"2019 წელს გადაწყვეტილი იყო გახარიას შს მინისტრობიდან გადაყენება, 15 წუთი ითხოვა და 15 წუთის განმავლობაში გაისმა ზარი “დიფ სტეიტიდან“ - ირაკლი კობახიძე

საქართველოს პრემიერ-მინისტრმა ირაკლი კობახიძემ დღეს მედიის შეკითხვებს უპასუხა. ვახტანგ გომელაურის დასანქცირების შესახებ დასმული კითხვისას, მან პარალელი წინა მოვლენებთან გაავლო და განაცხადა, რომ აქციების მართვისას საქართველოს 2 ყოფილი შინაგან საქმეთა მინისტრი, ვანო მერაბიშვილი და გიორგი გახარია ბევრად არაადეკვატურ გადაწყვეტილებებს იღებდნენ, თუმცა მათ სანქციები არავინ დაუწესა, რადგან როგორც კობახიძე ამბობს, "ორივე დიფ სტეიტის აგენტია".

“თვალები დათხარეს ადამიანებს, ეს გამოიწვია გახარიამ, მისმა ქმედებებმა გაკეთა ეს ყველაფერი, როდესაც საერთოდ შეიძლებოდა თავიდან ყოფილიყო აცილებული.

ასევე ვახსენე მერაბიშვილი, რომელმაც მშვიდობიანი აქციის პროცესში 4 კაცი მოკლა და ჯიხურებზე განათავსა. ისინი არ დაუსანქცირებიათ. რატომ? - იმიტომ რომ მერაბიშვილი და გახარია, ორივე არიან ე.წ. დიფ სტეიტის აგენტები. განსხვავებით ვახტანგ გომელაურისგან, რომელიც ემსახურება არა უცხო ძალებს, არამედ ქართულ სახელმწიფოს", - განაცხადა კობახიძემ.

• მისი თქმით, “ქართული ოცნება“ გახარიას პოლიტიკური მოღვაწეობით 2019 წლიდან უკმაყოფილო იყო, თუმცა მისი გადაყენება დროში კონკრეტული მიზეზების გამო გაიწელა.

"2019 წლის ივნისში გუნდში გადაწყვეტილი იყო გიორგი გახარიას შს მინისტრობიდან გადაყენება. ეს იყო ჩვენი მოთხოვნა, მეც ვიზიარებდი ამ მოთხოვნას და გუნდის არაერთი წევრი ითხოვდა ამას. მიგვაჩნდა, რომ მიზანშეწონილი იყო ქვეყნისთვის მისი გადადგომა.

თუმცა, როგორც კი ეს გადაწყდა, მაშინ 15 წუთი ითხოვა გახარიამ მოსაფიქრებლად. ამ 15 წუთის განმავლობაში გაისმა ზარი “დიფ სტეიტიდან“. მერე გაგრძელდა ეს პროცესები. ჩვენ ტაქტიკურადაც სწორად ვიმოქმედეთ და მოხდა ისე, რომ გახარიასგან გათავისუფლდა ჩვენი გუნდი და ჩვენი ქვეყანა. მოვლენები დაუბრუნდა იმ კალაპოტს, რომელსაც უნდა დაბრუნებოდა,“ - განაცხადა ირაკლი კობახიძემ.

.