რას ამბობს ბავშვთა ენდოკრინოლოგი აქონდროპლაზიის სამკურნალო პრეპარატზე - "არც ერთი ქვეყნის პროტოკოლში მითითებული არ არის"

არც ერთი ქვეყნის პროტოკოლში, ამ ეტაპამდე გამოშვებულში, პრეპარატი „ვოსორიტიდი“, როგორც აუცილებელი მკურნალობის მეთოდი, მითითებული არ არის, - ამის შესახებ ბავშვთა ენდოკრინოლოგმა, ნინო ხელაძემ იშვიათი დაავადებების საკითხებზე მომუშავე საკოორდინაციო საბჭოს დასრულების შემდეგ განაცხადა, სადაც აქონდროპლაზიის გაიდლაინის მომზადების სტატუსი, მედიკამენტ „ვოსორიტიდის“ დანერგვის ეტაპები და ამ მიმართულებით, საერთაშორისო გამოცდილება მიმოიხილეს.

ბავშვთა ენდოკრინოლოგმა სამუშაო შეხვედრასა და პროტოკოლზე ისაუბრა.

"გაიდლაინზე დაჩქარებულ რეჟიმში ვმუშაობთ და ვთვლით, რომ პირველ ივნისამდე იქნება დრაფტი, რომელიც შემდგომ განიხილება და დამტკიცდება. ამ გაიდლაინზე მუშაობს სხვადასხვა სპეციალისტი, ბევრი ექიმი.

წამალი უმეტესზე არ მოქმედებს, ამიტომ აუცილებელია, რომ ყველა ბავშვი შეფასდეს და თუ მათ აქვს სხვადასხვა გართულებები, რომელთაც სჭირდებათ ან რეაბილიტაცია, ან ყელ-ყურის მხრივ ჩარევა, ან რაიმე ოპერაციული ჩარევა, ეს რაც შეიძლება დროულად უნდა იყოს შეთავაზებული და რაც შეიძლება კვალიფიციურად.

არც ერთი ქვეყნის პროტოკოლში, ამ ეტაპამდე გამოშვებულში, ეს პრეპარატი, როგორც აუცილებელი მკურნალობის მეთოდი მითითებული არ არის.

რა თქმა უნდა რისკები არის, თუმცა ამ რისკებს ჩვენ ყველას გავეცანით. ეს რისკები მართვადია და ჩვენ, ექიმები მზად ვართ, რომ თუ პრეპარატს შეიძენენ ვმართოთ პაციენტები ისე, როგორც აუცილებელია და როგორც მართავენ იმ ქვეყნებში, რომელშიც ამ პრეპარატებს იყენებენ. მზად ვარ გავუწიო რეკომენდაცია და პაციენტებს დავეხმარო მკურნალობის დაწყებაში“, - განაცხადა ნინო ხელაძემ.

აღნიშნულ კომენტარს ჯანდაცვის სამინისტრო ავრცელებს.

ნახეთ ასევე:

• რას წერს ექიმი არჩილ მარშანია პრეპარატზე, რომლის შემოტანასაც აქონდროპლაზიის მქონე ბავშვების დედები ითხოვენ - "დიახ, უსაფრთხო და ეფექტურია"