27
აპრილიდღის ზოგადი ასტროლოგიური პროგნოზი
ზაფხული მიიწურა და დასასვენებლად წასული ადამიანები ნელ-ნელა სამუშაოს, სახლებს უბრუნდებიან და ყოველდღიური საქმიანობის დასაწყებად მორალურად ემზადებიან. მათგან განსხვავებით, ზოგიერთებმა მთელი ზაფხული შრომაში გაატარეს და სწორედ ახლა აპირებენ რამდენიმე დღით ქალაქგარეთ "გაპარვას". იმის გასარკვევად, თუ როგორ დაისვენეს და რა სიახლეებისთვის ემზადებიან, რამდენიმე ცნობილ ადამიანს დავუკავშირდით.
ხატია ბრაჭული, მსახიობი:
- წელს ბათუმში დავისვენე. ასევე, ვესტუმრე სვანეთსა და სამეგრელოს. დადიანების სასახლისა და მესტიის მუზეუმის ნახვით დიდი სიამოვნება მივიღე. მოვახერხე აგრეთვე და "საშოპინგოდ" ტრაპზონში ვიყავი.
ადრე ყოველთვის ოჯახთან ერთად ვისვენებდი, ახლა კი ძირითადად, მეგობრებთან ერთად მივდივარ. არ მიყვარს ე.წ. პასიური დასვენება. მომწონს დროის აქტიურად და ხალისიანად გატარება. მაქვს მნიშვნელოვანი სიახლეები, მაგრამ ახლა ვერ დავაკონკრეტებ, მხოლოდ იმის თქმა შემიძლია, რომ მაყურებელი კვლავ მიხილავს ეკრანზე. გარდა ამისა, 10 ოქტომბერს ავთო ვარსიმაშვილის ახალი ფილმის პრემიერაა დაგეგმილი, რომელშიც მეც ვმონაწილეობ.
ზაზა ხუციშვილი, მომღერალი:
- ზაფხული წყნეთთან ახლოს, ჩემს აგარაკზე გავატარე. ძალიან მიყვარს ჩემს სახლსა და ეზოში, მშვიდ გარემოში ფუსფუსი. სახლს ყოველწლიურად რაღაცით ვალამაზებ. ვზრუნავ ეზოს გამწვანებაზეც. ვუვლი ხეხილს, ბოსტანიც მაქვს, სადაც მწვანილი და ბოსტნეული საკუთარი ხელით მომყავს. ნადირობის სეზონი ჩემთვის მარიამობის შემდეგ იხსნება, თუმცა, ოფიციალურად ბევრად ადრეა ნადირობა ნებადართული. სწორედ დღეს ვიყავით სანადიროდ, მაგრამ წარუმატებელი დღე მქონდა.
სექტემბერში ჩვენი ჯგუფი გააქტიურებას აპირებს, რეპეტიციებს განვაახლებთ, რამდენიმე კლუბში კონცერტს გავმართავთ და მერე უფრო დიდი მასშტაბის კონცერტის ორგანიზებასაც ვეცდებით. რაც შეეხება წამყვანობას, ეკრანზე არა, მაგრამ რადიო "ვინილის" ეთერში რამდენიმე საავტორო გადაცემა მექნება.
სალომე გოგიაშვილი, ტელეწამყვანი:
- ოჯახთან ერთად, თურქეთში ვიყავი. ჩვენი დასვენება უკვე დასრულდა და თბილისში ჩამოვედით...
- როგორც ვიცი, თქვენს ცხოვრებაში სასიამოვნო სიახლეა - ფეხმძიმობას ვგულისხმობ. დასასვენებელი ადგილის შერჩევა ამ ფაქტის გათვალისწინებითაც მოხდა?
