17 მარტიდან ვოლტერის ფილოსოფიური მოთხრობების კრებული „უვიცი ფილოსოფოსი“ სპეციალურ ფასად, 10 ლარად გაიყიდება. მოთხრობები „პალიტრა L-ის“ სერიის „კიდევ 15 წიგნი, რომელიც უნდა წაიკითხო სანამ ცოცხალი ხარ“ ფარგლებში გამოიცემა და მისი ბოლო, მე-15 ტომი იქნება.
"უვიცი ფილოსოფოსი" განმანათლებლური ეპოქის ერთ-ერთი მნიშვნელოვანი ნაშრომია, რომელიც აზროვნების თავისუფლების, რელიგიური სკეპტიციზმისა და კრიტიკული მსჯელობის საკითხებს ეხება. ავტორი განიხილავს ღმერთის, რელიგიის, ფანატიზმისა და ადამიანის გონების როლს, რაც დღევანდელი მსოფლმხედველობის ჩამოყალიბებისთვისაც მნიშვნელოვანია. ვოლტერი კითხვებს სვამს, რომლებიც გვაიძულებს, დავფიქრდეთ ცოდნის წყაროებზე, მეცნიერების მნიშვნელობაზე და წინასწარგანწყობების გავლენაზე ჩვენს მსოფლმხედველობაზე. ამასთან, ის ოსტატურად იყენებს ირონიას და სატირას, რაც ტექსტს არა მხოლოდ სასარგებლოს, არამედ სასიამოვნო საკითხავსაც ხდის.
ვოლტერის ფილოსოფიური მოთხრობები, მიუხედავად იმისა, რომ ზოგადსაკაცობრიო და რთულ თემებს აერთიანებს, მარტივი და სასიამოვნო საკითხავია. აქ ერთმანეთს ერწყმის ფანტასტიკა და სატირა, მსჯელობები რელიგიასა და სიკეთეზე და ასევე, რაც ყველაზე მნიშვნელოვანია, ცოცხალი და საინტერესო მოსაზრებები სამყაროსა და ადამიანის შესახებ, რომლებიც ამდენი საუკუნის შემდეგაც არ კარგავს აქტუალობას. კრებული „უვიცი ფილოსოფოსი“ ვოლტერის ფილოსოფიური მოთხრობების ყველაზე სრული გამოცემაა ქართულად. ამ წიგნით შეივსება ის სიცარიელე, რომელსაც ქართულ ლიტერატურულ სივრცეში განმანათლებლობის ერთ-ერთი ყველაზე მნიშვნელოვანი წარმომადგენლის, ვოლტერის ტექსტების არარსებობა ქმნიდა. მოთხრობები ქართულად თარგმნა ვალერი ოთხოზორიამ, რომელიც შეეცადა, ქართულად გადმოეტანა ვოლტერის ლაღი და დინამიკური თხრობა, სარკაზმი და იუმორი და, ამასთანავე, შეენარჩუნებინა ორიგინალის სულისკვეთება.
17 მარტიდან წიგნი სპეციალურ ფასად ხელმისაწვდომი იქნება როგორც „პალიტრა L-ის“ ვებგვერდსა და „ბიბლუსის“ მაღაზიათა ქსელში, მთელი საქართველოს მასშტაბით.
R
