ვიეტნამის ერთ-ერთ უმდიდრეს ქალს სიკვდილით დასჯა ემუქრება - სკანდალური საქმის დეტალები

ვიეტნამის ერთ-ერთმა უმდიდრესმა ქალმა - ტრუონგ მაი ლანმა, რომელიც თაღლითობის მუხლით გაასამართლეს, სააპელაციო სასამართლო წააგო და სიკვდილით დასჯა ემუქრება. მას სასჯელის თავიდან აცილება იმ შემთხვევაში შეუძლია, თუ სახელმწიფოს 9 მლრდ დოლარს გადაუხდის.

• ვიეტნამის კანონმდებლობით, თუ ეკონომიკური დანაშაულისთვის გასამართლებული პირები თაღლითური გზით მითვისებული თანხის 75%-ს დააბრუნებენ, სიკვდილით დასჯის თავიდან აცილება შეუძლიათ.

68 წლის ტრუონგ მაი ლანს სიკვდილით დასჯა აპრილში მიუსაჯეს.

სასამართლომ დაადგინა, რომ მან 2011- 2022 წლებში Saigon Commercial Bank-გან 304 ტრილიონი VND (დაახლოებით 12,5 მილიარდი აშშ დოლარი) სესხების სახით მიიღო. მითვისებული თანხა შეადგენს ვიეტნამის მთლიანი შიდა პროდუქტის თითქმის 3%-ს 2022 წლის მონაცემებით. ამავდროულად, მისი ქმედებების ჯამური ზარალი 27 მილიარდ დოლარად არის შეფასებული.

მიუხედავად დაცვის მხარის არგუმენტებისა, სასამართლომ მსჯავრდადებულს სასჯელი არ შეუცვალა. თუმცა, მას ჯერ კიდევ აქვს შესაძლებლობა, პრეზიდენტს შეწყალება მოსთხოვოს.

ზუსტად როდის იგეგმება სასჯელის აღსრულება უცნობია: ვიეტნამი სიკვდილით დასჯას სახელმწიფო საიდუმლოდ განიხილავს და ამის შესახებ მონაცემებს არ აქვეყნებს. როგორც წესი, სიკვდილით დასჯა მსჯავრის დადებიდან რამდენიმე წლის შემდეგ აღესრულება.

გარდა ტრუონგ მაი ლანისა, სისხლის სამართლის საქმეში კიდევ 85 ადამიანი იყო ჩართული, მათ შორის მისი ქმარი და დისშვილი. ყველა მათგანი დამნაშავედ იქნა ცნობილი.

წყარო