"2 წელია მასში ცხოვრობს და რატომ მოუნდა ამ სიცრუის გავრცელება? მათ აქვთ 2 დიდი სახლი, ოფიციალურად გაფორმებული" - რას აცხადებს წალენჯიხის ვიცე-მერი მამუკა ხაზარაძის მიერ კაკაჩიებისთვის გადაცემულ ქონებაზე?

ამ ცოტა ხნის წინ, წალენჯიხის მაცხოვრებელმა დავით კაკაჩიამ მედიასთან საუბარში განაცხადა, რომ მისი ოჯახი მამუკა ხაზარაძემ მოატყუა, კერძოდ კი, დაპირებული ორი ბინის ნაცვლად, ორ ოჯახს ბიზნესმენმა და პოლიტიკოსმა მხოლოდ ერთი ბინა გადასცა.

"ჩემი ოჯახი მოტყუებული აღმოჩნდა იმიტომ, რომ რაღაც თაღლითური რაღაცა გააკეთეს. ჩემს ძმას ცალკე ნომერი ჰქონდა, დედაჩემს და მე ცალკე ნომრები გვქონდა და ცალკე ვცხოვრობდით. მერე ჩემი ძმა ცუდად გახდა, შშმ პირია, წევს, თვითონ არ შეუძლია გადაადგილება. არ ვიცი, როგორ ქნეს, დამირეკეს და ხელი მომაწერინეს, ვითომ ერთად ვართ და, ორი სახლის ნაცვლად, მოტყუებით, მოგვცეს ერთი“, - განაცხადა დავით კაკაჩიამ ჟურნალისტთან საუბრისას.

როგორც ირკვევა, "ლელოს" ლიდერმა მამუკა ხაზარაძემ ორი წლის წინ წალენჯიხაში ყოფილი კოლმეურნეობის შენობა და მიწის ფართი შეისყიდა, ხოლო შენობაში ათწლეულების განმავლობაში მცხოვრებ დევნილ ოჯახებს საცხოვრებლების ყიდვას დაჰპირდა. ამ საკითხზე ambebi.ge -ს წალენჯიხის მერის მოადგილე თამარ ბელქანიას ესაუბრება:

- 2023 წელს დასრულდა წალენჯიხაში ე.წ. პირველი მაისის კოლმეურნეობის ფართობის შესყიდვა. ეს გახლდათ ყველასგან მიტოვებული, ფაქტობრივად, ბოსლად ქცეული შენობა და ეზო, სადაც სრული ანტისანიტარია სუფევდა. შენობაში არ იყო წყალი, დენი, ბუნებრივი აირი და არც კომუნიკაციები არსებობდა. მასში 32 წლის განმავლობაში ცხოვრობდა აფხაზეთიდან დევნილი კაკაჩიების ოჯახი, რომელიც სამი სულისგან შედგება (დედა და ძმები - დავით და დიომიდე). ეკონომიკის სამინისტროსგან ძლივს შევისყიდეთ აღნიშნული შენობა და ნაკვეთი. მამუკა ხაზარაძემ, რომლის საკუთრებაცაა ეს ტერიტორია, გადაწყვიტა მათთვის ცალ-ცალკე ეყიდა სახლი. შევთავაზეთ, თავად მოეძებნათ სასურველი საცხოვრებელი. კაკაჩიებმა სახლი მონახეს ზუგდიდის მუნიციპალიტეტში, სოფელ ოდიშში. ეს გახლავთ 1415კვმ. ფართობი, სადაც ორი კაპიტალური სახლი დგას. პირველ სახლში, რომელიც მაღალ ბელეტაჟზეა, აქვს 4 ოთახი, მეორეში კი - ერთი მისაღებია, 1 საძინებელი და 2 დამხმარე ოთახი. ეს ქონება ოფიციალურად 2023 წლის მარტში გაფორმდა, კაკაჩიებს გადავეცით ქონება, სადაც ერთად შევედით და მაშინათვე შევუძინეთ საყოფაცხოვრებო ნივთები, სენსორული ეტლი დავითის ძმისთვის, რომელიც შშმ პირია, დავლოცეთ ოჯახი, დაგვხვდნენ მეგრული ხაჭაპურებით და დავიშალეთ.

