"გვაბულინგებთ ყველაფერზე: დაუწერელ სტატუსზე, დაწერილ სტატუსზე... თქვენ რას აკეთებთ თქვენი კოლეგების უსაფრთხოების დასაცავად?" - "იმედის დღის" წამყვანების მიმართვა

ბოლო დღეების მანძილზე არაერთი მასალა გამოქვეყნდა ჩვენს პლატფორმაზე, სადაც მიმდინარე პოლიტიკური მოვლენების გამო, სხვადასხვა ტელევიზიების წამყვანებს შორის დაპირისპირებაზე გიყვებოდით. მასიური ბულინგის ობიექტები მაინც ტელეკომპანია „იმედის“ წამყვანები და ჟურნალისტები არიან. მათ ხშირად მოუწოდებენ სოციალურ ქსელში, რომ ტელევიზია დატოვონ და საჯაროდ გაემიჯნონ არხის პოლიტიკას.

• გადაცემის "იმედის დღე" დღევანდელ ეთერი წამყვანებმა სწორედ ამ თემას მიუძღვნეს. ეთერში გავიდა სიუჟეტი სახელწოდებით – „ბულინგი „იმედის“ სახეებზე“, სადაც აღნიშნული მედიასაშუალების თანამშრომლები იმ ბულინგზე საუბრობენ, რომელსაც, მათი თქმით, ქვეყანაში მიმდინარე მოვლენების ფონზე, საზოგადოების გარკვეული ნაწილის მხრიდან განიცდიან.

სიუჟეტის დასრულების შემდეგ, „იმედის დღის“ წამყვანებმა ბულინგის თემას ისაუბრეს იმ კოლეგებს მიმართეს, რომლებიც მათ მიმართ კრიტიკას არ იშურებენ.

ნუცა ქავთარაძე:

- მიუხედავად იმისა, რომ არაერთხელ მაქვს ეს ისტორიები მოსმენილი და საკუთარ თავზე განვლილი. ამ რეპორტაჟს უემოციოდ ვერ ვუყურე. ვერ შევეჩვიე ამ ამბების მოსმენას, იმ კომენტარების წაკითხვას რასაც ყოველდღე სოციალურ ქსელში ვხვდებით. ერთი კითხვა მაქვს და მინდა მივმართო სხვა არხებზე დასაქმებულ ჩემს კოლეგებს, რომელთა უმრავლესობასაც ჯერ კიდევ პატივს ვცემ და რომელთა იმედიც მაქვს – ასეთ დროს, როდესაც უყურებთ, ქუჩაში რას უშვრებიან ჩვენს კოლეგებს, თქვენს კოლეგებს "იმედის“ ტელეარხიდან, რას აკეთებთ? რომელმა ერთმა დაგმეთ რომელიმე საქციელი მოქალაქეების და თქვენივე კოლეგების ? მართლა მაინტერესებს.

როდესაც არ წყდება ბულინგი არც ერთი მიმართულებით, გვაბულინგებთ ყველაფერზე: დაუწერელ სტატუსზე, დაწერილ სტატუსზე, არ ვიცი, გამოთქმულ განსხვავებულ აზრზე, თქვენ რას აკეთებთ თქვენი კოლეგების უსაფრთხოების დასაცავად და იმის დასაცავად, რომ მათ თქვენსავით, როგორც ჩვენ მოვუწოდებთ ყველას და ყველაფერს ყოველთვის, რომ თქვენი უსაფრთხოება უნდა იყოს დაცული, საქმეები უნდა იყოს გამოძიებული და უსაფრთხო გარემოში უნდა იმუშაოთ, აი ამ დროს, თქვენ რას აკეთებთ?… მეტს ვერაფერს ვერ ვიტყვი, იმიტომ, რომ უემოციოდ ამ ყველაფერს ვერასოდეს ვერ ვისმენ ბოდიში.

მარიკა ბაკურაძე:

- მე მოლოდინი მაქვს, რომ ეს შეკითხვა ღიად დარჩება, მაგრამ კარგი იქნება, რომ ამაზე პასუხი მოგვესმინა. მე, პირადად, მოწმე ვარ იმისა, რომ ძალიან დიდი განსხვავებაა სოციალურ ქსელსა და რეალობას შორის. მე ხშირად დავდივარ გადაღებებზე, რეგიონებში, სოფლებში, სხვადასხვა რაიონულ ცენტრებში. ბოლო 2 წლის და, განსაკუთრებით, ბოლო თვეების განმავლობაში, ადამიანები ჩემთან მოდიან და პირდაპირ მეუბნებიან: „ქალბატონო მარიკა, ყურადღება არ მიაქციოთ, იქ რას გიწერენ“. ამით ძალიან ზუსტად ჩანს სურათი, თუ რა არის რეალურად ხალხი, რადგან ხალხის სახელით სოციალურ ქსელში გარკვეული ჯგუფები საუბრობენ, ის სხვა რამეა. ხალხი არის ის, ვინც ჩვენი მაყურებელია, ვინც ქუჩაში მხვდება, ხალხი არის ჩვენი რეიტინგი და ხალხი არის მთელი ქვეყანა, რომელიც ამ ყველაფერს პირადად მეუბნება.

ვასიკო ოდიშვილი:

- ე.წ. ბულინგს დამუნათებას დავარქმევდი. დამუნათება და შეურაცხყოფა ერთმანეთში არ აგერიოთ. ის რაც დღეს ხდება, როდესაც უკვე გაგინებენ, ეს ბულინგი არ არის, ეს შეურაცხყოფაა, მეტსაც გეტყვით, ეგ ცუდი საქმეა და მაგას პასუხიც შეიძლება მოჰყვეს… ეს ისე...

ვინც მართულია, ვინც რაღაცას აყოლილია და ვინც ამას შეგნებულად, ან დავალებით აკეთებს, ის ვერასდროს გაიაზრებს, რომ ეს ყველაფერი დამთავრდება, მერე, მიხვდებით რა აკეთეთ, ვისაც მიხვედრა შეგიძლიათ და დარწმუნებული ვარ, რომ გეწყინებათ და არ მოგეწონებათ საკუთარი საქციელი.

მე მინდა, რომ მივუტევო ყველას, ვინც ამ საქმეშია ჩართული ნებსით თუ უნებლიედ, სულ ცოტა ხანში ყველაფერს გაარკვევთ და მერწმუნეთ, თქვენ თვითონ შეგრცხვებათ.

ნუცა ქავთარაძე: მოვა დრო და ეს სიძულვილი სამარცხვინო გახდება, მე ამის იმედი მაქვს... ჩვენი პასუხი ყოველთვის ისმის პირდაპირი ეთერის საშუალებით, როდესაც მივმართავთ ჩვენს მაყურებელს და ის რომ ძალიან ბევრს უნდა ჩვენი მოსმენა, ამას მოწმობს რეიტინგები, რასაც ყოველდღე ვუყურებთ.

მარიკა ბაკურაძე: ჩვენ არაფრის არ გვრცხვენია, უბრალოდ არის რაღაცები, მორალური ზღვარი და რაღაცები რასაც არ ვკადრულობთ და არ ვაბიჯებთ, თორემ ეს იმას არ ნიშნავს, რომ პასუხი არ გაგვაჩნია. ჩვენ გვაქვს მაყურებლის და ნამდვილი ხალხის პატივისცემა.