26
აპრილიდღის ზოგადი ასტროლოგიური პროგნოზი
მესამე წელია, რაც რუზგარ გურიანოვი ითხოვს პასუხს კითხვაზე, - რა მოუვიდა მის 13 წლის შვილს, რომელიც გლანდების ოპერაციის გასაკეთებლად საავადმყოფოში მიიყვანა და იქედან კი შინ გარდაცვლილი გაატანეს.
2018 წლიდან დღემდე პროკურატურა ხელს სამხარაულის ექსპერტიზის ეროვნული ბიუროსკენ იშვერს და იმ ფაქტს, რომ საქმეში ბრალდებული ჯერაც არ გამოუკვეთავს, ექსპერტიზის დასკვნის მოლოდინით ხსნის. ექსპერტიზის ეროვნული ბიურო, თავის მხრივ, მესამე წელია ამბობს, რომ "გონივრულ ვადაში“ მოამზადებს კომისიური ექსპერტიზის დასკვნას, რომელმაც პასუხი უნდა გასცეს მთავარ კითხვას - ხომ არ იყო ოპერაციისას სამედიცინო პერსონალის მხრიდან დაშვებული შეცდომა, რომელსაც შეიძლებოდა ბავშვის სიკვდილი გამოეწვია.
- ტრაგიკული ოპერაცია
ეთნიკურად აზერბაიჯანელი 13 წლის მახალ გურიანოვი მარნეულში, მამასთან იზრდებოდა. მახალის დედა და და ცალკე ცხოვრობდნენ. რუზგარ გურიანოვი გვეუბნება, რომ მისი შვილი ჯანმრთელობის პრობლემებს არ უჩიოდა. თანატოლების მსგავსად სკოლაში დადიოდა და სპორტს მისდევდა. 2017 წლის ნოემბერში, როდესაც მახალი ყელის ტკივილმა შეაწუხა, მამამ მარნეულის სამედიცინო ცენტრ "ადიკში“ კონსულტაციაზე მიიყვანა. ექიმებმა თქვეს, რომ საჭირო იყო ქირურგიული ჩარევა და გლანდების ოპერაცია 2017 წლის 30 ნოემბერს დანიშნეს.
ბავშვი საოპერაციოში თავისი ფეხით შევიდა. მამა იხსენებს, რომ ცუდის მოლოდინი აზრადაც არ გაუვლიათ. ოპერაცია რომ ჩვეულებრივზე დიდხანს გაგრძელდა, რუზგარ გურიანოვმა შვილის ნახვა მოინდომა. ექიმებმა ავადმყოფის მონახულებაზე უარი განაცხადეს, თუმცა ოჯახის წევრებს აუხსნეს, რომ მდგომარეობა გართულებული იყო და პაციენტს რეანიმაციაში გადაყვანა სჭიდებოდა. რუზგარ გურიანოვი ამბობს, რომ მისი შვილი მარნეულის სამედიცინო ცენტრში კომატოზურ მდგომარეობაში სამი დღის განმავლობაში იმყოფებოდა.
2017 წლის 2 დეკემბერს, გურიანოვის დაჟინებული თხოვნით ბავშვი ი. ციციშვილის სახელობის ბავშვთა საავადმყოფოში გადაიყვანეს. თუმცა სამედიცინო პერსონალის ძალისხმევა აქაც უშედეგო აღმოჩნდა - დაახლოებით ერთთვიანი კომატოზური მდგომარეობის შემდეგ, 2018 წლის 9 იანვარს, 13 წლის მახალი გარდაიცვალა.
- გარდაცვლილი ბავშვის ოჯახი წლებია სამხარაულის ექსპერტიზის ბიუროს დასკვნას ელის
მომხდარიდან მალევე, შსს-მ საქმე სისხლის სამრთლის 116-ე მუხლით აღძრა, რაც გაუფრთხილებლობით სიცოცხლის მოსპობას გულისხმობს. გამოძიების დაწყებიდან 1 წლის განმავლობაში გარდაცვლილის მამას არ ჰქონდა დაზარალებულის სტატუსი, შესაბამისად, არც იმის უფლება, საქმის მასალებში ჩაეხედა და გაეგო, როგორ მიმდინარეობდა მისი შვილის გარდაცვალების საქმის გამოძიება.