- არა, მანამდე გვქონდა დაგეგმილი ზღვაზე წასვლა და გადაწყვეტილება აღარ შეგვიცვლია. საერთოდ, როცა ბავშვებთან ერთად მივდივართ, მშვიდ და ოჯახურ გარემოს ვირჩევთ. ასევე, ვცდილობთ, მეგობრებთან ერთად წავიდეთ, რათა უფრო მეტად გავერთოთ. გართობაში კლუბებს არ ვგულისხმობ - ასეთ ადგილებში მე და ჩემი მეუღლე მარტო დავდივართ ხოლმე.
გია ჯაჯანიძე, ფსიქოლოგი:
- გაგიკვირდებათ და, ზაფხულს ძირითადად, თბილისში ვატარებ. დასვენების ასეთი წესი მაქვს: როცა ქალაქი იცლება, სიმშვიდით ვტკბები. დასასვენებლად მხოლოდ მაშინ მივდივარ, როცა ხალხი დედაქალაქში ბრუნდება და თბილისი ივსება. სავარაუდოდ, დიდ მოგზაურობას დავიწყებ. საერთოდ, ერთ ადგილას ვერ ვჩერდები. კიდევ ერთი რამ მახასიათებს: სხვებისაგან განსხვავებით, ჩემთვის წარმოუდგენელია დასვენება ოჯახის წევრებთან ან მეგობრებთან ერთად, რადგან შეიძლება, იქ ყოფნისას ჩვენი სურვილები ერთმანეთს არ დაემთხვეს. დარწმუნებული ვარ, ის ადამიანები, რომლებიც დასასვენებლად ნათესავებთან ან მეგობრებთან ერთად წავიდნენ, "ისტერიკით" ჩამოვლენ... დასვენებისას არ მიყვარს არავითარი კლუბი, "ტანციმანცები" და გნიასი - ასეთ მდგომარეობაში ხომ ისედაც, მთელი წელი ვარ... დასვენება რაღაცით უნდა გამოირჩეოდეს ცხოვრების ჩვეული წესისგან! ახლა ერთი განზრახვა მაქვს: ძალიან მინდა წავიდე ჭიათურაში, ჩემს სახლში და დაახლოებით 5 დღე იმ ეზოში ვიარო, სადაც ბავშვობა გავატარე. დიდი ხანია, იქ არ ვყოფილვარ. ეზოში ძალიან ძველი, XVIII საუკუნის ხის ქოხი დგას. ახლა ნათესავები მის დანგრევას აპირებენ. მათ შევუთვალე, რომ ჩასვლას ვაპირებ. მინდა, ერთხელ კიდევ შევიდე ამ პაწაწინა სახლში, ფოტოები გადავიღო და მერე თუ უნდათ, დაანგრიონ.
- თქვენს სამოგზაურო გეგმებში საზღვარგარეთ წასვლაც შედის?
- ამის პრობლემა არ არის, მაქვს ვიზები და სადაც მინდა, იქ წავალ.
სოფო ხალვაში, მომღერალი:
- ახლა ბათუმში ვარ. შეიძლება, ჩემს დასვენებას "პარალელური" დავარქვათ, რადგანაც მუშაობის პარალელურად, ვისვენებ. ახლაც გადაღება მაქვს. ზოგადად, ჩემთვის დასვენება ოჯახთან ერთად ყოფნას ნიშნავს და არ აქვს მნიშვნელობა, სად ვიქნებით. ასე რომ, უპირატესობას ოჯახურ გარემოში დასვენებას ვანიჭებ... ცნობისათვის, მალე ბენდთან ერთად ახალ ალბომზე დავიწყებ მუშაობას.
