"მიხეილ სააკაშვილს ვურჩიე, რომ შიმშილობა არ დაიწყოს და ის ამას აუცილებლად გაითვალისწინებს" - ადვოკატი
"ჩემი რჩევაა, რომ მიხეილ სააკაშვილი საკუთარ ჯანმრთელობას უნდა გაუფრთხილდეს, რადგან დასუსტებული ჯანმრთელობით ციხეში მყოფი სააკაშვილი მის პოლიტიკურ ოპონენტებს სურთ, მათ შორის ბატონ ივანიშვილს" - ამის შესახებ მიხეილ სააკაშვილის ადვოკატმა, გიორგი მშვენიერაძემ რუსთავის ციხეში მიხეილ სააკაშვილთან შეხვედრის შემდეგ განაცხადა.
მშვენიერაძის თქმით, მან ურჩია სააკაშვილს, რომ შიმშილობა არ დაიწყოს.
"სწორედ ამიტომ, ვერ ჩავთვლი სწორ ნაბიჯებად ამ ეტაპზე მის მიერ შიმშილობის გამოცხადებას, რაც მას ვუთხარი კიდეც. იმედია, ამ რჩევას ის აუცილებლად გაითვალისწინებს, ვინაიდან ამით მხოლოდ ბიძინა ივანიშვილი იხეირებს.
მე პრეზიდენტ სააკაშვილის ნაცვლად ვერ აღვწერ მის მდგომარეობას. ის ამბობს, რომ მას სჭირდება სამედიცინო დახმარება, რომელიც უკავშირდება ნევროლოგიურ საკითხებს. როგორც ვიცი, მასთან კონსულტაციაზე იმყოფებოდა ექიმი, რომელიც სასჯელაღსრულების დაწესებულების კონტრაქტორია. მისივე განცხადების, სააკაშვილთან შეხვედრის შემდეგ გამოიკვეთა, რომ მას სჭირდება კვალიფიციური სამედიცინო დახმარება", - განაცხადა მშვენიერაძემ.
რაც შეეხება, პარლამენტში დამოუკიდებელი საგამოძიებო კომისიის შექმნას, მშვენიერაძის განცხადებით, ეს მათ ინტერესებში შედის.
"ჩვენს ინტერესებში შედის, არ გვაქვს ფუჭი მოლოდინი, რომ პარლამენტი დაადასტურებს არაადამიანურ და ღირსების შემლახველ მოპყრობას, მაგრამ თავად საგამოძიებო კომისიის მუშაობა კარგად აჩვენებს საზოგადოებას თუ რასთან გვქონდა შეხება წინა თვეებში, - ამის შესახებ მიხეილ სააკაშვილის ადვოკატმა გიორგი მშვენიერაძემ რუსთავის პენიტენციურ დაწესებულებაში მისი მონახულების შემდეგ განაცხადა.
გიორგი მშვენიერაძის თქმით, მიხეილ სააკაშვილი მზად არის თავად წარსდგეს საგამოძიებო კომისიაზე და კომისიის წევრებს შესაბამისი ინფორმაცია მიაწოდოს. რაც შეეხება მესამე პრეზიდენტის ჯანმრთელობის მდგომარეობას, ადვოკატის ინფორმაციით, სააკაშვილის თავს გრძნობს სუსტად, მაგრამ არის ბრძოლის განწყობაზე და "სჭირდება კვალიფიციური ექიმების კონსულტაცია, რომელზეც ხელი არ მიუწვდება“.
"მე უკვე მესამედ მომეცა შესაძლებლობა პრეზიდენტთან შეხვედრისა და საუბრის. არის გარკვეული დეტალები რასაც ვაზუსტებთ სასამართლოში მიმდინარე საქმესთან დაკავშირებით, მათ შორის ვისაუბრეთ მისი ჯანმრთელობის მდგომარეობაზე და იმ ნაბიჯებზე, რომლის გადადგმის მოლოდინიც ნორმალურ სახელმწიფოში ჯანდაცვის სისტემიდან ექნებოდა ნებისმიერ ნორმალურ ადამიანს.
დამოუკიდებელი საგამოძიებო კომისიის შექმნა პარლამენტში შედის ჩვენს ინტერესებში, არ გვაქვს ფუჭი მოლოდინი, რომ პარლამენტი დაადასტურებს არაადამიანური და ღირსების შემლახველ მოპყრობას, მაგრამ თავად საგამოძიებო კომისიის მუშაობა და შესაბამისი ადამიანების დაკითხვა, მტკიცებულებათა გამოკვლევა საზოგადოებას კარგად აჩვენებს თუ რასთან გვქონდა შეხება წინა თვეებში, როდესაც სააკაშვილი დაექვემდებარა არაადამიანურ და ღირსების შემლახავ მოპყრობას.
მე არ ვარ ექიმი, რომელსაც შეუძლია სამედიცინო თვალსაზრისით დასკვნა დადოს, მაგრამ ნამდვილად შემიძლია გითხრათ, რომ მას აქვს უფლება მიიღოს ალტერნატიული სამედიცინო მოსაზრება საკუთარი ექიმებისგან. თავს გრძნობს სუსტად, მაგრამ არის ბრძოლის განწყობაზე და სჭირდება კვალიფიციური ექიმების კონსულტაცია, რაზეც ხელი არ მიუწვდება”, - აღნიშნა გიორგი მშვენიერაძემ.