"ნაციონალური" პროვოკაციები და აუსრულებელი ოცნებები

ამჯერად "კონტრაში" ერთმანეთის ოპონენტები: პოლიტიკოსი და ფილოსოფოსი ირაკლი ბათიაშვილი და ორგანიზაციის - "საქართველო არ იყიდება" ერთ-ერთი ხელმძღვანელი, გიგა ნასარიძე არიან. ქვეყანაში მიმდინარე აქტუალურ საკითხებზე მათი შეხედულებები რადიკალურად განსხვავებულია.

- "ნაციონალური მოძრაობისა" და "ქართული ოცნების" წევრებს შორის პაექრობა საზოგადოებაში გაღიზიანებას იწვევს. რამდენად წაადგება ეს საერთო საქმეს და რამდენად მომგებიანია თავად ამ "დუელის" მონაწილეთათვის?

ირაკლი ბათიაშვილი:

- მომგებიანი და საერთო საქმისთვის სასარგებლო იქნება სამართლიანობის, მართლმსაჯულების აღდგენა, დანაშაულებების ობიექტური გამოძიება, მომავალში, რეალურად ჯანსაღი ოპოზიციის არსებობა და არა - "ნაციონალური მოძრაობის", რომელსაც ხალხში არავითარი მხარდაჭერა აღარ აქვს. დღეს რომ არჩევნები ჩატარდეს, ისინი 5%-საც ვერ გადალახავენ, ის პროცენტები კი მანამდე არნახული ძალადობის შედეგად მიიღეს. სისულელეა, ადამიანს "დაჭერები" უხაროდეს, მით უმეტეს, თავად ვიყავი სააკაშვილის პატიმარი, მაგრამ სამართლიანობის აღდგენა ამას მოითხოვს.

გიგა ნასარიძე:

- მათი თანამშრომლობა ძალიან რთული იქნება, თუმცა დადებით შედეგს მივიღებთ. "ნაციონალური მოძრაობის" ფრაქციამ გვიჩვენა, რომ მათი რიტორიკა თანამშრომლობისკენ, კონსტრუქციულობისკენაა მიმართული. ისინი "ქართულ ოცნებას" კონკრეტულ გეგმებს, აზრებს, ნაბიჯებს სთავაზობენ, ადრინდელი ოპოზიცია კი მხოლოდ ხელისუფლების კრიტიკით, წუნიაობითა და ლანძღვა-გინებით იყო დაკავებული, რეალურს და საქმისთვის სასარგებლოს კი არაფერს აკეთებდა.

- თქვენი აზრით, ახალმა მთავრობამ როგორ უნდა მოიძიოს თანამდებობებისთვის შესაფერისი კადრები და ქართველებმა როგორ უნდა დავაღწიოთ თავი ნაცნობ-მეგობრობით თანამშრომელთა შერჩევას? საჭიროა თუ არა, ობიექტური კონკურსების ჩატარება?

ირაკლი ბათიაშვილი:

- საამისოდ ბევრი კარგი მეთოდი არსებობს. მათ შორის - კონკურსებიც. თანამდებობაზე ადამიანის დანიშვნის მთავარი პრიორიტეტი მისი პროფესიონალიზმი, კვალიფიკაცია, კომპეტენცია, მოქალაქეობრივი პასუხისმგებლობა, პატრიოტიზმი და პატიოსნება უნდა იყოს. შესაძლოა, ნაცნობობა ხელს გიწყობდეს იმაში, რომ იმ ადამიანის შესაძლებლობები იცი, მაგრამ მხოლოდ ნაცნობობით თანამდებობაზე დანიშვნა არ შეიძლება.

გიგა ნასარიძე:

- საქართველოში ეს ცოტა რთული ამბავია, ნაცნობ-მეგობრობა ალბათ ყოველთვის იარსებებს, მაგრამ რაღაცნაირად უნდა დავარეგულიროთ. კონკურსები, რა თქმა უნდა, ძალიან მნიშვნელოვანია, წინ გადადგმული ნაბიჯი იქნება, მაგრამ ახალმა მთავრობამ ალბათ ჩათვალა, რომ ეს ყველაფერი დროს დააკარგვინებდა და სიტუაცია უცებ მოაგვარა. ჯერ მხოლოდ დაჭერებით გადიან ფონს, რაც ძალზე ცუდია. გავიგე, რომ ზოგიერთ მინისტრს მხოლოდ თავისი ნათესავები და ახლობლები შემოუკრიბავს ირგვლივ. ბლეფი აღმოჩნდა ისიც, რომ პროფესიონალებს სამსახურებიდან არ გაუშვებდნენ - თითქმის ყველა დაითხოვეს.

- თქვენი შეფასებით, საერთო ჯამში, როგორ მიდის ფორმირებების პროცესი და როგორ გესახებათ საქართველოს პოლიტიკური ვითარება მაგალითად, ერთი წლის შემდეგ?

