23
აპრილიდღის ზოგადი ასტროლოგიური პროგნოზი
როგორც დღეს გახდა ცნობილი, საფრანგეთის ულტრამემარჯვენე ლიდერი მარინ ლე პენი ევროკავშირის სახსრების გაფლანგვაში დამნაშავედ ცნეს.
მას სასამართლომ ორწლიანი შინაპატიმრობა და დამატებით ორწლიანი პირობითი სასჯელი მიუსაჯა. მას ასევე სახელმწიფო თანამდებობაზე კენჭისყრა ხუთი წლის ვადით აეკრძალა. ცნობისთვის, ლე პენი 2027 წლის საპრეზიდენტო არჩევნების ერთ-ერთი მთავარი კანდიდატი იყო. მას ასევე დაეკისრა 100 000 ევროს ჯარიმის გადახდა.
- მარინ ლე პენს, თავისი პარტიის 24 წევრთან ერთად, ბრალად ედება ევროპარლამენტში მუშაობისთვის გამოყოფილი თანხებით მათი პარტიის თანამშრომლების დაფინანსება - როგორც გაირკვა, ისინი ევროპის პარლამენტის ფონდიდან ფულს საკუთარი პარტიის წევრებს ურიცხავდნენ. ბრალდებულები ამტკიცებდნენ, რომ თანხების გამოყენების მეთოდი კანონიერი იყო.
ლე პენის ადვოკატი როდოლფ ბოსელუტი ამბობს, რომ მისი კლიენტი განაჩენს გაასაჩივრებს.
ცნობისთვის, ევროპარლამენტის წევრებს გამოეყოფათ თანხები ხარჯების დასაფარად, მაგრამ მათი გამოყენება პარტიული საქმიანობის დასაფინანსებლად დაუშვებელია.
სასამართლოში ლე პენმა პროკურორებს ბრალი დასდო, რომ მათ მისი "პოლიტიკურ სიკვდილი“ სურთ. მისი თქმით, ესაა ნაწილი შეთქმულებისა, რომლის მიზანია "ნაციონალური გაერთიანების“ ხელისუფლებაში მოსვლა არ დაუშვან.
მოსამართლის თქმით, გამოძიებამ დაადასტურა, რომ ეს არ იყო ადმინისტრაციული შეცდომები. ხდებოდა თანხების მითვისება "სისტემის ფარგლებში, რომელიც პარტიის ხარჯების შემცირებას ისახავდა მიზნად“.
სასამართლოს თავმჯდომარემ, ბენედიქტ დე პერტუისმა თქვა, რომ ლე პენის ქმედებები წარმოადგენს :სერიოზულ და ხანგრძლივ შეტევას დემოკრატიული ცხოვრების წესებზე ევროპაში, განსაკუთრებით კი საფრანგეთში“. მისივე განცხადებით, ლე პენმა და მისმა კოლეგებმა 11 წელზე მეტი ხნის განმავლობაში 4 მილიონ ევროზე მეტი გაფლანგეს.
სასამართლოს გადაწყვეტილებას ევროპაში ულტრამემარჯვენე მიმართულების ლიდერები აკრიტიკებენ.
"მარინ ლე პენის წინააღმდეგ მიღებული გადაწყვეტილება ბრიუსელის მხრიდან ომის გამოცხადების ტოლფასია. ჩვენ არ გვეშინია, არ გავჩერდებით: წინ, ჩემო მეგობარო!" - წერს იტალიის ვიცე-პრემიერი, მატეო სალვინი.
"ეს განაჩენი არამხოლოდ მარინ ლე პენს, არამედ საფრანგეთის დემოკრატიასაც გამოუტანეს“, - წერს ჯორდან ბარდელა, ეროვნული აქციის (RN) პრეზიდენტი X-ზე.
"მე ვარ მარინი“, - წერს უნგრეთის პრემიერ-მინისტრი ვიქტორ ორბანი სოციალურ პლატფორმა X-ზე.
მარინ ლე პენის წინააღმდეგ სასამართლოს გადაწყვეტილებას აკრიტიკებს ნიდერლანდების ულტრამემარჯვენე "თავისუფლების პარტიის“ თავმჯდომარე და პარტიის ლიდერი წარმომადგენელთა პალატაში, ხეერტ ვილდერსი.
"შოკირებული ვარ, მარინ ლე პენის წინააღმდეგ გამოტანილი წარმოუდგენლად მკაცრი განაჩენით. მხარს ვუჭერ და 100 პროცენტით მჯერა მისი, რომ ის მოიგებს აპელაციას და გახდება საფრანგეთის პრეზიდენტი“, - აცხადებს ხეერტ ვილდერსი.
კრემლის სპიკერის, დიმიტრი პესკოვის განცხადებით, "უფრო და უფრო მეტი ევროპული დედაქალაქი იწყებს დემოკრატიული ნორმების ფეხქვეშ გათელვას“.
ევროპაში ულტრამემარჯვენე პოლიტიკოსებზე თავდასხმებს ტრამპის ადმინისტრაციაც აკრიტიკებს. თეთრი სახლის წარმომადგენლები, განსაკუთრებით აშშ-ს ვიცე-პრეზიდენტი ჯ.დ. ვენსი, საჯაროდ უჭერდნენ მხარს ევროპაში ულტრამემარჯვენე ჯგუფებს.
ვინ არის მარინ ლე პენი?
პროფესიით იურისტი, მარინ ლე პენი 1968 წლის 5 აგვისტოს, პოლიტიკოს ჟან-მარი ლე პენის ოჯახში დაიბადა. ის 1992-1998 წლებში მუშაობდა ადვოკატად და იმხანად იცავდა არალეგალი მიგრანტების უფლებებს. დღეს კი ულტრამემარჯვენე პოლიტიკოსის ერთ-ერთი დეკლარირებული მიზანი არალეგალი მიგრანტებისგან საფრანგეთის დაცვა და ამისთვის ქვეყნის ჩაკეტვაა.
2004-2017 წლებში იყო ევროპარლამენტის წევრი. "ნაციონალური ფრონტის“ (2018 წლიდან "ეროვნული გაერთიანება“) პრეზიდენტი 2011 წლის 16 იანვრიდან 2021 წლის 13 სექტემბრამდე.
1972 წლის 5 ოქტომბერს ჟან-მარი ლე პენმა დააარსა "ეროვნული ფრონტი". მარინ ლე პენის მამა პარტიას სათავეში 39 წლის განმავლობაში ედგა.
შეიძლება ითქვას, რომ მარინი პოლიტიკაში მემკვიდრეობით მოვიდა და პარტიაში მამა ჟან მარი ლე პენი შეცვალა. ჟან-მარის პოლიტიკისა და მისი ქსენოფობიური და რასისტული გამონათქვამების გამო, "ნაციონალური ფრონტი" გარკვეული დროის განმავლობაში აკრძალულიც იყო.
მარინ ლე პენი იყო პრეზიდენტობის კანდიდატი 2012, 2017 და 2022 წლების საპრეზიდენტო არჩევნებში.
იხილეთ ასევე:
- 4 წლით თავისუფლების აღკვეთა და 100 000 ევროს ჯარიმის გადახდა დაეკისრა - მარინ ლე პენს საჯარო თანამდებობის დაკავება 5 წლით აეკრძალა
- შალვა პაპუაშვილი მარინ ლე პენზე: "არ მინდა საფრანგეთის შიდა საქმეებში ჩავერიო, მაგრამ, ნურც საფრანგეთი ჩაერევა საქართველოს შიდა საქმეებში - აქ დაბალი ღობე არავინაა"
