ადვოკატი - დავით ჩხიტუნიძე თავის არეშია დაჭრილი

სანდრო გირგვლიანის საქმეზე ბრალდებული, საბერძნეთში დაკავებული დავით ჩხიტუნიძე თავის არეშია დაჭრილი და უგონო მდგომარეობაში იმყოფება, - ამის შესახებ "ინტერპრესნიუსს" ჩხიტუნიძის ადვოკატმა, დალი იმნაიშვილმა განუცხადა.

მისი განმარტებით, ინციდენტი ათენში, საექსტრადაციო საპყრობილეში მოხდა. ადვოკატის მონაცემებით, ამჟამად ჩხიტუნიძე ათენის საავადმყოფოშია გადაყვანილი და მძიმე მდგომარეობაშია. იმნაიშვილის ინფორმაციით, მისი დაცვის ქვეშ მყოფი ადგილობრივ ადვოკატს არ აჩევენებს. "მოვითხოვთ დავით ჩხიტუნიძის საქართველოში სასწარფო ექსტრადირებას", - აღნიშნა ადვოკატმა.

მისთვის უცნობია, ვინ გაუსწორდა ფიზიკურად მისი დაცვის ქვეშ მყოფს, თუმცა დაუზუსტებელი ინფორმაციით, დაზიანებები ჩხიტუნიძეს ათენის საპყრობილეში მყოფმა ერთ-ერთმა ქართველმა პატიმარმა მიაყენა.

ჩხიტუნიძე ათენში რამდენიმე დღის წინ დააკავეს. საქართველოს შინაგან საქმეთა სამინისტროს ცნობით, ინტერპოლით ძებნილი ბრალდებული საბერძნეთის სამართალდამცველებმა ქართული მხარის მოთხოვნის საფუძველზე აიყვანეს. ჩხიტუნიძის ადვოკატების ინფორმაციით კი, მათი დაცვის ქვეშ მყოფი საქართველოში დაბრუნებას და ჩვენებების მიცემას აპირებდა და საზღვარზე იმ მოტივით აიყვანეს, რომ მის დიპლომატიურ პასპორტს მოქმედების ვადა ჰქონდა შეჩერებული.

სანდრო გირგვლიანის საქმეზე დავით ჩხიტუნიძეს ბრალად წარდგენილი აქვს სისხლის სამართლის კოდექსის 333-ე მუხლით გათვალისწინებული დანაშაული, რაც სამსახურებრივი უფლებამოსილების გადამეტებას გულისხმობს.

რაც შეეხება ეპიზოდს, ჩხიტუნიძეს გირგვლიანის მკვლელობისთვის გასამართლებული პირების ციხეში პრივილეგირებულად ყოფნაში ხელშეწყობა ბრალდება.

"ინტერპრესნიუსი"