"მასთან გამოსამშვიდობებლად მხოლოდ 6 ადამიანი მივიდა" - შიმშილით გარდაცვლილი რუსი პიანისტი, რომელიც ომს აპროტესტებდა და რუსეთის ხელისუფლებას "ფაშისტებს" უწოდებდა

ივლისის ბოლოს, 39 წლის პიანისტი პაველ კუშნირი რუსეთში ბირობიჟანის წინასწარი დაკავების იზოლატორში შიმშილობის შედეგად გარდაიცვალა. პიანისტი ტერორიზმის ბრალდებით დააკავეს. კუშნირი იუთუბ არხზე ომის საწინააღმდეგო ვიდეოებს ტვირთავდა, სადაც ხუთი გამომწერი ჰყავდა.

"ფაშიზმი ჩვენი სამშობლოს სიკვდილია"

"გამარჯობა, ფაშისტური რუსეთის ანტიფაშისტური დიასპორა!"

ასე გაეცნო YouTube არხის მაყურებელს პიანისტი და მეტსაცელად FBI-ის აგენტის ფოქს მალდერის გვარი აირჩია სერიალიდან X-Files. პაველისთვის არხის შექმნის მიზეზი, როგორც ჩანს, აღმოჩნდა კანონის მიღება, რომელიც მთლიანად კრძალავს ლგბტ "პროპაგანდას“. ვიდეოებში "უცხოელი აგენტი მალდერი" რუსეთის ხელისუფლებას "ფაშისტებს", "ფორმებში, კოსტუმებში და სპორტულ ტანსაცმელში გამოწყობილ ნაძირლებს", "სასოწარკვეთილ შიმპანზეებს" უწოდებს, რომლებიც ცდილობენ "ადამიანების მწერებად გადაქცევას."

"ფაშიზმი ჩვენი სამშობლოს სიკვდილია. ”პუტინი ფაშისტია”, - ამბობს პიანისტი და ხალხს მოუწოდებს წინააღმდეგობა გაუწიოს რეჟიმს. თავისუფლება ყველა პოლიტიკურ პატიმარს! თავისუფლება ყველა პატიმარს და თავისუფლება ყველას!“

ვიდეოებში ის ახსენებს ბიბლიას, დისტოპიურ რომანს „1984“, ფილოსოფოს პლატონს და როკ მუსიკოსს კურტ კობეინს.

BBC-ს ცნობით, არხი არსებობის მანძილზე ხუთმა ადამიანმა გამოიწერა. ბოლო ვიდეო "უცხოელი აგენტი მალდერის" სახელით 2024 წლის იანვარში გამოქვეყნდა. ექვსი თვის შემდეგ კი, "ოპერაციული ანგარიშების" სატელეგრაფო არხზე გამოჩნდა შემდეგი პოსტი: "სისხლის სამართლის საქმის აღძვრამ დაასრულა 1984 წელს დაბადებული ბირობიჟანის მკვიდრის პაველ კუშნირის მცდელობა, გამხდარიყო ოპოზიციური ბლოგერი.“

არხმა კუშნირს უწოდა: "წარსულში საპროტესტო აქციების აქტიური მონაწილე და ამჟამად რუსეთ-უკრაინის ომის მოწინააღმდეგე. ის რეგულარულად აქვეყნებდა მასალებს, სადაც ხალხს მოუწოდებდა რუსეთის ფედერაციაში კონსტიტუციური წესრიგის ძალადობრივი დამხობისკენ რევოლუციის გზით“.

პოსტს თან ახლდა ვიდეო, სადაც ჩანს ნიღბიანი მამაკაცები, რომლებსაც კუშნირი მიჰყავთ მიკროავტობუსისკენ. შეტყობინების ავტორებმა განმარტეს, რომ მამაკაცის წინააღმდეგ სისხლის სამართლის საქმე აღიძრა ტერორისტული ქმედებების საჯარო მოწოდების მუხლით (სსკ-ის 205.2 მუხლის მე-2 ნაწილი) - რაც 7 წლამდე თავისუფლების აღკვეთას ითვალისწინებს.

