ერდოღანი გაერო-ს უშიშროების საბჭოს უმოქმედობაში ადანაშაულებს

თურქეთის პრემიერ-მინისტრი რეჯებ ტაიბ ერდოღანი გაერო-ს უშიშროების საბჭოს სირიაში არსებულ სიტუაციასთან დაკავშირებით უმოქმედობაში ადანაშაულებს. უცხოური მედიის ცნობით, ერდოღანი აცხადებს, რომ გაერო ისეთივე შეცდომებს უშვებს, როგორც ბოსნიაში დაუშვა 1990-იან წლებში.

"მიუხედავად ჩვენი მცდელობისა, გაერო-ს უშიშროების საბჭო არ ერევა იმ ტრაგედიაში, რომელიც სირიაში უკვე 20 თვეა გრძელდება", - განაცხადა ერდოღანმა არაბთა ლიგის გენერალურ მდივან ნაბილ ელარაბისთან შეხვედრის დასრულების შემდეგ გამართულ პრესკონფერენციაზე და აღნიშნა, რომ "უმოქმედობა მწვანე შუქს აძლევს სირიის ლიდერ ბაშარ ასადს, რომ გააგრძელოს ათასობით ადამიანის ხოცვა".

სირიაში არეულობა, რომელიც ასადის მმართველობის შეცვლის მიზნით გამართულ საპროტესტო გამოსვლებს მოჰყვა, 2011 წლის თებერვლიდან გრძელდება. სამოქალაქო ომს, რომელშიც არეულობა გადაიზარდა, 30000-ზე მეტი ადამიანი ემსხვერპლა.

"ინტერპრესნიუსი"