"მერაბმა ჩემი ოჯახის წევრებს აქეთ უჩივლა, რა მონანიება... ერთი თვეა ჯოჯოხეთში ვცხოვრობთ, ვიდეოს ბოლომდე ვერ ვუყურე" - რას ჰყვება 12 წლის მოზარდის პოლიტიკოსი მამა?
უმძიმესი ვიდეო, სადაც ჩანს, როგორ სცემს ბათუმის მოსწავლე ახალგაზრდობის სასახლეში ქორეოგრაფი 12 წლის მოზარდს, გუშინ „ბათუმელებმა“ გაავრცელეს. მასწავლებელი, რომლის კადრებმა დილიდან სოციალური ქსელები მოიცვა, მერაბ დოლიძეა. მას ცეკვის მასწავლებლად მუშაობის 25-წლიანი გამოცდილება აქვს. ის სამსახურიდან უკვე გაათავისუფლეს.
პედაგოგი 2000 ლარიანი გირაოთი გაათავისუფლა ასევე ბათუმის საქალაქო სასამართლომ. ვიდეოში, სადაც 12 წლის ბიჭზე მერაბ დოლიძე ფსიქოლოგიურად და ფიზიკურად ძალადობს, ჩანს, რომ სხვა ბავშვებიც ესწრებიან.
Ambebi.ge-სთან ინტერვიუში დოლიძე ამბობს, რომ მომხდარს ნანობს. მისი თქმით, ოჯახს პატიებაც სთხოვა...
- სხვა რამეს გვიყვება მოზარდის მამა გოჩა მელაძე, რომელიც წლებია პოლიტიკაშია. ბატონი გოჩა ოცნების მთავრობის დროს ხულოს მუნიციპალიტეტის მერი იყო. ახლა კი გიორგი გახარიას „საქართველოსთვის“ წარმოადგენს.
პოლიტიკოსი, რომელიც წლებია სხვის ოჯახებს იცავს, ამბობს, რომ საკუთარი ოჯახი ვერ დაიცვა და იმისთვის, რომ მოძალადე ქორეოგრაფი დამსახურებულად დაისაჯოს, მედიის ჩარევა დასჭირდა.
- ერთი თვეა ჯოჯოხეთში ვცხოვრობთ, ეს ფაქტი 10 სექტემბერს მოხდა. იმ დღეს, მეუღლის თხოვნით, ცეკვიდან ბავშვის გამოსაყვანად ოჯახის რძალი მივიდა. ჩემი შვილი განერვიულებული და ნამტირალევი დახვდა. რძალმა ჩემს მეუღლეს დაურეკა და უთხრა, რომ ბიჭი პედაგოგმა სცემა. მეუღლემ სთხოვა, არ წასულიყო, მეც მოვალ და გავარკვევ, რაშიაო საქმე. მერაბ დოლიძე ჩემს რძალს ძალიან აგრესიულად ესაუბრა, 15 წუთში, როდესაც მეუღლე მივიდა, ეს კაცი წასული დახვდა.
- თქვენ როგორ გაიგეთ მომხდარის შესახებ?
- როდესაც დამირეკეს, სამსახურში ვიყავი. ადრე ჰქონდა ამ კაცს ბავშვებთან თავში წამორტყმის ფაქტები. ჩემი დის შვილიც იქ სწავლობს. მივედი, გავაფრთხილე, რომ არასწორი იყო ასეთი საქციელი. მშვიდობიანად დავშორდით. ამიტომ ოჯახს ვუთხარი, არ ინერვიულოთ, შეიძლება ბავშვი აზვიადებს, მე მივალ და ვნახავ-მეთქი.
მეუღლემ და ჩემმა დამ მეორე დღეს გადაწყვიტეს თავად მისულიყვნენ. დარბაზის კარზე დაუკაკუნეს, რეპეტიცია ჰქონდა. მეუღლემ აუხსნა, რომ ბავშვის დედა იყო და აინტერესებდა, რატომ სცემა მისი შვილი. პედაგოგი მაშინვე შეტევაზე გადმოვიდა, იქამდეც მივიდა საქმე, რომ ჩემი და იძულებული გახდა, პოლიციაში დაერეკა. მეუღლემ მითხრა, შუაში ჩავდექიო, ტელეფონს ხელიდან მართმევდა, არ დამღუპოო.
მე რომ დამირეკეს, უკვე განყოფილებაში იყვნენ. გამოძიება დაიწყო, ამოიღეს ჩანაწერები, რომელიც მაშინ ჩვენთვის არ მოუციათ. ბავშვის ექსპერტიზა ექვსი დღის შემდეგ დაინიშნა. პროკურატურაში მივედი და ვუთხარი, რომ პატიმრობას ვითხოვდი და ქორეოგრაფი უმკაცრესად უნდა დასჯილიყო. წლებია, რაც სხვების ოჯახებს ვიცავ და გამოდის, ჩემი ოჯახი ვერ დამიცვია-თქო. ეს უნდა იყოს სამაგალითო და უნდა დაისაჯოს კანონის სრული სიმკაცრით-მეთქი. მეორე დღეს სხვა პროკურორი მოვიდა, რომელმაც სასამართლოს 5 ათას ლარიანი გირაოთი მიმართა. ბათუმის საქალაქო სასამართლოს მოსამართლემ თამარ ბეჟანიშვილმა 2 ათას ლარიანი გირაოთი გამოუშვა ეს სამარცხვინო არსება გარეთ. მერაბ დოლიძემ შემდეგ აიყვანა ადვოკატი, რომელმაც ჩემი ოჯახის წევრებს აქეთ უჩივლა. რის მონანიება, საპასუხო საჩივარი შეიტანა.
