გულშემატკივრების ზღვა, გადავსებული აეროპორტი და გაოცებული ჩემპიონი - როგორც დახვდნენ ქართველები მერაბ დვალიშვილს, რომელმაც სამშობლოში UFC-ის სანუკვარი ქამარი ჩამოიტანა
UFC-ის ჩემპიონი, მერაბ დვალიშვილი საქართველოშია.
მას აეროპორტში ქართველი და უცხო ქვეყნის გულშემატკივრები დახვდნენ. ხალხმრავლობის გამო, დაძაბულ მოლოდინთან ერთად, აეროპორტის მოსაცდელ დარბაზში საზეიმო მუხტი სუფევდა.
მერაბ დვალიშვილს, რომელმაც სამშობლოში UFC-ის სანუკვარი ქამარი ჩამოიტანა, ქართველი მომღერლებიც შეეგებნენ.
- “ამას არაფერი შეედრება, მთელი ცხოვრება ამაზე ვოცნებობდი და ქამარი ჩემია.
მინდა, რომ ქართველებთან ერთად შევიგრძნო ეს გამარჯვება. არსად არ იგრძნობა გამარჯვება ისე, როგორც სამშობლოში და მადლობა ყველას. ეს ჩვენი საერთო გამარჯვებაა და კიდევ ბევრჯერ გავაკეთებ იმას, რაც გასაკეთებელია,“ - განაცხადა დვალიშვილმა მედიასთან.
საქართველოს UFC-ის კიდევ ერთი ჩემპიონი ჰყავს. ილია თოფურიას შემდეგ, ჩემპიონის ქამარი მერაბ დვალიშვილმა მოიპოვა.
ქართველი მებრძოლი საჩემპიონო ბრძოლაში შონ ო'მალის დაუპირისპირდა. უშაღავათო ბრძოლა მერაბ დვალიშვილის სრული დომინაციით წარიმართა და საბოლოოდ, ქართველის გამარჯვებით დასრულდა. მერაბ დვალიშვილი მეორე ქართველი მებრძოლია, რომელიც UFC-ის ჩემპიონი გახდა.
შეგახსენებთ, რომ 2024 წლის თებერვალში ქვემსუბუქი წონის ჩემპიონი ილია თოფურია გახდა.
33 წლის დვალიშვილი ქამრისთვის ბრძოლამდე 10-მატჩიანი მოგებათა სერიით მივიდა. მან UFC-ის სამი ყოფილი ჩემპიონი – ჟოზე ალდო, პიტერ იანი და ჰენრი სეხუდო დაამარცხა.
რაც შეეხება მის მეტოქეს, 29 წლის ამერიკელმა სუპერმსუბუქი წონის ქამარი 2023 წლის აგვისტოში მოიპოვა და მიმდინარე წლის მარტში წარმატებით დაიცვა. დვალიშვილის ბრძოლა ქამრისთვის ლას ვეგასში, "სფეროს“ უნიკალურ არენაზე ჩატარდა.
იხილეთ ასევე: