კენიაში საქართველოში ბაობაბების ექსპორტის საკითხს იკვლევენ - "არ გამორიცხავენ, საქართველოში ჩასვლას, რათა გაარკვიონ, რატომ აქვს ინვესტორს ხეების წაღების სურვილი"
კენიის პარლამენტი დაინტერესებულია საქართველოში ბაობაბის ექსპორტის შესახებ "საკამათო გარიგებით“. ამის შესახებ კენიური გაზეთ Nation-ი წერს და გამოქვეყნებულ სტატიაში ნათქვამია, რომ კანონმდებლები სამთავრობო უწყებებს აღნიშნულ საკითხთან დაკავშირებით, "გამჭვირვალობის ნაკლებობაში" ადანაშაულებენ. ისინი ეჭვობენ, რომ ხეების გაყიდვა კორუფციული სქემით ხდება.
კენიის პარლამენტის გარემოს დაცვის კომიტეტის წევრებმა (პარლამენტის ქვედა პალატა) ქილიფის რაიონის სოფლები მოინახულეს. ეს ის სოფლებია, სადაც მოსახლეობა ბაობაბებს ყიდდა. ადგილობრივები ამბობენ, რომ ერთი ბაობაბის სანაცვლოდ მიიღეს 100 000-დან 300 000-მდე კენიური შილინგი, რაც დაახლოებით, $2 470-დან $8 000-მდე დოლარია.
"ხეები იმიტომ გავყიდეთ, რომ დიდ ფართობს იკავებს და გვერდით სხვა მცენარეები არ იზრდება“, - ამბობს ერთ-ერთი ადგილობრივი.
თუმცა პოლიტიკოსები, რომლებიც იკვლევენ გარიგების დეტალებს, თვლიან, რომ ხეების ეკონომიკური და სოციალური ღირებულება არ იყო გათვალისწინებული. გარდა ამისა, მათ აინტერესებთ, რატომ აკრძალა ხელისუფლებამ რამდენიმე თვის წინ ბაობაბების ექსპორტი და შემდეგ ისევ დაუშვა.
The Standard-ის ცნობით, ადგილობრივი ხელისუფლების წარმომადგენლები არ გამორიცხავენ, რომ საქართველოში მოუწიოთ ჩასვლა, რათა გაარკვიონ, "რატომ აქვს ინვესტორს ხეების ექსპორტის სურვილი.“
დეპუტატმა ჩარლზ კამურენმა თქვა, რომ "საჭიროა კანონმდებლობა ხეების დასაცავად - მიუხედავად იმისა, რომ ბაობაბი არ არის შეტანილი გადაშენების პირას მყოფ სახეობებში." (წყარო)
ცნობისთვის, 2018 წელს ბრიტანულმა გაზეთმა, Evening Standard-მა გაავრცელა ინფორმაცია, რომ საქართველოს ყოფილმა პრემიერ-მინისტრმა, მილიარდერმა ბიძინა ივანიშვილმა აღმოსავლეთ აფრიკაში ოთხი ბაობაბი იყიდა. კენიის პორტიდან საქართველოში 250 ტონაზე მეტი წონის ხეების გადასატანად მილიარდერს 850 000 დოლარის გადახდა მოუწია.
წარსულში პარკისთვის გიგანტურ ხეებს საქართველოშიც ეძებდნენ და საზოგადოებას არაერთი სიურეალისტური კადრი უნახავს გიგანტური ხეების ერთი ადგილიდან მეორეზე გადატანის.
ნახეთ ასევე: