"თიბისი ბანკი" მთის კურორტების განვითარებას აგრძელებს

"თიბისი ბანკი" მთის კურორტების განვითარების კომპანიის მხარდაჭერას 5-წლიანი პარტნიორობის ფარგლებში განახორციელებს. თანამშრომლობა სამთო კუროტებზე გადახდის ინოვაციური სისტემების შექმნასა და ინფრასტრუქტურის განვითარებას გულისხმობს. სიახლით სამთო დამსვენებლები ამ სეზონიდან უკვე ისარგებლებენ.

თიბისი ბანკის სამეთვალყურეო საბჭოს თავმჯდომარის მამუკა ხაზარაძის თქმით, ეს არის გრძელვადიანი და მრავლისმომცველი თანამშრომლობა.

"ჩვენ საქართველოს ყველა სამთო კურორტზე ვახორციელებთ ინვესტიციას. ჩვენი სხვა კომპანიის (რომელიც ბანკთან კავშირში არ არის) ინვესტიცია კოხტა-მიტარბის კურორტზე 100 მილიონი დოლარია. ამ ეტაპზე 15-20 მილიონი უკვე ჩადებულია. 25 დეკემბერს კურორტზე მეორე ეტაპის გახსნა მოხდება. პირველი ფაზა სრულად მომავლ წელს დასრულდება. საბოლოოდ, 5-7 წლიან პერსპექტივაში მიტარბი 2 000 საწოლიანი კურორტი იქნება. კოტხა-მიტარბი გახდება მსოფლიო დონის კურორტი, სადაც საქართველოსთვის სრულიად ახალი კონცეფცია ამუშავდება," - განაცხადა მამუკა ხაზარაძემ.

აღნიშნული კონცეფცია გულისხმობს იმას, რომ ყველაფერი, რაც ადამიანს სჭირდება, ტრანსპორტით გადაადგილების გარეშე იქნება ხელმისაწვდომი. მათ შორის იქნება სასტუმროები, კაფეები, რესტორნები, ღამით გართობის საშუალებები, საბაგირო, მაღაზიები. ბიზნესმენის განმარტებით, კურორტის დაგეგმარება სტანდარტის ბოლო მიღწევის შესაბამისად კეთდება. გენერალური გეგმა ფრანგულმა მხარემ შეიმუშავა.

"უნიკალური შანსი გვაქვს, რომ ჯერ სივრცული დაგეგმარება მოხდეს და მერე დაიწყოს ინფასტრუქტურის მშენებლობა. უამრავი გეგმა გვაქვს. ვფიქრობთ, რომ სოფელ მიტარბში საერთოდ აიკრძალოს სამანქანო მიმოსვლა. ასეთი კურორტი საფრანგეთში უკვე არსებობს. ვფიქრობთ, რომ იყოს მხოლოდ საბაგირო და ელექტრომობილები. რამდენიმე წელიწადში სოფელი მიტარბი იქნება ერთ-ერთი საუკეთესო მაგალითი იმისა, თუ როგორი უნდა იყოს 21-ე საუკუნის სამთო კურორტი," - განაცხადა მთის კურორტების განვითარების კომპანიის დირექტორმა ალექსანდრე ონოფრიშვილმა.

ინფრასტრუქუტურის გამართვის პარალელურად, "თიბისი ბანკის" მხარდაჭერით ზამთრის ყველა კურორტზე გადახდის სისტემა გაუმჯობესდება. ხელმისაწვდომი იქნება ახალი ბარათები - Multi Card, რომელიც საბაგიროთი მოსარგებლე ადამიანებს საშუალებას მისცემს, რიგში დგომის გარეშე, დისტანციურად - ინტერნეტბანკით, ბარათით ან ფეიბოქსით გადაიხადონ საბაგიროს ბილეთის ღირებულება.

მალე Multi Card-ზე ანგარიშის შევსება თიბისი ფეის აპარატებითაც გახდება შესაძლებელი. წელს 10 დეკემბერს ოფიციალურად გაიხსნება გუდაურის, ბაკურიანის და გოდერძის სათხილამურო კურორტები. 24 დეკემბერს გაიხსნება სვანეთში თეთნუდლის კურორტი. 25 დეკემბერს კი ბაკურაინი-მიტარბის კურორტი ახალი სათხილამური გზებითა და ახალი ინფრასტრუქტურით დაელოდება დამსვენებლებს. წელს ერთდროულად 9 ახალი საბაგირო აშენდა საქართველოს მასშტაბით. მათ შორის სამი გუდაურშია.

ნანა მღებრიშვილი

AMBEBI.GE

(R)