27
აპრილიდღის ზოგადი ასტროლოგიური პროგნოზი
ცნობილ ადამიანებს მივმართე ერთი კონკრეტული კითხვით: "თქვენს შვილს თოვლის ბაბუამ რა უნდა მოუტანოს?" აღმოჩნდა, რომ ე.წ. ვარსკვლავების შვილებს არცთუ ისე "ჰოლივუდური" სურვილები აქვთ - ძირითადად, ისეთივე საჩუქრების მიღება სურთ, როგორზეც ნებისმიერი ბავშვი ოცნებობს...
თაკო ჩხეიძე:
- პატარებმა თოვლის ბაბუას წერილი გაუგზავნეს და ახლა ახალი წლის ღამეს მოუთმენლად ელოდებიან. იციან, რომ საჩუქრებს მიიღებენ. ეს იქნება "სპაიდერმენი", "ბეტმენი", "სუპერმენი" და ა.შ. უფროს ვაჟს ბევრად უფრო სერიოზული სურვილები აქვს... მეც დიდხანს მჯეროდა თოვლის ბაბუის არსებობის. ყოველ წელს კართან დიდი ყუთი მხვდებოდა. რატომღაც, ჯადოსნურ მოხუცს სულ სადღაც ეჩქარებოდა და არ ელოდებოდა, კარს როდის გავუღებდი... ერთ წელს ჩემს უფროს ვაჟს ეჭვი შეეპარა თოვლის ბაბუის არსებობაში. ახალი წლის შემდეგ სხვა ქვეყანაში მოგვიხდა გაფრენა. ზუსტად იმ წელს თბილისში თოვლის ბაბუა ლაპლანდიიდან გვეწვია და როცა თავის ქვეყანაში ბრუნდებოდა, ჩვენთან ერთად მოუხდა მგზავრობა. ბავშვებს სათითაოდ დაუწერა მისალოცი ბარათები. პატარები მთელი გზა გაოცებულები უყურებდნენ. შვილს ამაყად ვუთხარი, - ხომ გეუბნებოდი, თოვლის ბაბუა ნამდვილად არსებობს-მეთქი (იღიმის).
დათო გომართელი:
- ჯერჯერობით, ჩემი შვილი ახალ წელს განსაკუთრებულ გარემოში არ შეხვედრია, ახლა კი ამის შანსი მიეცემა, ვინაიდან კონცერტზე ყაზბეგში მომიწვეს გამოსვლა, დამდეგს ყველანი ერთად ამ ლამაზ კუთხეში, კარგ გარემოში შევეგებებით... რაც შეეხება საჩუქარს, ამაზე ჯერ კიდევ ვფიქრობთ...
ხატია სიჭინავა:
- უფროს გოგონას - გაბრიელას უკვე ჰყავს მანქანა და სულ ამ ავტომობილის გამო ჩხუბობენ, სათამაშოს ვერ იყოფენ. ამიტომ, წელს თოვლის ბაბუა ოლისაც ზუსტად ასეთ მანქანას მოუყვანს. გაბრიელა, როგორც ჩანს, გემოვნებით დედას დაემსგავსა და პრინცესას კაბა უნდა... ჩემს შვილებს თოვლის ბაბუა ზუსტად იმას ჩუქნის, რაც მათ სურთ. 31-ში ღამით აუცილებლად გამოვიძახებთ თოვლის ბაბუას და ის ბავშვებს თავად გადასცემს ამ საჩუქრებს, რათა ყველაფერი დამაჯერებელი იყოს. ვიდრე პატარები არიან, სჯეროდეთ მისი არსებობის...
სოფო ხალვაში:
- უფროს გოგონას - ქეთის გრძელი სია აქვს ჩამოწერილი. სწორედ გუშინ ვკითხე, - თოვლის ბაბუას რა უნდა სთხოვო-მეთქი? ჰოდა, აღმოჩნდა, რომ ზეპირად აღარ ახსოვდა... ულამაზესი, ინგლისური წარმოების თოჯინების კოლექცია აქვს და ახლა იმავე წარმოების ბიჭ-თოჯინებს ელოდება. მარიამი ჯერ ძალიან პატარაა, მაგრამ თოვლის ბაბუა უსაჩუქროდ მაინც არ დატოვებს... ახალ წელს თბილისში კონცერტში ვმონაწილეობ და ქეთიც ჩემთან ერთად იქნება.
სოფო ბედია:
- ჩემს შვილს ცხოველები ძალიან უყვარს. ვფიქრობ, თოვლის ბაბუა სათამაშო ვეფხვებს, ლომებსა და ჟირაფებს მოუტანს...
მაკა შალიკაშვილი:
- ცუდ დღეში ვარ! თინანოს აიპადი, აიფონი, ლეკვი უნდა და რა გავაკეთო, არ ვიცი (იცინის)... აი, ახლა ყველა თოვლის ბაბუას ვეუბნები, რომ თუ ჩემამდეც მოაღწევენ, ეს ყველაფერი მოგვიტანონ!.. თუმცა, ლეკვი აღარ უნდა, მამამ უკვე მოუყვანა...