ლენუკა ყიფშიძე, მოდელი:
- ეს ზაფხული ჩვენთვის მეტად დაძაბული აღმოჩნდა: შვილთან ერთად კვარიათში ვიყავი, როცა ავად გახდა. აღმოჩნდა, რომ მენინგიტი ჰქონდა. მკურნალობას გარკვეული პერიოდი დასჭირდა. საბედნიეროდ, ახლა ჯანმრთელად არის, გადავრჩით... მერე წყნეთში წავედით და ბავშვები ახლაც იქ არიან. სხვა გეგმები გვქონდა, მაგრამ სამწუხაროდ, ჩაგვეშალა. ზოგადად, ბავშვთან ერთად, მშვიდ გარემოში ვისვენებ ხოლმე ან მეგობრებთან ერთად სადმე მივდივარ. არ აქვს მნიშვნელობა, ზღვა იქნება თუ მთა - ორივე ძალიან მიყვარს. საზღვარგარეთ დასვენება ჯერ ვერ მოვახერხეთ. ბევრი მეგობარი მყავს და თავისუფალი დრო ყველას ერთდროულად არ გამოგვიჩნდა. ახლა ვგეგმავთ წასვლას და იმედია, გამოგვივა.
- რას ნიშნავს შენთვის საზღვარგარეთ დასვენება?
- იცი, რა, აქ ერთფეროვნებაა. მოსაბეზრებელია ყოველ წელს ერთი და იმავე რაღაცის კეთება. პირველი არ ვიქნები, თუ ვიტყვი, რომ სადმე ევროპაში უფრო კარგად დაისვენებს ადამიანი, ვიდრე საქართველოში.
დათო ტურაშვილი, მწერალი:
- ბატონო დავით, უკვე დაისვენეთ? მაინტერესებს, რას ნიშნავს თქვენთვის დასვენება?
- რას ამბობთ, რა დასვენება? მე ცხოვრებაში არ დამისვენია! რომ აღარ ვიქნები, ალბათ მაშინ დავისვენებ (იცინის).
ირმა სოხაძე, მომღერალი:
- ერთი კვირით ქობულეთში ვიყავი, პროფკავშირების მიერ ორგანიზებულ საბავშვო შემოქმედებით ფესტივალზე ჟიურის წევრად მიმიწვიეს. ნორმალური ამინდი და კარგი გარემო იყო. აგვისტოში, ჩემს ქალიშვილ ნატუკასა და მის ოჯახთან ერთად შეკვეთილში ვიყავი. ახლა მე და ჩემი მეუღლე ვცდილობთ, როგორმე თავისუფალი დრო დავამთხვიოთ და ერთი კვირით თურქეთის რომელიმე კურორტზე გავემგზავროთ. რეზოს ზღვაზე წასვლისას არ უყვარს რისკი. რამდენჯერაც საქართველოს კურორტებზე წავიყვანე, იმდენჯერვე ცუდი ამინდი დაემთხვა, ეს კი მას ძალიან ცუდ ხასიათზე აყენებს ისევე, როგორც ყველას. ამიტომაც გვინდა თურქეთში წასვლა. ეს ზაფხული ნაყოფიერი იყო იმ თვალსაზრისით, რომ საქართველოს ძალიან ბევრი კუთხე მოვიარე. ახლა ისევ ბათუმში მომიწევს წასვლა... ნოემბრის ბოლოს ან დეკემბერში დიდ საკონცერტო დარბაზში სერიოზული კონცერტის გამართვას ვგეგმავ, მაგრამ თუ ყველაფრის ორგანიზება ვერ მოხერხდება, კონცერტს გაზაფხულისთვის გადავდებ.
ია სუხიტაშვილი, მსახიობი:
- აგარაკზე, წყნარ და მშვიდ გარემოში ვისვენებ - სწორედ ასეთი დასვენება მომწონს. არ მიყვარს ზღვა და შესაბამისად, ცურვაც არ ვიცი. ხმაურში ვერაფრით ვისიამოვნებ. რაც შეეხება მიშას, ჩემგან განსხვავებით, მას ზღვაც უყვარს და მთაც... რეჟისორი გიგა აგლაძე, დათო ტურაშვილის ძალიან საინტერესო სცენარის მიხედვით, ფილმის გადაღებას აპირებს. გადაღებები მალე დაიწყება და მასში მეც მივიღებ მონაწილეობას. გარდა ამისა, სხვა პროექტშიც მიმიწვიეს - ასე რომ, წინ სერიოზული სამუშაო მელის.
შორენა ლაბაძე
(გამოდის ხუთშაბათობით)
