, რომ პრიგოჟინს დალაპარაკებოდა. რა თქმა უნდა, ლუკაშენკო ამ შემთხვევაში პუტინის პირი იყო და ზუსტად იმას ეტყოდა, რაც პუტინმა შეუთვალა. ასეა თუ ისეა, პრიგოჟინი შეაჩერეს და "ვაგნერი“ საველე ბანაკებში დაბრუნდა.
ადამიანს, რომლმაც სამხედრო ამბოხი მოაწყო, დახოცა რუსი ჯარისკაცები, როგორც ირკვევა, ყველა სისხლისსამართლის ბრალდება მოუხსნეს. ჯერჯერობით უცნობია, რას შეპირდნენ მას, თუმცა თავდაცვის მინისტრის და გენშტაბის ხელმძღვანელის შეცვლაზე აქტიურად ალაპარაკდა რუსული საზოგადოება. (რაც პრიგოჟინის მთავარი მოთხოვნა იყო).
"ტელეგრამში" იწერებოდა, რომ მოლაპარაკებებში ასევე მონაწილეობდა ტულის ოლქის გუბერნატორი ალექსეი დიუმინი. ეს ფაქტი გუბერნატორის პრესსამსახურმა უარყო. გუშინ კი უკვე იმასაც ამბობდნენ, რომ დიუმინი სერგეი შოიგუს ჩაანაცვლებს და თავდაცვის ახალი მინისტრი გახდება.
- ვინ არის ალექსეი დიუმინი?
დიუმინის შესახებ ფართო საზოგადოებამ პირველად მაშინ გაიგო, როდესაც დასავლურ პრესაში გავრცელდა ინფორმაცია, რომ მას პუტინი თავის შემცვლელად ამზადებდა.
ის 1972 წლის 28 აგვისტოს სამხედრო ექიმის ოჯახში დაიბადა. ფიზიკურად ძლიერი მოზარდი ბავშვობიდან ჰოკეით იყო გატაცებული. მეცხრე კლასში ოფიციალური შეთავაზებაც კი ჰქონდა, რომ პროფესიონალურ ჰოკეიში გადასულიყო, თუმცა ეს წინადადება უარჰყო და მამის გზას გაჰყვა.
1994 წელს ვორონეჟის რადიოელექტროობის უმაღლესი სამხედრო საინჟინრო სასწავლებელი დაამთავრა.
ამ პერიოდიდან დიუმინი ფედერალური დაცვის სამსახურში იმ განყოფილებაში მუშაობდა, რომელიც სახელმწიფოს პირველი პირების კავშირზეა პასუხისმგებელი.
1999 წლიდან კი პრემიერ-მინისტრის ვლადიმირ პუტინის პირად დაცვაში გადავიდა. როდესაც პუტინი პრეზიდენტი გახდა, ის მისი დაცვის ხელმძღვანელის მოადგილე იყო - თითქმის ყველა ვიზიტზე დაჰყვებოდა როგორც ქვეყნის შიგნით, ისე ქვეყნის გარეთაც.
პარალელურად აგრძელებდა სწავლასაც:
2009 წელს უმაღლესი მოსწრებით რუსეთის სახელმწიფო სამსახურის აკადემია დაამთავრა.
2013 წელს გენშტაბის სამხედრო აკადემიის გადამზადება გაიარა და გენშტაბის ხელმძღვანელის მოადგილე გახდა. მისი საქმე რუსეთის შეიარაღებული ძალების სპეცდანიშნულების ოპერაციების განხორციელება იყო.
2015-2016 წლებში თავდაცვის მინისტრის მოადგილე გახდა. თუმცა ვლადიმირ პუტინმა მალევე ტულის ოლქის გუბერნატორად დანიშნა. მისი სამხედრო წოდება გენერალ-პოლკოვნიკია. აქვს უარავი ორდენი.
დიუმინი თანამედროვე ტიპის ლიდერებს განეკუთვნება, რომელიც კაბინეტში ჯდომის ნაცვლად ჯარისკაცებთან უშუალო კონტაქტს ამჯობინებს. გამოირჩევა მტკიცე ხასიათით, ორგანიზებულობითა და დასახული მიზნების მიღწევით.
სხვადასხვა წყაროებზე დაყრდნობით, შოიგუ უახლოეს მომავალში შეიცვლება და მის ყველაზე რეალურ შემცვლელად სწორედ დიუმინს მოიაზრებენ.
იხილეთ ასევე:
ავტორი: ანრი კურტანიძე
აუფ,თქვენც ახლა რაკასოვსკი მოგყავთ რა,ერთი ლენჩი მეორეთი შეიცვლება და ეგაა რა.
სტალინს თუ წამოაყენებენ შეიძლება ეშველოს რუსსიას სხვა შემთხვევაში არაფერი ეშველება , რადგან შესაკრებთა გადაადგილებით ჯამი არ იცვლება . რა ვიცი ცადონ მაინც .