წიგნი, რომლის სრული ტირაჟი რამდენიმე დღეში გაიყიდა
თამარ მეფე საქართველოს ისტორიაში უპრეცედენტო მოვლენა იყო. ახლა კი, საუკუნეების შემდეგ, ასევე, უპრეცედენტოა სამეცნიერო-პოპულარული წიგნის "თამარ მეფის" გაყიდვები. გამომცემლობა "პალიტრა L"-მა წიგნი გაზეთ "კვირის პალიტრასთან" ერთად გაუშვა გაყიდვაში, რამდენიმე დღეში კი წიგნის ყიდვის მსურველებს, პრესის ჯიხურების დატოვება იმედგაცრუებულებს უწევდათ, რადგან ტირაჟი უკვე სრულად იყო გაყიდული.
საბურთალოს ქუჩაზე მდებარე "ელვა მარკეტის" წარმომადგენლის დავით ჩერქეზიშვილის თქმით, მსგავსი მოთხოვნა მას არცერთ წიგნზე არ ახსოვს.
"მიღებული რაოდენობა პირველივე დღეს, სულ რაღაც რამდენიმე საათში გავყიდე. თუმცა, ჩემი ერთგული მომხმარებლების უზრუნველყოფა ვერ მოვახერხე. იმ დღესვე დავრეკე გამომცემლობაში და შეკვეთის გაორმაგება მოვითხოვე, მაგრამ უარი მივიღე, რადგან წიგნი ყველა ჯიხურში ასეთი წარმატებით გაყიდულა. როგორც ამბობენ, "თამარ მეფე" მეორე ტირაჟით გამოვა და კიდევ ვაპირებ მის აღებას. მახსოვს წლების წინ," 50 წიგნი, რომელიც უნდა წაიკითხო, სანამ ცოცხალი ხარ" მეტად მოთხოვნადი იყო, მაგრამ "თამარ მეფემ" ყოველგვარი რეკორდი მოხსნა," - განმარტავს დავით ჩერქეზიშვილი.
საქართველოს მეფეებზე არაერთი წიგნი გამოცემულა, თუმცა "პალიტრა L"-ის პროექტი, რომელიც საქართველოს 28 მეფეს "ქართველი მეფეების" 24 ტომეულში აერთიანებს, განსაკუთრებულია. გამოცემების ფარგლებში, მკითხველი გაეცნობა ამა თუ იმ ეპოქის საქართველოს საშინაო და საგარეო პოლიტიკურ ვითარებას, მეფეების პიროვნულ თვისებებსა და მნიშვნელოვან ფაქტებს, რომლებმაც საქართველოს ისტორიაში გარდამტეხი როლი შეასრულეს. აღსანიშნავია, რომ სერიაზე ცნობილ მეცნიერთა ჯგუფმა იმუშავა.
და მაინც, რით არის გამორჩეული სერიის პირველი წიგნი "თამარ მეფე"? ამ კითხვით პროექტის მენეჯერს ჯაბა სამუშიას მივმართეთ.
"ეს არის როინ მეტრეველის ძალიან მნიშვნელოვანი ნაშრომი, რომელზეც ავტორი ათწლეულების მანძილზე მუშაობდა. როინ მეტრეველმა მე-20 საუკუნის 70-იან წლებში დაიწყო თამარ მეფის ისტორიაზე მუშაობა. მისი კვლევის პირველი სტატიის თემა იყო თამარ მეფე ხალხურ შემოქმედებაში. ამ სტატიის გამოქვეყნების შემდეგ დაიწყო ავტორზე შეტევა საბჭოთა კავშირის ცენტრალურ გაზეთებში და ამასვე შეეწირა მისი პოლიტიკური მოღვაწეობა.
საბჭოთა კავშირის კომუნისტური პარტიის იდეოლოგიური განყოფილების გამგის მოადგილემ იაკოვლევმა გამოაქვეყნა კრიტიკული წერილი იმ მეცნიერების მიმართ, რომლებიც "მოძმე რესპუბლიკებში" მოღვაწეობდნენ და მათი საქმიანობის მთავარი მიმართულება ეროვნული საკითხები იყო. საქართველოდან ამ სიაში როინ მეტრეველი და უშანგი სიდამონიძე მოხვდნენ. ამის შემდეგ მან თამარის ბიოგრაფიაზე მუშაობას, ფაქტობრივად, თავი დაანება და მხოლოდ 80-იან წლებში გამოჩნდა ნაშრომი. სწორედ ამ წიგნის სამეცნიერო-პოპულრული ვარიანტია "პალიტრა L-ის" გამოცემა "თამარ მეფე". წიგნის ენა ყველასთვის გასაგები და მარტივად აღსაქმელია. ამანაც განაპირობა ასეთი უპრეცედენტო მოთხოვნა. სერიის 24 წიგნიდან 17 სპეციალურად პროექტისთვის იწერება. მათზე თანამედროვე აკადემიკოსები და პროფესორები მუშაობენ. შედეგად საზოგადოება მიიღებს სანდო წიგნებს, რომელშიც ეჭვი არავის შეეპარება. ფაქტობრივად, საქართველოს ისტორიის საგანძურია" - განმარტავს სამუშია.
