წარმოშობით ქართველმა ამერიკელმა პარაოლიმპიელმა ბიოლოგიური დედა იპოვა

22 წლის ელიზაბეთ სტოუნი, რომელიც მარჯვენა ფეხის ქვედა ნაწილის გარეშე დაიბადა, მსოფლიო კლასის მოცურავეა. წლევანდელ პარაოლიმპიურ თამაშებზე, სტოუნი აშშ-ის სახელით ასპარეზობდა და რამდენიმე მედალი მოიპოვა. გოგონა წარმოშობით საქართველოდან არის, ის ქუთაისის ბავშვთა თავშესაფარში იზრდებოდა.

ელიზაბეთ სტოუნი, იგივე ქეთევან ხურციძე ბავშვთა თავშესაფრიდან მიჩიგანელმა ფსიქოთერაპევტმა ლინდა სტოუნმა იშვილა და აშშ-ში ჩაიყვანა. რამდენიმე თვეში ოთხი წლის გოგონას კიდურის პირველი პროთეზი გაუკეთეს.

ელიზაბეთის ბიოლოგიური დედა 73 წლის ლიანა ხურციძე საქართველოში, სოფელ დიხაშხოში ცხოვრობს, მამას ამბერკი ერქვა. ოჯახში ქეთევანი მესამე შვილი იყო.

მის დაბადებამდე 3 წლით ადრე ოჯახში ტყუპები გაჩნდნენ: ელიზაბეთის ძმა - ლაშა და და - თეონა.

ელიზაბეთი 1990 წელს დაიბადა დაავადებით, რომელიც მედიცინაში თეძოს ძვლის პროქსიმალური კერის დეფიციტის სახელითაა ცნობილი. როგორც ქალბატონი ლიანა აცხადებს, ექიმებმა და ოჯახის მეგობრებმა მისი მეუღლე დაარწმუნეს, რომ ქეთევანის გადასარჩენად უკეთესი იქნებოდა, ბავშვთა სახლში ჩაებარებინათ.

პატარასთვის პროთეზის გაკეთება და განსაკუთრებული სამედიცინო დახმარების გაწევა ღარიბმა ოჯახმა ვერ შეძლო. მათ ოჯახში ქეთევანის გარდა, ორი მცირეწლოვანი შვილი ცხოვრობდა, ხოლო ქვეყანაში 90-იანი წლების სიდუხჭირე მეფობდა. ლიანას თქმით, ქალიშვილი მხოლოდ ერთხელ ნახა და სხვა ყველაფერი მის გარეშე გადაწყდა.

ქეთევანი ქუთაისის ბავშვთა სახლში გადაიყვანეს. გოგონას გაშვილებამდე მისი ნახვა მამას და ოჯახის მეგობარს შეეძლო. მხოლოდ მათ იცოდნენ გოგონას ადგილსამყოფელი. ლიანა ამბობს, რომ არ იცის, ჰქონდათ თუ არა მათ ქეთევანის გაშვილების შესახებ რაიმე ინფორმაცია. თუმცა, შემდეგ ორივე გარდაიცვალა და უპასუხოდ დარჩა ყველა კითხვა, რომელიც ქეთევანის შესახებ აწუხებდა.

როგორც გოგონას ძმა, ლაშა ამბობს, მთელი ცხოვრება დაკარგული დის ფიქრში ტკივილით იცხოვრა. ქეთევანის დასაც ძალიან სურს მისი გაცნობა.

"იმედი მაქვს მას გავიცნობ. არ ვიცი უნდა თუ არა ჩვენი გაცნობა, შეიძლება ფიქრობს, რომ მივატოვეთ. შეიძლება არც გვაპატიოს, მაგრამ როგორც დედმამიშვილს, როგორც ერთ სისხლსა და ხორცს ძალიან მინდა, შევხვდე", - ამბობს თეონა.

ქეთევანის გამზრდელის, ლინდა სტოუნის თქმით, ქეთევანის შვილად აყვანის შემდეგ მშობლიური ქვეყნიდან ძალიან შორს, მიჩიგანში დაბრუნდა. თურმე ქეთევანი მეზობლის ბავშვებთან თამაშის დროს ქართულად ლაპარაკობდა და მეგობრებს ქართულად ლაპარაკსაც ასწავლიდა. ლინდა აცხადებს, რომ ელიზაბეთთან ერთად საქართველოში ჩასვლას და ხურციძეების გაცნობას აპირებს.

"ვერასდროს ვიფიქრებდი, რომ ბიოლოგიურ დედას შევხვდებოდი. ყოველთვის მინდოდა საქართველოში დაბრუნება. ვცდილობდი, გამეგო იმ ქვეყნის კულტურისა და ცხოვრების შესახებ, საიდანაც წარმოშობით ვარ. მათ ინგლისური არ იციან, მე ქართულად კარგად ვერ ვსაუბრობ. ვფიქრობ, ჩვენი შეხვედრა ამარელვებელი იქნება", - ამბობს ქეთევანი.

მომზადებულია რადიო "თავისუფლების" მიხედვით.

იხილეთ ვიდეო