- ის ასევე ამბობს, რომ დედა ჰყავდა გარდაცვლილი და ნერვები ვერ მოთოკა, ასევე აღნიშნავს, რომ კონფლიქტამდე თქვენი შვილი სხვა ბავშვს სცემდა?
- ნამდვილად გიდასტურებთ, რომ ბავშვებს შორის რაღაც მოხდა. ის ბავშვი დიდი ხნის მოცეკვავე იყო, ჩემი შვილი ახალი მისულია. შელაპარაკება მოხდა, რომ ჩემი შვილი რაღაც ილეთს ვერ აკეთებდა და ბავშვებმა იჩხუბეს. ეს იყო რიგითი ბავშვების ქიშპობა. ჩემი ოჯახი მივიდა იმ ბავშვის მშობლებთან და გაოგნებულები არიან. ამ დროს, ამ კაცმა იმის მშობლებს შეუთვალა, ხომ ნახეთ, თქვენი შვილის გამო რა დამემართა და ახლა თქვენც იმოქმედეთო.
- რას ამბობენ სხვა მშობლები, იქამდეც ძალადობდა პედაგოგი ბავშვებზე?
- დიახ, სრული პასუხისმგებლობით ვამბობ, რომ ძალადობდა. იყო თავში წამორტყმები, პულტის დარტყმები. პირად საუბრებში ყველა ადასტურებს, ყველა ელოდება, რომ დაისაჯოს, მაგრამ პოლიციაში მისვლა და გამოძიებაში ჩართვა არ სურთ. მეტსაც გეტყვით, ჩემს დას უთხრა მერაბმა, რომ დარბაზში ფანჯრის რაფასთან მყავდა და იქ კამერები ვერ ხედავს და ფეხებსაც ვერ მომჭამთო. მესმის ფაქტია, ყველგან ყველაფერი ხდება, მაგრამ სახელმწიფოს ვთხოვ მართლმსაჯულებას.
- ვიდეო როგორ გახდა საჯარო?
- მე მივიტანე "ბათუმელებში". ვუთხარი, რომ გამორიცხულია ამ ფაქტს ისე არ დავტოვებ-თქო და დახმარება ვთხოვე. საქმე საქმეზე რომ მიდგება, მშობლებს, ქალაქს ვთხოვ დახმარებას, გენერალური პროკურატურაში ჩავალ და იქ გავმართავ ბრიფინგს. სამი შვილი მყავს და მხოლოდ 7 წამიანი მონაკვეთი ვნახე და ბოლომდე ვერ ვუყურე.
- ხულოს ყოფილი მერი ხართ, ახლა პარტია "საქართველოსთვის" წევრი, ამას ხომ არ აბრალებთ, რომ სათანადო ყურადღებას არ გაქცევენ?
- მე მთელი ექვსი წლის განმავლობაში შევიწროების მეტი არაფერი მინახავს, მაგრამ ამ კონკრეტულ ფაქტზე მტკიცებულება არ მაქვს. ჩემი შვილი ნებისმიერი მაღალჩინოსნის შვილი რომ ყოფილიყო, არ მომიწევდა საჯაროდ გამოსვლა და ეგ კაცი მიიღებდა დამსახურებულ სასჯელს.
- ბავშვი ახლა რა მდგომარეობაშია?
- ფსიქოლოგები ჩავრთეთ, რადგან მამიდას მოუყვა, რომ სიზმარში ნახა, როგორ ავიდა მასწავლებელი ავტობუსში, არ მინდა ციხეშიო და მცემაო. ლაღი, ცელქი ბავშვია, ცეკვაზე იმიტომ მივიყვანე, რომ მერე ძიუდოზე შემეყვანა, მუხლები გაუმაგრდეს-თქო. ეს ხომ რაღაც კერძო სტრუქტურა არ იყო, ქალაქის ცენტრში მდებარე სასწავლებელში, სახელმწიფოს მივაბარე ბავშვი, სადაც ასე მოექცნენ. ამ საქმეს აუცილებლად მივიყვან ბოლომდე. მაქსიმალურად შევინარჩუნე სახე და სახელმწიფოს მივანდე მართლმსაჯულება. პარლამენტის წინ, თუნუქის ფურცლის გაჭრაზე ციხეში იჭერენ ბავშვებს და რატომ უნდა გამოუშვან 2 ათას ლარიანი გირაოთი 12 წლის ბავშვზე მოძალადე ადამიანი.
წაიკითხეთ ასევე: