ოლეგ მელნიკოვთან კიდევ ერთი საპროცესო შეთანხმება გაფორმდა

ე.წ. მოდულის შენობაში სამი პოლიციელის ცემის საქმეზე ოლეგ მელნიკოვს აღიარებითი ჩვენების სანაცვლოდ საპროცესო შეთანხმება გაუფორმდა.

თბილისის სააპელაციო სასამართლოს მოსამართლე მზია ლომთათიძემ პროკურატურის შუამდგომლობა დააკმაყოფილა და ოლეგ მელნიკოვს აღნიშნულ საკითხზე ორი წლით პატიმრობა და დამატებით ორი წლით გამოსაცდელი ვადა, ანუ პირობითი მსჯავრი დაედო. მოსამართლემ დააკმაყოფილა საპროცესო შეთანხმება და აღნიშნა, რომ მელნიკოვი აღნიშნულ საქმეზე დამნაშავედ არის ცნობილი, სისხლის სამართლის კოდექსის 333-ე მუხლით, რაც სამსახურებრივი უფლებამოსილების გადამეტებას გულისხმობს.

აღნიშნული მუხლის საფუძველზე, კუდი-ს ყოფილ ყოფილ მაღალჩინოსანს 5 წლით თავისუფლების აღკვეთა შეეფარდა, თუმცა ამნისტიის საფუძველზე პატიმრობა 3 წლითა და 9 თვით განესაზღვრა. საპროცესო პირობების თანახმად კი, იგი მხოლოდ 2 წელს გაატარებს საპყრობილეში, დანარჩენი 1 წელი და 9 თვე კი იქნება მეთვალყურეობის ქვეშ.

დღევანდელ სასამართლო პროცესზე, სადაც საპროცესო შეთანხმება გაფორმდა, თავად ბრალდებული მელნიკოვიც იმყოფებოდა, რომელსაც მასთან ერთად ამ საქმეში ბრალდებულ დათა ახალაიას ადვოკატ ირაკლი ზაქარეიშვილთან შელაპარაკება მოუვიდა. კერძოდ, ზაქარეიშვილმა გაიხსენა მელნიკოვის განცხადებები, რომ მისი ოჯახის წევრების მიმართ ზეწოლა ხორციელდებოდა. როგორც ადვოკატმა აღნიშნა, რომ მელნიკოვის დედა დააკავეს და მისი შვილიც მისცეს პასუხისგებაში, რის შემდეგაც მელნიკოვმა აღიარა დანაშაული. ადვოკატმა აღნიშნულ გარემოებაზე მოსამართლის ყურადღების მიქცევა ითხოვა. მელნიკოვმა კი ადვოკატს მოუწოდა, რომ მის საქმეში ნუ ჩაერეოდა.

"ეს ჩემი პრობლემაა, იყო თუ არა დედაჩემი დაკავებული. ჩემი ოჯახის საქმეა და ნუ ჩაერევა ნურავინ. მე აქ მოვედი სიმართლის სათქმელად", - განაცხადა ოლეგ მელნიკოვმა.

მელნიკოვთან საპროცესო შეთანხმება გირგვლიანის მკვლელობის საქმესთან დაკავშირებით მიცემული აღიარებითი ჩვენების სანაცვლოდაც გაფორმდა.

"ინტერპრესნიუსი"