2019 წელს, მას შემდეგ, რაც საქმეში არასამთავრობო ორგანიზაცია "ადამიანის უფლებათა ცენტრი " ჩაერთო, პროკურატურამ რუზგარ გურიანოვს დაზარალებულის სტატუსი მიანიჭა. ამით ორგანიზაციის ადვოკატს, დიმიტრი ნოზაძეს მიეცა საშუალება, შეესწავლა საქმის მასალები. თუმცა, შესასწავლი ბევრი არაფერი აღმოჩნდა, რადგან, როგორც ადვოკატი ამბობს, საქმე, ფაქტობრივად, თაროზე იყო შემოდებული.
"ჩვენ რომ ჩავერთეთ, საქმე, ფაქტობრივად, ადგილიდან არ იძვროდა. ახლაც ასეა. ფაქტობრივად, არაფერი კეთდება. ბრალდებულიც კი არ არსებობს. მთელი ამ ხნის განმავლობაში პროკურატურას რომ ვთხოვდით პასუხს, სამხარაულის ბიუროში გვამისამართებდა, დასკვნას ველოდებითო. სამხარაული კი გვეუბნებოდა, რომ არ ჰყავდათ შესაბამისი სპეციალისტი, რის გამოც დასკვნას ვერ ამზადებდნენ. ჩამოვიარე კერძო კლინიკები და ვიპოვე ოტოლარინგოლოგი (ყელ-ყურ-ცხვირის ექიმი), ეს, წესით, მათ უნდა გაეკეთებინათ, მაგრამ, სამწუხაროდ, არც ამას მოჰყოლია შედეგი. დასკვნა ჯერ კიდევ არ არის და არავინ იცის როდის იქნება.
2 წლის განმავლობაში 4-5 ჯერ მაქვს მიწერილი სამხარაულისთვის და ყველა ჯერზე, ყველა წერილის პასუხად მწერენ, რომ დასკვნა "გონივრულ ვადაში“ მომზადდება", - გვეუბნება დიმიტრი ნოზაძე.
ჩვენ წერილობით მივმართეთ სამხარაულის ექსპერტიზის ბიუროს და ვკითხეთ - რატომ ვერ მომზადდა სამი წლის განმავლობაში კომისიური ექსპერტიზის დასკვნა მახალ გურიანოვის გარდაცვალების საქმეზე. უწყება ვალდებულია მაქსიმუმ 10 დღის ვადაში გაგვცეს პასუხი. თუმცა საქმეში უკვე დევს სამხარაულის ბიუროს ახალი პასუხი, რომელიც უწყებამ მარნეულის რაიონულ პროკურატურას 2021 წლის 12 მარტს გაუგზავნა.
დოკუმენტში ნათქვამია, რომ: "კომისიურ ექსპერტიზაზე მიმდინარეობს კვლევები სხვადასხვა სპეციალისტთან და მხარეებს დასრულებისთანავე ეცნობება“.
- რას ამბობს პროკურატურა საქმეზე
პროკურატურის პოზიცია ასეთია - საგამოძიებო უწყება ელოდება საქმის მთავარ მტკიცებულებას, კომისიური ექსპერტიზის დასკვნას, რომელმაც უნდა დაადგინოს რა გახდა ბავშვის გარდაცვალების მიზეზი.