არსებობს საკუთრების დოკუმენტი, რომლის ნახვის საშუალებაც ყველას აქვს. ზოგადად, არც გვქონდა ვალდებულება, მათთის ჩვენ გვეყიდა სახლი (ეს ვალდებულება ჰქონდა სამინისტროს, რომ დაეკმაყოფილებინა ეს სამი ოჯახი), ეს იყო მამუკა ხაზარაძის კეთილი ნება - ვინაიდან ისინი აფხაზეთიდან არიან, გვინდოდა ჩვენი დამოკიდებულება გამოგვეხატა, რომ გვერდში ვუდგავართ. მათ მსგავსი საკუთრება ვერასდროს ექნებოდათ...

- რა შეიცვალა შემდგომ, რატომ უარყოფს 2 ბინის ჩუქებას დავით კაკაჩია?

- გუშინ სრულიად მოულოდნელად, მას შემდეგ, რაც ე.წ. პირველი მაისის კოლმეურნეობის ტერიტორიაზე სრული დატვირთვით ამუშავდა უკვე ყველაფერი - მანანა დოიჯაშვილის მუსიკალური ცენტრი, აიტი აკადემია, ინგლისური ენის შემსწავლელი კურსები, სულ მალე იხსნება ოთარ ეგაძის თატრალური სარდაფი, ამასთანავე, იქვე, უკან 25-მეტრიანი საცურაო აუზია და პირველი შემთხვევაა, როცა წალენჯიხის მუნიციპალიტეტში არის აუზი (ეს ყველაფერი უფასოა).

რაც ახლა ხდება, ეს არის ხელისუფლების მხრიდან მამუკა ხაზარაძის საქმიანი და ადამიანური რეპუტაციის შელახვის მცდელობა, ამაში ჩართულნი არიან სახელისუფლებო მედიაარხები, რომლებიც ხელისუფლების იარაღია ამ შემთხვევაში. რამდენიმე ტელევიზიამ ერთდროულად ჩაწერ კაკაჩიას განცხადებები და ატრიალებენ. ეს არის კლასიკური მაგალითი იმისა, როგორ ცდილობენ არჩევნების წინ ოპონენტის გაშავებას. 3 წელია, რაც ეს პროექტი დავიწყეთ, ამ კაცს 2023 წელს მივეცით სახლი, 2 წელია მასში ცხოვრობს და რა დროს ეს იყო, რატომ მოუნდა ახლა ამ სიცრუის გავრცელება? კაკაჩიებს (ორივე ძმას) აქვთ 2 დიდი სახლი, ოფიციალურად გაფორმებული. ამ ეტაპზე ხელისუფლება გადასულია წალენჯიხის, როგორც ოპოზიციური მუნიციპალიტეტის და ამავე დროს მამუკა ხაზარაძის დისკრედიტაცია-გაშავებაზე. ის წალენჯიხის ყველაზე მნიშვნელოვანი სპონსორია, კოლოსალური თანხა იდება ჩვენი შვილების ხარისხიანი განათლების მისაღებად.

- დავით კაკაჩიასთან, ან მისი ოჯახის წევრებთან თუ გქონდათ კომუნიკაცია და თავად რითი ხსნიან ამ ყველაფერს?

- როგორც კი ეს განცხადება ვნახე, სადღაც 5 საათზე ჩავედი ზუგდიდში, შევხვდი კაკაჩიას დედას და ძმას, რომლებიც უკიდურესად შეშფოთებულები არიან იმის გამო, რომ მამუკამ ამხელა საქმე გააკეთა და მათი შვილი და ძმა კი ასე მოიქცა, მათ უჭირთ მისი საქციელის ახსნა. ისინი საყოფაცხოვრებო პრობლემებით ხსნიან ყველაფერს - პენსია დაბალია, ძალიან გვიჭირს და მისთანები, თუმცა არ ამართლებენ მის საქციელს. ოჯახს არანაირი პრეტენზია არ აქვთ მამუკასთან. სხვა რომ არ შევიდეს შეცდომაში, თორემ წალენჯიხელებმა ძალიან კარგად იციან ყველაფერი. ეს ოჯახი ცხოვრობდა სახლში, რომელსაც სახურავი არ ჰქონდა, მიწურში იმ საქონელთან ერთად იძნებდნენ, რომლითაც არსებობდნენ. დავით კაკაჩიას დავურეკე და შეხვედრა შევთავაზე, მითხრა, რომ არ სცალია. არც შემხვდება, რადგან ჩვენ ერთად აღვნიშნეთ მისი საკუთრების გაფორმება...

• პ.ს. დავით კაკაჩიასთან დაკავშირება ჩვენც ვცადეთ, მაგრამ მან ჩვენს ზარებს არ უპასუხა.