15 წლის ავღანელმა გოგონამ შინ შეჭრილი თავდამსხმელები დახოცა:  ვის ესროლა ნურიამ - თალიბან მებრძოლს, საკუთარ ქმარს თუ ორივეს?

15 წლის ავღანელმა გოგონამ, ნურიამ საკუთარ სახლში შეჭრილი სამი მამაკაციდან ორი AK-47 ტიპის იარაღით მოკლა, მესამესაც ესროლა, თუმცა თავდამსხმელი შემთხვევით გადარჩა.

ნურია გმირად გამოაცხადეს, მისი ისტორია შთამბეჭდავი ჩანს, თუმცა ამ ისტორიის სიღრმეები სევდიანია.

ვის ესროლა ნურიამ? თალიბანის თავდამსხმელებს, საკუთარ ქმარს თუ ორივეს?

ნურიას ამბავს BBC აქვეყნებს. სტატიის თავშივე აღნიშნულია, რომ უსაფრთხოების მიზნით ისტორიაში ნახსენები ყველა გმირის სახელი შეცვლილია...

ღამის წყვდიადი იყო, როდესაც უცხო კაცები სოფელში გამოჩნდნენ.

ნურიას თხრობით, დაახლოებით ღამის 1-ლი საათი იქნებოდა, როდესაც უცხო ადამიანებმა მისი მშობლების სახლის წინა კარი შეამტვრიეს. თინეიჯერი, რომელიც ხმაურმა გააღვიძა, მის საძინებელში იყო, ხმა არ ამოუღია, იგი თავის 12 წლის ძმაზე ფიქრობდა, რომელსაც გვერდით ეძინა.

შემდეგ გაიგო თუ როგორ გააღვიძეს თავდამსხმელებმა მშობლები და ეზოს განაპირას მდებარე მეორე სახლში შეიყვანეს.

შემდეგ იყო გასროლის ხმა...

• "მათ ჩემი მშობლები რაღაცის გამო დასაჯეს".

ნურია ავღანეთის ერთ-ერთ პატარა სოფელში გაიზარდა. გარეგნულად მორცხვი, ჩუმად მოლაპარაკე გოგონა თავისუფლად ისვრის სხვადასხვა სახის იარაღიდან. ნურიას მამა ბავშვობიდან თავდაცვის მიზნით, სროლაში ავარჯიშებდა.

იმ ღამეს, იმის ნაცვლად, რომ დამალულიყო, მოზარდმა აიღო მამის იარაღი - AK-47 და თავდამსხმელებს ცეცხლი გაუხსნა.

დაახლოებით ერთი საათის შემდეგ, მამაკაცებმა უკან დაიხიეს, ხმა აღარ ისმოდა. გარეთ ხუთი გვამი იყო: დედის, მამის, მოხუცი მეზობლის, რომელიც ასევე მისი ნათესავი აღმოჩნდა და ორი თავდამსხმელის.

”ეს საშინელება იყო... ისინი ისეთი სასტიკები იყვნენ. მამაჩემი შეზღუდული შესაძლებლობის მქონე იყო, დედაჩემი კი უდანაშაულო. მათ არაფრის გამო მოკლეს ისინი", - ამბობს ნურია.

ავღანეთში გაზრდილმა თინეიჯერებმა, ნურიას მსგავსად, ომზე ყველაზე ბევრი იციან. სამთავრობო ძალებსა და თალიბებს შორის მიმდინარე კონფლიქტი 25 წელზე მეტი ხნის განმავლობაში მიმდინარეობს.

თალიბების მიერ იმ ოჯახების დარბევა, რომლებიც სამთავრობო ძალებს ემხრობიან, უცხო არ არის. მოზარდის უფროსი ძმა სამხედრო პოლიციის თანამშრომელია, ნურიას თქმით, მისი მამა ტომის უხუცესი და პროსამთავრობო თემის ლიდერი იყო, ამიტომ მეამბოხეების სამიზნე გახდა.

სამი კვირის შემდეგ, თავდასხმისა და მის გარშემო არსებული გარემოებების შესახებ მრავალი ანგარიში იქნა შედგენილი - ნურია, მისი უფროსი ძმა, დაღუპულთა ოჯახის წევრები, ადგილობრივი პოლიცია, ადგილობრივი უხუცესები, თალიბების წარმომადგენლები და ავღანეთის მთავრობა, ყველა სხვადასხვა ვერსიას ჰყვება.

ერთ-ერთი ვერსიით, იმ ღამით ერთ-ერთი თავდამსხმელი სინამდვილეში ნურიას ქმარი იყო, ხოლო გოგოს გმირული ამბავი, რომელიც თალიბებს ებრძოდა, იყო ოჯახური დავა.

