26
აპრილიდღის ზოგადი ასტროლოგიური პროგნოზი
ლელა მებურიშვილი მაყურებელმა ქართული სერიალებიდან გაიცნო. როგორც თვითონ ამბობს, მას კარიერის დასაწყისშივე გაუმართლა და ეკრანზე გამოჩნდა. დღეს ცნობილი მსახიობი და ტელეწამყვანია. ცოტა ხნის წინ ლელა გაბედნიერდა და თავისი ცხოვრება ბაჩო საგანელიძეს - პარლამენტარ დავით საგანელიძის ძმისშვილს დაუკავშირა.
- ძალიან პატარა ვიყავი, ინსტიტუტი რომ დავამთავრე და ბატონ ლევან წულაძესთან მოვხვდი - თეატრალურ სარდაფში. შესანიშნავი პერიოდი იყო, უდარდელი, უამრავი მეგობარი შევიძინე. ისე დაემთხვა, რომ მაშინაც ძალიან ბევრი საქმე მქონდა. არაერთ სპექტაკლში ვმონაწილეობდი. მერე ტელესერიალშიც მოვხვდი, იყო ასეთი სერიალი "საპონი". ეს პირველი სერიალი იყო ჩემთვის.
- შენს ბოლო სერიალზე, "ჩემი ცოლის დაქალებზე" რას იტყვი, განახლდა გადაღებები?
- გადაღებები არ დაგვიწყია. ისე, წინასწარ არასოდეს ვიცით, რა მოხდება თუნდაც შემდეგ სერიაშიც კი. ალბათ ერთ კვირაში განვაახლებთ მუშაობას.
- ვინ არის ადამიანი, ვის აზრსაც ყოველთვის ითვალისწინებ კარიერაში და პირად ცხოვრებაშიც?
- უამრავი ახლობელი, მეგობარი და ოჯახის წევრი მყავს, რომელთა აზრიც ჩემთვის ძალიან მნიშვნელოვანია. ნებისმიერი გადაწყვეტილების მიღებამდე მათ აზრს ყოველთვის ვეკითხები. თუმცა საბოლოოდ მაინც ჩემი აზრია მნიშვნელოვანი, რადგან მე ყველაზე უკეთ ვიცი, იმ კონკრეტულ შემთხვევაში როგორ უნდა მოვიქცე.
- როგორია ეკრანს მიღმა ლელა მებურიშვილის ერთი ჩვეულებრივი დღე?
- მეტწილად ძალიან დაკავებული ვარ - რეპეტიცია, გადაღება, სპექტაკლი... მაგრამ ახლა ბედნიერი დღეები მაქვს, შედარებით თავისუფალი გრაფიკი დასვენების საშუალებას მაძლევს და ამით ვტკბები.
- როგორ ატარებ თავისუფალ დროს?
- რა თქმა უნდა, მეუღლესთან ერთად.
- ვიცი, რომ პირად ცხოვრებაზე ლაპარაკი არ გიყვარს, მაგრამ იქნებ გვითხრა, როგორ გაიცანი მომავალი მეუღლე და როგორ დაიწყო თქვენი სიყვარულის ისტორია?
- პირადი ცხოვრების შესახებ თუ რამე მითქვამს, უმრავლეს შემთხვევაში არასწორად იყო აღქმული, ჩემთვის პირადი ცხოვრება ყველაზე მნიშვნელოვანი და სათუთია. იმიტომაც აღარ ვლაპარაკობ, რომ მერე გული არ მეტკინოს. მხოლოდ ის შემიძლია ვთქვა, რომ ძალიან ბედნიერი ვარ. კარგად ვგრძნობ თავს და ვუფრთხილდები იმას, რაც მაქვს...
- რა სიახლეებია შენს შემოქმედებაში?
- ჯერჯერობით არაფერი. კარგი იქნება, რამე ახალი თუ გამოჩნდება.
- როგორ უვლი თავს, რაიმე განსაკუთრებული მეთოდი თუ გაქვს?
- პირველ რიგში, ვცდილობ, ჯანსაღად ვიკვებო. არ ვეწევი, ეს კი როგორც ქალის, ასევე მამაკაცის გარეგნობისთვის ძალიან მნიშვნელოვანია. სამწუხაროდ, ვარჯიშს ვერ ვახერხებ, არადა, კარგი იქნებოდა. ასეთ დიდ დროს არ ვუთმობ ჩემს გარეგნობას.
- რას ურჩევდი დამწყებ მსახიობებს?
- წარმატების რეცეპტი არ არსებობს. ნებისმიერ სფეროში აუცილებელია შრომა, ენერგია და შემართება. და კიდევ, მაყურებლისთვის ყოველთვის შესამჩნევია მსახიობის განწყობა. არ უნდა იყო დაბოღმილი და ვიღაცის წარმატება არ უნდა გაღიზიანებდეს. მხოლოდ ასეთ შემთხვევაში ესიამოვნებათ შენი ყურება ეკრანზე. თუმცა უნდა გაგიმართლოს კიდეც.
- რომელია შენი საყვარელი როლი?
- ყველა როლში, რომელზეც ვმუშაობ, დიდ ენერგიას ვდებ და საბოლოოდ ყველა მიყვარს.
- თუ გაქვს საოცნებო როლი, რომელიც ჯერ არ შემოუთავაზებიათ?
- საოცნებო როლი არა მაქვს, თუმცა, მხატვრული ლიტერატურის კითხვისას რომელიმე გმირის თამაში მომინდება ხოლმე და წარმოვიდგენ გადაღებების პროცესს. ნებისმიერ პერსონაჟში შეიძლება იპოვო შენი საოცნებო როლი.
ქეთი საგინაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