სალომე გოგიაშვილი:
- მაღაზიებში გავივლით და ერთად გადავწყვეტთ, რას შევიძენთ. ახალი წლის ღამეს კი ნაძვის ხის ქვეშ დალაგებულ, ერთმანეთისთვის ნაყიდ საჩუქრებს ვხსნით. ჩვენს ოჯახში მხოლოდ ციბუკასთან მოდის თოვლის ბაბუა, დანარჩენები კი ერთმანეთს საჩუქრებს თავად ვუმზადებთ.
ზაზა ხუციშვილი:
- ჩემი შვილი უკვე დიდია საიმისოდ, რომ რაღაცებს ვერ მიხვდეს, მაგრამ მგონია, რომ ცუღლუტობს. ვფიქრობ, იცის, ახალ წელს მისთვის საჩუქარს რეალურად ვინ ყიდულობს, მაგრამ არაფერს ამბობს.
თამუნა მუსერიძე:
- ჩემს ბიჭს ახალ წელს ოქროს თევზი უნდა. ჰოდა, არ ვიცი, თოვლის ბაბუა მის მოყვანას შეძლებს თუ ვერა.
ტყუილი თუ ბავშვისთვის აუცილებელი ფერადი სამყაროს შექმნა?!
თანამედროვე ბავშვების მოტყუება საკმაოდ რთულია, მაგრამ არც ისე ძნელია მათი დარწმუნება იმაში, რომ თოვლის ბაბუა არსებობს... ითვლება თუ არა ტყუილად ბავშვისთვის ფერადი, ზღაპრული სამყაროს შექმნა? უნდა ვუთხრათ თუ არა მას სიმართლე? - ამ კითხვით რამდენიმე ბავშვთა ფსიქოლოგს მივმართე, მაგრამ რატომღაც, პასუხის გაცემისგან თავი შეიკავეს. თავისი ცოდნა და გამოცდილება მხოლოდ ბატონმა რამაზ საყვარელიძემ გაგვიზიარა.
- კონკრეტულ ასაკში ბავშვებისთვის მსგავსი ტყუილი აუცილებელიც კი არის. მათთვის მნიშვნელობა არ აქვს, ამბავი მართალია თუ მოგონილი, მთავარია, ის პატარასთვის სასიამოვნო იყოს. სწორედ ამ პრინციპით თამაშობენ ბავშვები "დედაშვილობანას", "ოჯახობანას", "ომობანას". მათ არ აწუხებთ, ეს რეალობაა თუ - არა, მთავარია, საკუთარი ემოციები ჩადონ ამა თუ იმ თამაშში, ამბავში, ზღაპარში...
- თოვლის ბაბუას ბავშვებისთვის სიხარული მოაქვს, მაგრამ მითის დამსხვრევაც ხომ გარკვეულ სტრესთან არის დაკავშირებული? კონკრეტული ასაკი თუ არსებობს, როცა ბავშვი ამ სამყაროდან ნელ-ნელა უნდა გამოვიყვანოთ?
- ეს სამყარო კონკრეტულ ასაკთან ერთად, დროს უნდა გაჰყვეს, თორემ დიდი ალბათობაა - სიმართლის აღქმისას გაბრაზდეს. წესით, სკოლის ასაკიდან ნელ-ნელა უნდა შევაჩვიოთ რეალობას... მანამდე კი, ჩემი აზრით, ბავშვისთვის აუცილებელიც არის ზღაპრული სამყაროს არსებობა. ზოგადად, სტრესი ბავშვებს ნაკლებად ახასიათებთ, მსგავსი რამ ძალიან იშვიათად ხდება.
- ხომ არ აჯობებს, ბავშვებს ავუხსნათ, რომ თოვლის ბაბუა ჩვეულებრივი მსახიობია?
- იმ ასაკში, რა ასაკშიც ბავშვს თოვლის ბაბუის არსებობის სჯერა, რაიმეს ახსნას აზრი არ აქვს. გარდა ამისა, მშობელმა რომც აუხსნას, სახლის გარეთ, მთელი კულტურული სამყარო ამ ზღაპარს სთავაზობს მას. ჰოდა, ადგება და თანატოლებს დაუწყებს დარწმუნებას, რომ კაცი, რომელსაც თოვლის ბაბუას ეძახიან, მსახიობია და ამის გამო შესაძლოა, კონფლიქტი მოუხდეს. ბავშვებს ხომ თავიანთი სამყარო აქვთ?! წინააღმდეგობა ამ სამყაროში არანაკლებ ტრავმულია, ვიდრე იმ ფაქტის გაცნობიერება, რომ თოვლის ბაბუა რეალური არ არის. ამიტომ, ჯობს, ბავშვს ცხოვრება არ გავურთულოთ. დაე, იცხოვროს მშობლის თუ გარემოს მიერ შექმნილ ზღაპრულ სამყაროში... მაგრამ აუცილებლად ყურადღებით უნდა ვიყოთ, რათა არ გამოგვრჩეს მომენტი, როცა ის უკვე ბავშვობას ტოვებს და სამყაროს სერიოზულად, არაბავშვურად აღქმას იწყებს. აი, ამ დროს კი ტყუილი მინიმუმამდე უნდა შევამციროთ.
შორენა ლაბაძე
(გამოდის ხუთშაბათობით)