კონფლიქტური მხარეების მიკერძოებულობა სიმართლის დადგენას თითქმის შეუძლებელს ხდის. თუმცა ადვილი დასანახია ის ტრაგიკული რეალობა, რაც ავღანეთში ხდება. ახალგაზრდა ქალები ძალადობის მსხვერპლნი ხშირად ხდებიან. მათ არ აქვთ განათლების მიღების საშუალება და უფლება, ვერავისთან ჰყვებიან იმის შესახებ, თუ როგორ ძალადობენ მათზე.

ერთადერთი საკითხი, რაზეც ყველა მხარე თანხმდება არის ის, რომ ოჯახზე თავდასხმა მართლაც მოხდა.

თალიბებმა უარყვეს თინეიჯერ გოგონასთან შეტაკება, მათ დაადასტურეს, რომ იმ ღამით, იმავე სოფელში მოხდა დარბევა.

ადგილობრივი მთავრობის წარმომადგენლებმა თალიბებზე შეტევის გამო ნურია "ნამდვილ გმირად" გამოაცხადეს.

ნურია და მისი უმცროსი ძმა სამხედრო თვითმფრინავით დაცულ ადგილას გადაიყვანეს. სოციალური მედია კი 15 წლის გოგონას ისტორიამ "ააფეთქა". ყველა წერდა გმირის შესახებ, რომელმაც ოჯახი დაიცვა.

ავღანეთში პრეზიდენტის მხრიდან მოსახლეობის მხარდამჭერი განცხადებები უცხო არ არის, მაგრამ მას შემდეგ, რაც პეზიდენტმა აშაფ განმა ნურია ქაბულში მიიწვია, რეაქციები არაერთგვაროვანი იყო.

ნაწილის თქმით, იგი გმირია, ნაწილი კი აღნიშნავს რომ ის უბრალოდ ბავშვია, რომელიც ორ დაპირისპირებულ მხარეს შორის მოჰყვა.

გარდაცვლილების სხეულზე მაიდენტიფიცირებელი ბარათები აღმოაჩინეს, ორივე მათგანი თალიბი მებრძოლი იყო. მესამე თავდამსხმელი, რომელიც დაიჭრა, მაგრამ გადარჩა, თალიბანის დაჯგუფების ხელმძღვანელი, საიდ მასოუმია.

ნურია და მისი 12 წლის ძმა დედაქალაქში, პრეზიდენტის სასახლეში იმოფებოდნენ.

• შეტაკებიდან რამდენიმე კვირის შემდეგ გავრცელდა ვერსია, რომ გარდაცვლილებს შორის ერთ-ერთი ნურიას ქმარია.

ოჯახის წევრებმა და ადგილობრივმა წყაროებმა BBC- ს განუცხადეს, რომ ნურიას ქმარი რაჰიმი სოფელში ჩავიდა, რათა ცოლი სახლში დაებრუნებინა. მოზარდი მამამ ძალადობის გამო ქმარს გამოარიდა. წყაროს თქმით, ქმარი თალიბების შვილობილი იყო და სახლში თალიბების "ბოევიკებთან" ერთად მივიდა.

ნურია გათხოვებას უარყოფს.

BBC ნურიას ე.წ. ქმრის, რაჰიმის დედას ესაუბრა, რომელიც შაფიკა ნიმრუზის პროვინციაში, ავღანეთის სამხრეთ - დასავლეთ ნაწილში, მეუღლესთან და ორ შვილთან ერთად ცხოვრობს. შაფიკამ დაადასტურა, რომ ნურია მის ვაჟს ცოლად გაჰყვა სამი წლის წინ. ანუ გამოდის, რომ ნურია გათხოვების დროს 12 წლის იყო.

მან ისიც დაადასტურა, - რაჰიმი თავდასხმის ღამით, ნურიას სახლში წავიდა, მაგრამ მკვლელობის განზრახვა არ ჰქონიაო...

"ნურიას მამა ძლიერი და შეძლებული კაცი იყო. ჩვენ ღარიბები ვართ. ჩემი შვილი ღამით კი არა, საღამოს საათებში, ნურიას მამის მიწვევით მივიდა მათთან სახლში. მათ განქორწინების საკითხები უნდა განეხილათ", - აცხადენს რაჰიმის დედა.

BBC- სთან საუბარში მან ასევე უარყო, რომ მისი შვილი თალიბანის წევრი იყო.

სიმართლე რამდენიმე ადამიანმა იცის, თუმცა ისინი არ ლაპარაკობენ. ნურიამ და პატარა ძმამ მშობლები უკვე დაკრძალეს. ასეთი ისტორიები პროტესტს იწვევს, თუმცა ძირეულად არაფერი იცვლება. ავღანეთში ყოველთვიურად ასობით უდანაშაულო ადამიანს კლავენ. ნურიას მსგავსად ბევრი უდანაშაულო ქალი და შვილია. ისინი ხმას ვერ იღებენ. მათ აქვთ შეზღუდული ხმა და თავისუფალი ნება. წყარო

ავტორი: თეონა რამაზაშვილი