ირაკლი ბათიაშვილი:

- ჩვენი ქვეყნის პერსპექტივას ოპტიმისტურად ვუყურებ, მაგრამ წინასწარ რაიმე პროგნოზის გაკეთება მიჭირს. მოგეხსენებათ, რთული შიდა და დაძაბული საგარეო ვითარება, უამრავი დაბრკოლებაა, მაგრამ დღევანდელმა ხელისუფლებამ ყველაფერი უნდა გააკეთოს, რომ გადალახოს და ქვეყანა უმძიმესი მდგომარეობიდან გამოვიდეს.

გიგა ნასარიძე:

- ნელ-ნელა ყველანაირ დაპირებაზე ამბობენ, ვერ გავაკეთებთო. ალბათ მსჯავრდადებულებიც არ ელოდნენ, რომ მათ უცნაური ბრალდებებით დააპატიმრებდნენ. "ქართული ოცნების" მომხრეებს, არა მგონია, კმაყოფილება დიდხანს გაჰყვეთ. მიცემული დაპირებების შესრულებას მათაც აუცილებლად მოსთხოვენ, რასაც "ოცნება" ვერ შეძლებს და ეს დიდ უკმაყოფილებას გამოიწვევს.

- როგორ ფიქრობთ, მოსახლეობის დიდი ნაწილის მოლოდინი სოციალური მდგომარეობის გაუმჯობესების კუთხით უსაფუძვლოა?

ირაკლი ბათიაშვილი:

- ვფიქრობ, რომ ჩვენი სოციალურ-ეკონომიკური მდგომარეობის გაუმჯობესებისთვის იმაზე გაცილებით მეტი გაკეთდება, ვიდრე წინა მთავრობის დროს. სააკაშვილის პოლიტიკამ ჩვენი მოსახლეობა გააღატაკა, ხალხი უმძიმეს მდგომარეობაშია. ეს კი იმ უგუნური ქმედებების შედეგი იყო, როდესაც უზარმაზარი ფინანსები უაზროდ, გართობებში, არაფრისმომცემ მშენებლობებში იფანტებოდა. საბოლოო ჯამში, ახალ ხელისუფლებას დაცარიელებული ხაზინა დაახვედრეს.

გიგა ნასარიძე:

- ხელისუფლების დაპირებები ტყუილი გამოდგა. მსოფლიოში არ არსებობს ფაქტი, რომ ეკონომიკის ზრდა და განვითარება უსწრაფესი ტემპებით მოხდეს. შესაბამისად, ვერც ჩვენ ვიქნებით გამონაკლისი. მათ მომხრეებს ვამართლებ იმ მხრივ, რომ ძნელია წინასაარჩევნოდ არ დაუჯერო ადამიანს, რომელიც მდიდარია და ფულის შოვნის მეთოდები იცის. ერთი შეხედვით, ასე ჩანდა. მერე კი, როცა აღმოჩნდება, რომ ყველაფერი ისე არ ყოფილა, როგორც გეგონა, იმედგაცრუება გიპყრობს და ეს ლოგიკურია.

- რა შეფასებას მისცემთ კობა ბექაურის განცხადებას, რომ შალვა რამიშვილის საქმესთან დაკავშირებით, იგი ზურაბ ადეიშვილისა და ვანო მერაბიშვილის დაკვეთის შემსრულებელი იყო?

ირაკლი ბათიაშვილი:

- ვფიქრობ, საზოგადოებისთვის მაშინვე ნათელი იყო, რომ ის პროვოკაცია, რაც შალვა რამიშვილს მოუწყვეს, დაკვეთით ხდებოდა და მთავარი მიზანი ტელევიზია "202"-ის გაუქმება გახლდათ, რასაც შალვას დაპატიმრების შემდეგ, მიაღწიეს კიდეც. დამოუკიდებელი მედიასაშუალებების მოსპობის მცდელობა სააკაშვილმა ხელისუფლებაში მოსვლის პირველივე დღეებიდან დაიწყო. ცხადია, რომ კობა ბექაური აიძულეს, შალვასთვის ქრთამი მიეცა და კარგია, რომ ის ახლა თავად აღიარებს ამ ყველაფერს და ჩვენების სახეც თუ მიეცემა, უკეთესი იქნება.

გიგა ნასარიძე:

- აუცილებლად გამოჩნდებიან ადამიანები, ვინც ძველი ამბების უარყოფასა და ახალი ხელისუფლებისთვის თავის მოწონებას დაიწყებენ. ასეთ პირობებში კი რთული გასარკვევი იქნება, ვინ საუბრობს გულწრფელად და ვინ იგონებს რაღაც ამბებს, რათა უფრო პირნათელი გამოჩნდეს მათთან. ასე რომ, პირადად მე, ბექაურის განცხადების არ მჯერა. თურმე მთელი წინა ხელისუფლების ე.წ. ელიტა ანუ მთავარი ფიგურები შეკრებილან და მსჯელობდნენ, რა ვუყოთ შალვა რამიშვილს, როგორ გავანეიტრალოთო. არც ბექაურის დაშინებას სჭირდებოდა სამი მინისტრი. საზოგადოების გადასაწყვეტია, რამდენად სარწმუნოდ მოეჩვენება ეს ამბავი.

- როგორ ფიქრობთ, რამდენად საფუძვლიანი და რეალურია ვანო მერაბიშვილთან დაკავშირებული სხვა ბრალდებები?

