ილონ მასკი და პუტინი 2022 წლის ბოლოდან რეგულარულად საუბრობენ - რას წერს Wall Street Journal მათი საუბრის დეტალებზე?
SpaceX-ის მფლობელი, მილიარდერი ილონ მასკი და კრემლის ლიდერი, ვლადიმერ პუტინი ბოლო ორი წლის განმავლობაში რეგულარულად ურთიერთობდნენ და გეოპოლიტიკურ დაყოფებზე, ბიზნესსა და პირად საკითხებზე საუბრობდნენ. ამის შესახებ Wall Street Journal აშშ-ის, ევროპისა და რუსეთის მოქმედ და ყოფილ ოფიციალურ პირებზე დაყრდნობით წერს.
- როგორც გამოცემას საკითხის შესახებ ინფორმირებულმა ორმა პირმა უთხრა, ერთ-ერთი საუბრისას პუტინმა მასკს სთხოვა, რომ ჩინეთისთვის ანგარიშის გაწევის მიზნით, არ ჩაერთო თავისი Starlink-ის სატელიტური ინტერნეტ სერვისი ტაივანში. როგორც რუსეთის დაზვერვის ყოფილმა ოფიცერმა განაცხადა, ეს პუტინმა მასკს გასული წლის ბოლოს სთხოვა.
გამოცემის თანახმად, Starlink-ს ტაივანში ინტერნეტ მომსახურების გაწევის ნებართვა არ აქვს. Starlink-ის რუკაზე ნაჩვენებია, რომ სერვისის ჩაშვების თარიღი ამ დროისთვის უცნობია.
საუბრების შესახებ იციან აშშ-ის დაზვერვაში და აცხადებენ, რომ "მათ ეს არ მოსწონთ".
- აღსანიშნავია, რომ ილონი დონალდ ტრამპის საარჩევნო კამპანიაში ცენტრალური ფიგურა გახდა და 45-ე პრეზიდენტთან ერთად საჯარო გამოსვლაზეც გამოჩნდა.
პუტინთან მასკის კავშირების შესახებ კითხვის საპასუხოდ, ტრამპის კამპანიამ Tesla-ს აღმასრულებელი დირექტორი შეაქო, როგორც "თაობაში ერთხელ დაბადებული ინდუსტრიის ლიდერი", ამასთანავე, ხაზი გაუსვა, რომ ტრამპი "აღადგენს მშვიდობას მძლავრი საგარეო პოლიტიკით, რათა შეაკავოს რუსეთის აგრესია და დაასრულოს ომი უკრაინაში".