მიხეილ სააკაშვილის საპრეზიდენტო ბიბლიოთეკაში ხანძარი გაჩნდა - რას წერს ყოფილი პრეზიდენტი ინციდენტზე

თბილისში, მიხეილ სააკაშვილის საპრეზიდენტო ბიბლიოთეკაში ხანძარი გაჩნდა. როგორც AMBEBI.GE-ს საგანგებო სიტუაციების სამსახურში განუცხადეს, ხანძარი ამ დროისთვის ლოკალიზებულია და შემთხვევის შედეგად არავინ დაშავებულა.

"ცეცხლი 15 კვადრატულ მეტრზე საოფისე ინვენტარს ეკიდა. ადგილზე 4 სახანძრო სამაშველო ბრიგადა მუშაობდა“, - აცხადებენ საგანგებო სიტუაციების სამსახურში.

ინციდენტს "ფეისბუქის" პირად გვერდზე ეხმაურება საქართველოს ყოფილი პრეზიდენტი და ნახანძრალი ბიბლიოთეკის ფოტოებსაც აქვეყნებს:

"დღეს დილით, როდესაც ქუჩაში პრაქტიკულად არავინ არ იყო და ხალხი დღესასწაულს აღნიშნავს, "სააკაშვილის საპრეზიდენტო ბიბლიოთეკის" პირველ სართულზე გაჩნდა ხანძარი და ეს იმ პირობებში, როდესაც დენი ბიბლიოთეკაში გათიშული იყო და სადენები პრინციპში არ უნდა აალებულიყო.

"სააკაშვილის საპრეზიდენტო ბიბლიოთეკა" ბოლო ხანებში ძალიან აქტიურია ნიღბების და სადეზინფექციო საშუალებების დარიგების კუთხით და ბევრჯერ მოხვდა ახალ ამბებში და რა თქმა უნდა, აღიზიანებს ქვეყნის "მფლობელებს"! იმედია, ეს ინციდენტი კარგად იქნება გამოძიებული, თუ ახლა არა, ამათი შემოდგომაზე მოშორების შემდეგ აუცილებლად დავადგენთ, რა მოხდა ზუსტად" - წერს მიხეილ სააკაშვილი.

საპრეზიდენტო ბიბლიოთეკაში ხანძრის გაჩენის ფაქტთან დაკავშირებით გამოძიება დაიწყო. როგორც „ინტეპრესნიუსს“ შსს-ში განუცხადეს, გამოძიება 187-ე მუხლის მე-2 ნაწილის ა ქვეპუნქტით მიმდინარეობს, რაც ცეცხლის წაკიდებით სხვისი ნივთის დაზიანებას გულისხმობს, რამაც მნიშვნელოვანი ზიანი გამოიწვია.

შსს-ში აცხადებენ, რომ ამ დრომდე მომხდართან დაკავშირებით არავინ დაუკავებიათ და მიმდინარეობს საგამოძიებო მოქმედებები.