ირაკლი ბათიაშვილი:

- ყველას გვახსოვს, რომ ვასო სანოძე და დათა ახალაია იმ პერიოდში რეალურად ასრულებდნენ სამსახურებრივ მოვალეობას. მაცვიფრებს ვანო მერაბიშვილის თავხედობა, როცა ის პოლიტიკურ დევნაზე საუბრობს მაშინ, როცა საზოგადოებაში თავად ასოცირდებოდა ამ ყველაფერთან. დარწმუნებული ვარ, ვანო მერაბიშვილს ბევრ სხვა დანაშაულებრივ ქმედებებთან დაკავშირებითაც მოუწევს პასუხის გაცემა.

გიგა ნასარიძე:

- არა მგონია, რეალური იყოს. თუ გავითვალისწინებთ, რომ ახალმა ხელისუფლებამ თავისი პოლიტიკური საქმიანობა აშკარა პოლიტიკური ანგარიშსწორებებით დაიწყო, ვანო მერაბიშვილთან დაკავშირებითაც ამის მცდელობა იქნება და შეთითხნილი მასალები დაიდება. მაგალითად, ბაჩო ახალაიას, გიორგი კალანდაძეს ზეპირსიტყვიერად უამრავი საშინელი ბრალდება წაუყენეს, წარმოდგენილ დოკუმენტებში კი მხოლოდ რამდენიმე გადაცდომაა, რომელიც არანაირად არ მტკიცდება, გარდა მოწმეების ჩვენებისა.

- რამდენად მიმნდობი ხართ ადამიანების მიმართ?

ირაკლი ბათიაშვილი:

- კრიტიკულიც ვარ, მაგრამ ადამიანებისადმი ნდობაც დიდი მაქვს.

გიგა ნასარიძე:

- საკმაოდ. ხშირად მსაყვედურობენ ხოლმე, ბრმად ნუ ენდობიო, რასაც ზოგჯერ უარყოფითი შედეგიც მოჰყოლია...

- რას შეუძლია თქვენი წონასწორობიდან გამოყვანა?

ირაკლი ბათიაშვილი:

- ეს ძალიან ძნელია. 1980-იანი წლებიდან მოყოლებული, რაც პოლიტიკაში ვარ ჩაბმული, საკმაოდ დიდი სკოლა გავიარე და ჩემს თავზე იმდენმა ქარტეხილმა გადაიარა, მეტ-ნაკლებად გამომიმუშავდა მოთმინებისა და შინაგანი სიმტკიცის უნარი.

გიგა ნასარიძე:

- ტრაბახის გარეშე ვიტყვი, რომ ეს საკმაოდ რთულია, მაგრამ ყველაზე მეტად შეუვალ ადამიანებზე ვღიზიანდები, ძალიან მტკიცებითი ფორმით დიდ სისულელეს რომ გახვევენ თავს. დებატებისას, ჭორებსა და დაუსაბუთებელ ამბებზე ვღიზიანდები, როცა უნდა უმტკიცო, რომ ეს ასე არ იქნებოდა. ფუჭი საუბრები მაღიზიანებს.

- თქვენთვის ქრთამი თუ შემოუთავაზებია ვინმეს? რას იზამთ ახალმა ხელისუფლებამ ქრთამი ან კარგი თანამდებობა რომ შემოგთავაზოთ?

ირაკლი ბათიაშვილი:

- მოქრთამვის მცდელობას ჩემ მიმართ ვერც ვერავინ ახორციელებდა და ვერც მომავლში გაბედავენ, ეს საზოგადოებამ კარგად იცის. თვით "ნაციონალებსაც" კი, რომლებიც მუდმივად მემტერებოდნენ, ჩემთან ასეთ თემაზე სალაპარაკო არ ჰქონდათ, კორუფციისგან ყოველთვის სუფთა ვიყავი.

გიგა ნასარიძე:

- ნამდვილად არ მქონია ჯერჯერობით ისეთი პოზიცია, რომ ვინმეს ქრთამი შემოეთავაზებინა. სასწაული რომც მოხდეს და თანამდებობა შემომთავაზონ, პირადად მე, ამ ხელისუფლებასთან ვერ ვიმუშავებ, რადგან მათი და ჩემი იდეები 180 გრადუსით განსხვავდება ერთმანეთისგან.

- კანონმორჩილი ადამიანი ხართ?

ირაკლი ბათიაშვილი:

- სანამ საქართველოში კანონი უზენაესი არ იქნება, თანამედროვე სახელმწიფოდ ვერ ჩამოვყალიბდებით. კანონის უზენაესობა ნიშნავს დემოკრატიული ინსტიტუტებისა და სამოქალაქო საზოგადოების ჩამოყალიბებას.

გიგა ნასარიძე:

- ზედმეტად კანონმორჩილიც კი ვარ. როგორც ძველი რომაელები იტყოდნენ, კანონი შეიძლება იყოს უხეში, მაგრამ კანონი კანონია.

თამთა დადეშელი

ჟურნალი ”გზა”

(გამოდის ხუთშაბათობით)