ვიდეოს გამოქვეყნების შემდეგ, არაფერი იყო ცნობილი კუშნირის ბედის შესახებ, აგვისტოს დასაწყისში კი პიანისტის მეგობრებისგან ცნობილი გახდა, რომ 39 წლის კაცი წინასწარი დაკავების იზოლატორში მშრალი შიმშილის ფონზე გარდაიცვალა. მოგვიანებით ინფორმაცია ტამბოვში მცხოვრებმა კუშნირის 79 წლის დედამ დაადასტურა. მისი თქმით, პაველი 28 ივლისს გარდაიცვალა.

დეტალები, თუ რა დაემართა კუშნირს წინასწარი დაკავების იზოლატორში, ჯერჯერობით გაურკვეველია. მაგრამ, როგორც პიანისტის გარდაცვალების შემდეგ გაირკვა, კუშნირი მანამდეც შიმშილობდა და ამ გზით აპროტესტებდა რუსეთის უკრაინაში შეჭრას.

"თავდაჯერებული, მარტოსული, ტანჯული"

პაველ კუშნირი ტამბოვში პიანისტისა და პედაგოგის მიხაილ კუშნირის ოჯახში დაიბადა. მამა ცნობილი იყო მუსიკალურ წრეებში, იხსენებს პაველის ბავშვობის მეგობარი, პიანისტი ოლგა შკრიგუნოვა BBC-სთან საუბარში. მამა-შვილი მეგობრობდნენ, სანამ კაცი 2020 წელს გარდაიცვლებოდა. პაველმა პიანინოზე დაკვრა 2 წლის ასაკში დაიწყო. მისი პედაგოგი დედა გახდა, რომელიც სკოლაში მუსიკას ასწავლიდა.

17 წლის ასაკში კუშნირმა მოსკოვის კონსერვატორიაში ჩააბარა და მშობლიური ტამბოვი დატოვა. კუშნირის კლასელი იულია ვერტმანი, რომელიც მას მესამე კურსზე დაუმეგობრდა, იხსენებს, რომ პიანისტი საათობით კითხულობდა ბროდსკის. მას ჰქონდა "დისიდენტის იმიჯი" - ხშირად ეცვა დახეული ქურთუკი, შიგნით კი შავი ზედა.

შკრიგუნოვა კუშნირს აღწერს, როგორც "მარტოსულს", რომელსაც ყოველთვის ჰყავდა ბევრი მეგობარი. ერთ-ერთ ინტერვიუში, რომელიც მასთან 2005 წელს ჩაწერეს, ამბობს, რომ ის არასოდეს დაუკრავს „რუსეთის ჰიმნს.“

კონსერვატორიის დასრულების შემდეგ ეკატერინბურგში წავიდა, ის შვიდი წელი მუშაობდა კურსკის ფილარმონიაში, შემდეგ კიდევ სამი წელი კურგანის ფილარმონიაში და ბოლოს, 2022 წელს, იგი გადავიდა ბირობიჟანში.

"რუსეთმა დაიპყრო ყირიმი"

2010-იანი წლების დასაწყისიდან კუშნირი აქტიურად იყო დაინტერესებული პოლიტიკით - მონაწილეობდა ბოლოტნაიას მოედანზე საპროტესტო აქციებში და ლაპარაკობდა არჩევნების გაყალბების შესახებ. მან ასევე გააპროტესტა ყირიმის ანექსია და უკრაინაში შეჭრა. 2018 წელს ის პუშკინის მოედანზე იდგა პლაკატით „ძირს ომი, თავისუფლება რუსეთისთვის“.

• მეგობრების განცხადებით, უკრაინაში რუსეთის შეჭრაზე განსხვავებული შეხედულებების გამო, პიანისტის ურთიერთობა დედასთან და ძმასთან გაუარესდა: "მათგან განსხვავებით, ის ომს არ უჭერდა მხარს".

