27
აპრილიდღის ზოგადი ასტროლოგიური პროგნოზი
ფილარმონიასთან მიმდინარე აქციის ორგანიზატორთა ინფორმაციით, საქართველოს ხელისუფლება ქვეყანაში საგანგებო მდგომარეობის გამოსაცხადებლად ემზადება. ამის შესახებ განცხადება აქციაზე დავით გოგიშვილმა გააკეთა და აქვე განმარტა, რომ ამის საბაბად ხელისუფლებას საქართველოს სხვადასხვა მიმდინარე საპროტესტო კერების გამოყენება სურს.
"ჩვენ გვაქვს ინფორმაცია, რომ ხელისუფლების მაღალ ეშელონებში სერიოზულად განიხილავენ საგანგებო მდგომარეობის გამოცხადების საკითხს და ამისთვის ხელოვნურად ცდილობენ მდგომარეობის დაძაბვას. როგორც ცნობილია, საგანგებო მდგომარეობის დროს არჩევნები არ ტარდება. ამიტომაც ვფიქრობთ, რომ ხელისუფლებას ეს შეგნებულად სურს, რადგან მის სასარგებლოდ ახლა მხოლოდ დრომ და არჩევნების გადადებამ შეიძლება იმოქმედოს", - განაცხადა დავით გოგიშვილმა.
ამასთან, მისივე ვარაუდით, საქართველოს ხელისუფლება თანამოძმეებს შორის დაპირისპირების ხელოვნურად პროვოცირებას ცდილობს, რაზეც პასუხისმგებლობა მხოლოდ პრეზიდენტს შეიძლება დაეკისროს.
"ჩვენ ვართ ცამდე მართალი. სიმართლე ჩვენს მხარეზეა. საქართველოს პრეზიდენტი ისე ამთავრებს თავის საპრეზიდენტო ვადას, რომ ის ვერ აცნობიერებს, რომ ყველას პრეზიდენტია. ოპოზიციურად განწყობილი მოქალაქეებისთვისაც და მისი მხარდამჭერებისთვისაც. საზღვარგარეთ რომ ვინმემ ჩემს პრეზიდენტზე ცუდი თქვას, მე მას კბილებით დავიცავ, რადგან პრეზიდენტს მე ვუყურებ როგორც სახელმწიფო ინსტიტუტს, მაგრამ ეს არ ესმის თავად სააკაშვილს. ის ცდილობს თანამოძმეებს შორის დაპირისპირების პროვოცირებას. ამიტომაც მინდა გავაფრთხილო ის, თუკი ქართველებს შორის იოტისოდენა დაპირისპირება მაინც მოხდება, ამაზე სრული პასუხისმგებლობა მხოლოდ მიხეილ ნიკოლოზის ძე სააკაშვილს შეიძლება დაეკისროს", - განაცხადა გოგიშვილმა.
მისივე თქმით, საქართველომ თემურ ლენგი და შაჰ-აბასი "მოინელა და მიხეილ სააკაშვილსაც როგორმე მოუვლის".