"გაცნობებთ, რომ ლევან სამხარაულის სახელობის სასამართლო ექსპერტიზის ეროვნულ ბიუროში მიმდინარეობს სასამართლო სამედიცინო (კომისიური) ექსპერტიზა მახალ გურიანოვის გარდაცვალების ფაქტთან დაკავშირებით, რომელიც ჯერ არ დასრულებულა. მითითებულ საქმეზე გრძელდება გამოძიება და ამოწურვისთანავე მიღებულ იქნება შესაბამისი გადაწყვეტილება", - წერს მარნეულის რაიონული პროკურატურის პროკურორი გიორგი მექვაბიძე ადვოკატ დიმიტრი ნოზაძეს 2021 წლის 13 მარტით დათარიღებულ წერილში.
ადვოკატი დიმიტრი ნოზაძე მიიჩნევს, რომ საქმეში სახელმწიფო უწყებების გულგრილი დამოკიდებულება იკვეთება. მისი შეფასებით, საგამოძიებო უწყებები არ იჩენენ სათანადო ყურადღებას ისეთ ფაქიზ საკითხზე, როგორიცაა ბავშვის გარდაცვალების საქმე.
"ერთადერთი ფორმალური რეაგირება, რაც სახელმწიფოს მხრიდან ამ ბავშის გარდაცვალებას მოჰყვა, სამედიცინო რეგულირების სააგენტოს ქმედება იყო. სააგენტომ შეისწავლა ეს საქმე და სამი თვით შეუჩერა ლიცენზია ერთ ექიმს, რომელმაც ამ სანქციის ამოწურვის შემდეგ, ჩვეულებრივ განაგრძო საქმიანობა. რაც შეეხება გამოძიების ნაწილს, აშკარაა მათი მხრიდან გულგრილი დამოკიდებულება. არ იჩენენ სათანადო ყურადღებას. ის ფაქტი, რომ სამედიცინო რეგულირების საგენტომ თუნდაც ერთი ექიმის პროფესიული პასუხისმგებლობის საკითხი დააყენა, უნდა გამხდარიყო ნიშანი პროკურატურისთვის, რომ იქ რაღაც რიგზე ვერ იყო და უფრო ღრმად მოეკვლია და შეესწავლა ეს საქმე", - ეუბნება ambebi.ge -ს ადვოკატი.
გარდაცვლილი ბავშის მამა მომხდარში მარნეულის სამედიცინო ცენტრის ექიმებს ადანაშაულებს. რუზგარ გურიანოვი გამოთქვამს ეჭვს, რომ დამნაშავეებს ხელს აფარებენ და შეგნებულად აჭიანურებენ გამოძიების პროცესს.
"აბა, აქამდე რით ვერ დაადგინეს, რა მოხდა?! რატომ არ გვეუბნებიან, რითი მოგვიკვდა მახალი? ჯანმრთელი ბავშვი შევიყვანეთ და მკვდარი გამოგვატანეს. რამდენიმე დღე ვეხვეწებოდით თბილისში გადაგვეყვანა ბავშვი და არც ამის გაკეთება უნდოდათ. მოვითხოვთ დროულად გამოიძიონ საქმე და დაისაჯონ ის ექიმები, რომლებმაც ოპერაცია ჩაატარეს და ბავშვი მოკლეს“, - ამბობს რუზგარ გურიანოვი.
Ambebi.ge დაუკავშირდა შპს მარნეულის სამედიცინო ცენტრ "ადიკს“. კლინიკის ხელმძღვანელმა გვითხრა, რომ სამი წლის წინაც, როცა ეს ტრაგედია მოხდა, კლინიკას თავად ხელმძღვანელობდა. იგი დაგვპირდა, რომ მოგვიანებით დაგვიკავშირდებოდა და კომენტარს გააკეთებდა, თუმცა არაერთგზის მცდელობის მიუხედავად, ჩვენს ზარებს აღარ უპასუხა.
მარნეულში, მარნეულელი ექიმის საქმეს იძიებს მარნეულის განყოფილება. სადაც ყველა ერთმანეთის ნათესავია ამიტომაც არ დაიძრა საქმე.
3 წელი ექსპერტიზა? სირცხვილია !
აი, ეს არის ჩვენი ქვე-ყანა!