როგორ ვიმოგზაუროთ სხვა სამყაროებში ანუ ტოპ 5 წიგნი სადღესასწაულო დღეების გასამრავალფეროვნებლად

ახალი წელი ჯადოსნობის, ახალ სამყაროებში მოგზაურობის და საკუთარ თავზე ზრუნვის დროა. საახალწლო სუფრისა და მეგობრებთან გართობის შემდეგ თავისუფალ დროს წიგნის კითხვას თუ დაუთმობთ, მერწმუნეთ, ეს თქვენს დღეებს კიდევ უფრო საინტერესოს და ზღაპრულს გახდის. ხომ გახსოვთ „ყოველი ახალი წიგნი თვალწინ გვიშლის ახალ სამყაროს“.

თუკი ახალი წლის გატარებას „ჯერ სახლში და მერეც სახლში“ აპირებთ, წიგნი თქვენთვის ისეთივე აუცილებელია, როგორც სანტასთვის მარხილი.

აღარაფერი ვთქვათ იმაზე, რომ წიგნი ყველა დროის საუკეთესო საჩუქარია, რადგან ამით ადრესატს სხვა სამყაროში მოგზაურობის შანსს და წარუშლელ ემოციებს სთავაზობთ.

სინამდვილეში კი წიგნების არჩევა მარტივი არაა. ამ ბლოგში არჩევანი ქართველი თანამედროვე ავტორების წიგნებზე შევაჩერე. ისინი სამყაროს ისევე ხედავენ, როგორც ჩვენ. შესაბამისად, მათი მონათხრობი ისტორიები ჩვენთვის ბევრად უფრო გასაგებია, ვიდრე უცხოელების. მათი ისტორიები კი სულ სხვა სამყაროებს გვაჩვენებს, რომლებიც შესაძლოა, ჩვენ გვერდით ვითარდება, მაგრამ ამაზე არაფერი ვიცით.

მაშ ასე - ტოპ 5 წიგნი საჩუქრად და სადღესასწაულო განწყობის ასამაღლებლად:

ნიკოლას მაჩაბელი - "ჩაინა კონტრასტებიდან"

ნიკოლას მაჩაბელი, კონკურსის "გახდი ბესტსელერის ავტორი 2019"-ის გამარჯვებულია. მისი წიგნი ჟიურის რჩეული გახდა. ნაწარმოები „ჩაინა კონტრასტებიდან“ ქართველი ემიგრანტის მისტიკითა და მოულოდნელობებით სავსე ჩინურ გამოცდილებას აღწერს, მკითხველს უამბობს, რას ნიშნავს დარჩე მარტო უცხო გარემოში, აბსოლუტურად განსხვავებულ სამყაროში, რომელთანაც არაფერი გაკავშირებს.

ნანი მანველიშვილი - "ოდისევსის სინდრომი"

კონკურსის ფარგლებში, ხალხის რჩეული გახდა ნანი მანველიშვილი, რომლის რომანი "ოდისევსის სინდრომი" მკითხველს ემიგრაციასა და სამშობლოსგან შორს ყოფნის ტკივილზე მოუთხრობს.

სად არის გამოსავალი? ეს შეკითხვა არ დაგტოვებთ არც კითხვისას და არც მისი დასრულების შემდეგ, რადგან ეს წიგნი ემიგრანტების ცხოვრების შეულამაზებელი ასახვაა. თქვენ წინაშეა წიგნი უცხო ქვეყნებში გადახვეწილ დედებზე, ცოლებზე, დებზე, რომლებიც თავს დასტრიალებენ სხვების შვილებს, რათა საკუთარი შვილებისთვის პურის ფული გამოიმუშაონ, ებრძვიან გაუსაძლის მონატრებას, უვლიან დავრდომილ მოხუცებს... ეს არის წიგნი მივიწყებულ ოცნებებზე, მახინჯ სტერეოტიპებზე, სიღარიბეზე, უმომავლობაზე. წიგნის მთავარი გმირი რთულ არჩევანს აკეთებს და უკეთესის იმედით სამშობლოდან მიდის, გარკვეული დროის შემდეგ კი უჭირს, გაერკვეს, სწორად მოიქცა თუ არა. ამაზე დაფიქრდება მკითხველიც.

თამარ გოდერიძე - "ყვავილები სახლთან ახლოს"

ახალგაზრდა ქალის, მარტოსული კესანეს ცხოვრებაში დგება ურთულესი მომენტი, რაც მის ბავშვობასთან, მის დიდ და ერთადერთ სიყვარულთან კვლავ შეხვედრას განაპირობებს. და აქედან იწყება ახალი ეტაპი, ახალი გზა სრულიად სხვა ქვეყნისკენ, სხვა ცხოვრებისკენ. კესანეს და რონეს საფრანგეთში დიდი წარმატებები ელოდებათ, დიდი სიყვარული და დრამატული მოვლენები...

თამარ გოდერიძის "ყვავილები სახლთან ახლოს" ხალხის რჩეულია.

არჩილ ფირიაშვილი - "ფეხბურთის მოთამაშე"

არჩილ ფირიაშვილი ჟიურის რჩეულია. მისი წიგნის მთავარი თემა ამბოხია - იმ ადამიანის ამბოხი, რომელიც ვეღარ იტანს სიყალბეს და გაურბის მას.

ერთ მშვენიერ დღეს კაცს წარმატებულს, ყველანაირ მიზანმიღწეულს შეიძლება თვალი აეხილოს და დაინახოს, რომ ეს საათივით აწყობილი ცხოვრება არის მხოლოდ სხვის დასანახად. სწორედ აქ იწყება პიროვნული ჯანყი და სულიერი კრიზისი, თავს წამოყოფს ბავშვობის ტრავმები. და ნიკიც მიატოვებს ყველას და ყველაფერს, ხეტიალისას კი საოცარ აღმოჩენებს აკეთებს, პოულობს ნამდვილ ადამიანებს, რაც მთავარია _ საკუთარ თავს.

თინათინ ბერიძე - "მოპარული სიყვარული"

ზოგჯერ ასეც ხდება _ შემთხვევითობამ ან უწყინარმა ხუმრობამ შეიძლება სრულიად შეცვალოს თქვენი ცხოვრება. სწორედ ამგვარად გადაიკვეთა არაჩვეულებრივი, ნიჭიერი, მგრძნობიარე ახალგაზრდების გზები. წიგნის მოყვარულთა მიერ ამოჩემებული პატარა, მყუდრო კაფეს ირგვლივ განვითარებული დიდი სიყვარულის ამბავი, სიკეთით სავსე დრამატული მოვლენები _ ასეთია წიგნი, რომელიც გულგრილს არავის დატოვებს და რომლის ავტორი "პალიტრა L"-ის მიერ მოწყობილი ლიტერატურული კონკურსის გამარჯვებულია.