”ვცდილობდი პაველზე გავლენის მოხდენას, მაგრამ ვერ მოვახერხე. მინდოდა უფრო მშვიდად ყოფილიყო... პოლიტიკაში საერთოდ არ ჩარეულიყო. ჩემი აზრია, რომ ყველამ თავისი საქმე უნდა მიხედოს“, - განუცხადა დედამ ჟურნალისტებს შვილის გარდაცვალების შემდეგ.

• კონცერტების გამართვისას თავისუფალ დროს პაველ კუშნირი ავრცელებდა ბუკლეტებს და პლაკატებს ბირობიჟანში ომის წინააღმდეგ. ის მოუწოდებდა ხალხს პროტესტი გამოეთქვათ უკრაინაში მიმდინარე ომის შესახებ.

მეგობრის თქმით, მას ესმოდა, რომ თავს საფრთხეში იგდებდა და ამიტომ ცდილობდა დაეყოლიებინა, რომ რუსეთი დაეტოვებინა, მაგრამ არ გამოვიდა.

ბუკლეტების დარიგება არ იყო კუშნირის პროტესტის ერთადერთი ფორმა. მან რამდენიმეჯერ ომის საწინააღმდეგო ლოზუნგებით შიმშილობაც გამოაცხადა. მარტის ბოლოს შნიგუროვამ ბერლინიდან დაურეკა. კუშნირმა უთხრა, რომ თავს კარგად გრძნობდა და შიმშილობა შეწყვიტა, მაგრამ ფიქრობდა, რომ მას დააკავებდნენ.

მაისის ბოლოს სოციალურ ქსელში მისი დაკავების ვიდეო გამოჩნდა. მეგობრებმა კი მუსიკოსის დევნის შესახებ მისი გარდაცვალების შემდეგ შეიტყვეს.

რა ბედი ეწია პიანისტს წინასწარი დაკავების იზოლატორში, უცნობია. ბირობიჟანის საქალაქო სასამართლოს მონაცემთა ბაზაში მისი სისხლის სამართლის საქმის შესახებ ინფორმაცია არ არის.

ადამიანი, რომელმაც პიანისტი გარდაცვალებამდე ცოტა ხნით ადრე ნახა, ამბობს, რომ მან შიმშილობა დაკავების პირველივე დღიდან დაიწყო. მისი თქმით კუშნირი "ჩონჩხს ჰგავდა".

• პიანისტის გარდაცვალების ოფიციალური მიზეზია "დილატირებული კარდიომიოპათია, გულის უკმარისობით". პიანისტის დედამ მედიასთან განაცხადა, რომ ოჯახი დამოუკიდებელ ექსპერტიზას არ მოითხოვს.

კუშნირის გარდაცვალების შესახებ შემთხვევით გახდა ვნობილი. მის ოჯახს ბოლო დრომდე მომხდარზე საუბარი არ სურდა, თუმცა დეტალები მისმა მეგობარმა გაარკვია და ოლგა შკრიგუნოვას გადასცა.

ინტერვიუში კუშნირის დედა ამბობს, რომ, მისი აზრით, პაველს ჰქონდა პოლიტიკის "ზედაპირული" გაგება და მან სიცოცხლე არაფრისთვის გაწირა.

მხოლოდ ექვსი ადამიანი

მხოლოდ ექვსი ადამიანი, მათ შორის ჟურნალისტები, მივიდნენ ბირობიჯანის წინასწარი დაკავების ცენტრში გარდაცვლილ პიანისტ, პაველ კუშნირთან გამოსამშვიდობებლად. რადიო თავისუფლების რუსული სამსახურის ცნობით, ბირობიჯანის “დაკრძალვის სახლში " ცერემონია უცხოეთში მყოფი მუსიკოსის მეგობრებმა მოაწყვეს... მათ შორის არ იყვნენ პიანისტის ძმა და დედა.

წყარო