ეშტონ კატჩერი ახალგაზრდა მსახიობს ”გადაეკიდა”

მსახიობი ეშტონ კატჩერი ითხოვს, რომ ახალგაზრდა მსახიობი ანგუს ტ.ჯონსი პოპულარული ამერიკული სერიალიდან, "ორნახევარი კაციდან" გაათავისუფლონ.

გავრცელებული ხმებით, მსახიობი განრისხდა, როდესაც გაიგო, რომ მისმა 19 წლის კოლეგამ, რომელიც სერიალის თითო ეპიზოდში ჰონორარის სახით 390 000 დოლარს იღებს, შოუს "უგემოვნო" უწოდა და თაყვანისმცემლებს მისი ყურების შეწყვეტისკენ მოუწოდა.

მოგვიანებით ახალგაზრდა ვარსკვლავმა ბოდიში მოიხადა და შოუს პროდუსერებს სთხოვა, რომ სამსახურიდან არ დაეთხოვათ, თუმცა ეშტონ კატჩერი სხვა აზრზეა. მსახიობი მოითხოვს, რომ მისმა კოლეგამ პროექტი დაუყოვნებლივ დატოვოს.

"როგორც კი კატჩერმა ანგუსის მიმართვა მოისმინა, მაშინვე უფროსებთან ”ჩაუშვა”: ანგუსი გაფუჭებული ბიჭია და არ მინდა, ამ შოუში მისი დანახვაო", - წერს წყარო.

პროდუსერები თავადაც არ არიან კმაყოფილნი ტ.ჯონსის საქციელით, თუმცა "ორნახევარი კაცის" რეიტინგი ისევ მაღალია და ახლა მსახიობის გაშვება პროექტიდან მიზანშეწონილად არ მიაჩნიათ.

გარდა ამისა, სერიალის ხელმძღვანელობას იდეალური გამოსავალიც აქვს.  ტ.ჯონსის პერსონაჟი სიუჟეტის მიხედვით, ჯარში მიდის. სცენარისტებს სიუჟეტის ამ ხაზის განვითარება და ანგუსის ნახევარ განაკვეთზე გადაყვანა, ან სერიალიდან მისი გაქრობა თავისუფლად შეუძლიათ.

მომზადებულია Showbiz Spy-ს მიხედვით.