ნაშრომში საინტერესოდაა გადმოცემული თამარის მოღვაწეობა, პარლამენტის შექმნის ისტორია, შამქორისა და ბასიანის ბრძოლები, თამარი ხალხურ წარმოდგენებში, იმ პერიოდის ხალხის ყოფა, ადმინისტრაციული მოწყობა. ეპოქის ყველა დეტალი ყველასთვის გასაგებადაა გადმოცემული.
წიგნის მაღალი ღირებულებისა და დიდი მოთხოვნიდან გამომდინარე, გამომცემლობა "პალიტრა L"-მა გადაწყვიტა, "თამარ მეფე" მეორე ტირაჟით გამოუშვას. "პალიტრა L-ის" მარკეტინგის სამსახურის ხელმძღვანელის ნათია მეტრეველის განმარტებით, ის სერიის მეორე ტომთან ერთად გაიყიდება.
"ველოდით, რომ გამომცემლობის ახალ პროექტს - "ქართველი მეფეები" მკითხველი ინტერესით ელოდებოდა, თუმცა წიგნის დაბეჭდვიდან რამდენიმე საათში ასეთმა მაღალ აქტივობამ და სულ სამ დღეში ტირაჟის სრულად გაყიდვამ ყოველგვარ მოლოდინს გადააჭარბა.
გამომცემლობაში მკითხველების სატელეფონო ზარები არ წყდება, რომლებიც ითხოვენ მიეცეთ წიგნის ყიდვის შესაძლებლობა. ბუნებრივია, ჩვენ ყოველთვის ვითვალისწინებთ მკითხველების ინტერესებს, ამიტომაც გადავწყვიტეთ, "თამარ მეფეს" ტირაჟი ხელახლა დავბეჭდოთ, რომელიც სერიის მეორე ტომთან ერთად გაიყიდება. გვიხარია, რომ მკითხველებში ასეთი ინტერესია საქართველოს მეფეების მიმართ, თანაც წიგნში სულ სხვა კუთხითაა შემოთავაზებული ფაქტები, რომლებზეც შესაძლოა ადრე მხოლოდ ზედაპირული ინფორმაცია გვქონდა და ნაკლებ მნიშვნელობას ვანიჭებდით. შესაძლოა, სწორედ ამანაც განაპირობა მკითხველებში სერიის მიმართ ასეთი მასშტაბური ინტერესი," - განმარტავს ნათია მეტრეველი.
წიგნის მეორე ტირაჟით გამოსვლას მოუთმენლად ელოდება საზოგადოების დიდი ნაწილი. მათ შორისაა 20 წლის დათო კიპაროიძეც, რომელიც ისტორიის ფაკულტეტზე სწავლობს და აღნიშნულ სერიას მისთვის განსაკუთრებული ღირებულება აქვს.
"მახსოვს, ძალიან პატარა ვიყავი, როცა მამა საქართველოს ისტორიას მიკითხავდა. ისტორიის სიყვარული მოზრდილობის ასაკშიც გამომყვა. თუმცა ყოველთვის ერთი პრობლემის წინაშე ვიდექი. არ არსებობს წიგნები ქართველ მეფეებზე, სადაც მათი ბიოგრაფია პოპულარულ ენაზეა გადმოცემული. "პალიტრა L"-მა ეს ყველაფერი ხელმისაწვდომი გახადა. სერიის ყველა წიგნის ყიდვას ვაპირებ," - ამბობს დათო კიპაროიძე.
"თამარ მეფე" 26 თებერვალს სერიის მეორე ტომთან ერთად ბაგრატ III-სთან ერთად გამოვა. "კვირის პალიტრასთან" ერთად მისი ფასი 5,5 ლარი იქნება.
ნანა მღებრიშვილი
ახალგაზრდებისთვის საინტერესო ამბები!
_2019-10-07_pcZAK5dDPSlBIBs.jpg)
შოთა რუსთაველის გაციფრულებული პორტრეტი და „ვეფხისტყაოსნით“ შთაგონებული კოლექცია
