ვინ იყო თელ-ავივში გუშინ მომხდარი შეიარაღებული თავდასხმის ორგანიზატორი, რომელიც სამართალდამცველებმა მოკლეს: სპეცოპერაციის დეტალები

თელ-ავივში გუშინ ღამით მომხდარი შეიარაღებული თავდასხმის ორგანიზატორი, ოპერატიული სამძებრო სამუშაოების შემდეგ, ისრაელის ძალოვანებმა მოკლეს. აღნიშნულ ინფორმაციას The Jerusalem Post-ი ავრცელებს.

გამოცემის ინფორმაციით, შეიარაღებული თავდამსხმელის ვინაობა ცნობილია - ის 28 წლის რაად ფაჰთი ხალემია, რომელიც ჯენინის დევნილთა ბანაკში ცხოვრობდა.

არსებული ინფორმაციით, ტერაქტის შემდეგ ის ჯაფაში მდებარე მეჩეთში იმალებოდა, სწორედ იქ, სადაც ისრაელის უსაფრთხოების სამსახურის წარმომადგენლებმა მისი ლიკვიდირება მოახერხეს.

ისრაელის მედიის ინფორმაციით, ტერორისტმა უსაფრთხოების ოფიცრებს 10-მდე ტყვია ესროლა. ამას საპასუხო ცეცხლი მოჰყვა, რასაც 28 წლის ტერორისტის სოცოცხლე ემსხვერპლა.

ცნობისთვის, გუშინ, 7 აპრილს, პალესტინელი ტერორისტის მიერ დაწყებული სროლის შედეგად 2 ადამიანი დაიღუპა, ხოლო 8 დაიჭრა. The Jerusalem Post-ის ინფორმაციით, დაღუპულები არიან 28 წლის თომერ მორადი და 27 წლის ეითამ მეგინი. ისინი კფარ საბაში ცხოვრობდნენ.