ღვინო ექსპერიმენტული და გაბედული ხასიათით - „ქართული მზე“ 12 ოქტომბერს ღვინის ფესტივალზე გიმასპინძლებთ

12 ოქტომბერს „ქართული ღვინის ფესტივალზე“ წარმოდგენილი იქნება ექსპერიმენტული ღვინო „ქართული მზე“ (Georgian Sun), რომელიც თავისი განსაკუთრებული გემოვნური თვისებებით არის ცნობილი.

ბრენდის 4 სახეობა: „თიბათვის მზე”, „გაზაფხულის მწვანე“, „დაისის წითელი“ და „წითელი ძოწი“ კარგად გამოხატავს ღვინის საინტერესო, გაბედულ ხასიათს. თითოეულ სახეობაში განსხვავებულ არომატებს, ცოცხალ შეფერილობასა და დაბალანსებულ, მაგრამ ამავდროულად ცინცხალ გემოებს აღმოაჩენთ. თითოეული ბოთლი საქართველოს სხვადასხვა რეგიონში გამოგზაურებთ.

„ქართული მზე“ საუკეთესო თანამგზავრია და უხდება ნებისმიერ შეკრებასა თუ ადგილს. იგი „ვაზისუბნის მამულის“ ქვებრენდია და ბაზარზე 2018 წლიდან გამოჩნდა. ბრენდის ქვეშ იწარმოება ბლენდები და კუპაჟები, რომელიც გამოირჩევა უნიკალური შეფერილობითა და გემოვნური თვისებებით. მაგალითად, „ქართული მზის“ ასორტიმენტში შეხვდებით რქაწითლისა და მწვანის კუპაჟს, საფერავისა და ალექსანდროულის ბლენდს და სხვა.

როგორც ქართული ღვინის ჰოლდინგის აღმასრულებელი დირექტორი გია მშვიდობაძე განმარტავს, „ქართული მზე“ ყველაზე გაყიდვადი ღვინოა კომპანიისთვის.

„ქართული მზე“ წარმოდგენილია როგორც საქართველოში, ისე მსოფლიოს 12 ქვეყანაში, მათ შორის აშშ-ში, ბრაზილიაში, ნიდერლანდებში, გერმანიაში, პოლონეთში, იაპონიასა და სამხრეთ კორეაში.

„პირველი ყველაზე დიდი ბაზარი არის აშშ. ერთ კვირაში „ქართული მზე“ გამოჩნდება ისეთი დიდ და პრესტიჟულ ამერიკულ ქსელში, როგორიც არის Total wine & more. კომპანიასთან ჩვენ ერთი წელი ვმუშაობდით და საბოლოო შედეგი მიღწეულია. გარდა ამისა, აღნიშნული ღვინო აშშ-ის სხვადასხვა სპეციალიზებულ მაღაზიასა და რესტორანშიც იყიდება. პირველ ეტაპზე დაგეგმილია 27 შტატი მოვიცვათ“, - განმარტა მან.

გია მშვიდობაძის თქმით, კომპანია შეეცადა, ფასის თვალსაზრისით შეექმნა უფრო დემოკრატიული ღვინო, რომელიც სხვადასხვა მომხმარებლისთვის იქნებოდა ხელმისაწვდომი.

„ქართული მზის“ პოზიციებიდან სტატისტიკის თანახმად, ყველაზე პოპულარულია რქაწითელი-მწვანე, როგორც საქართველოში, ისე უცხოეთში“, - აღნიშნა გია მშვიდობაძემ.

ქართული ღვინის ჰოლდინგის აღმასრულებელმა დირექტორმა ქართული ღვინის ფესტივალის მნიშვნელობაზეც ისაუბრა და განმარტა, რომ ის როგორც მსხვილი კომპანიებისთვის, ისე მცირე მარნებისთვის პროდუქციის პოპულარიზაციის ერთ-ერთი საუკეთესო გზაა:

„ფესტივალში პირველად არ ვიღებთ მონაწილეობას. ვიფიქრეთ, წელსაც კარგი იქნებოდა, რომ არ გამოვაკლდეთ ჩვენს კოლეგებს და ჩვენი ღვინო კიდევ უფრო მეტმა ადგილობრივმა თუ უცხოელმა მომხმარებელმა დააგემოვნოს. ამდენად, ჩვენთვის ეს ღონისძიება მნიშვნელოვანია.

გარდა ამისა, ფესტივალი ახალ შესაძლებლობებს უხსნის მცირე მარნებსაც, რომელთაც საერთაშორისო გამოფენებში მონაწილეობის კუთხით უფრო შეზღუდული რესურსები აქვთ, ფინანსური საშუალებებიდან გამომდინარე. ზოგადად, ქართული ღვინის მიმართ ინტერესი გაზრდილია, პლუს ამას ემატება ტრენდი, რომ მცირე მარნების მიერ წარმოებული ღვინისადმი მოთხოვნა გაიზარდა და ვფიქრობ, ეს ფესტივალი მათთვის კარგი შესაძლებლობაა, წარმოაჩინონ თავიანთი თავი და იპოვონ პოტენციური მყიდველები როგორც ჰორეკა სექტორში, ისე საცალო ბაზარზე“, - განმარტა გია მშვიდობაძემ.

„ქართული მზის“ შესახებ მეტი ინფორმაციის მისაღებად და ღვინის შესარჩევად მიჰყევით ბმულს. ამასთან შეგახსენებთ, რომ „ქართული ღვინის ფესტივალი“ 12 ოქტომბერს თბილისში, სიონის ქუჩაზე გაიმართება. ღონისძიება 12:00-დან 20:00 საათამდე გაგრძელდება და წარმოდგენილი იქნება როგორც მსხვილი და მცირე მეწარმეების ტრადიციული და ექსპერიმენტული ღვინის სახეობები, ისე ქართული ნუგბარი და სხვა პროდუქცია. ფესტივალის ფარგლებში გაიმართება სომელიეს მასტერკლასი ღვინის შერჩევასთან დაკავშირებით, ქართული ჰანგები კი სტუმრების სასიამოვნო განწყობაზე იზრუნებს.

არ გამოტოვოთ შემოდგომის მთავარი ღონისძიება და გაიგეთ მეტი ქართული ღვინის შესახებ!

R