"მკვდარი უნდა ვიყო... იღბლის თუ ღვთის წყალობით ჯერ კიდევ აქ ვარ..." - რას აცხადებს სიკვდილს გადარჩენილი ტრამპი?
გამოძიების ფედერალური ბიუროს (FBI) ვაშინგტონის შტაბბინის ანტიტერორისტული განყოფილების დირექტორის თანაშემწე, ბობი უელსი აშშ-ის ყოფილ პრეზიდენტზე დაპრეზიენტობის მოქმედ კანდიდატზე, დონალდ ტრამპზე თავდასხმის საქმეზე უახლეს განცხადებას ავრცელებს, რომელშიც აღნიშნავს, რომ “დონალდ ტრამპის წინასაარჩევნო შეხვედრაზე მომხდარ სროლას FBI მკვლელობის მცდელობის მუხლით იძიებს, თუმცა მას პოტენციურ შიდა ტერორისტულ თავდასხმადაც განიხილავს“.
FBI-ის ინფორმაციით, პირი, რომელმაც პენსილვანიაში, დონალდ ტრამპის წინასაარჩევნო შეხვედრის დროს ისროლა, მარტო მოქმედებდა და ჯერ კიდევ აქტიურად იძიებენ მის ისტორიას - მათ შორის მუშაობენ მის ტელეფონზე წვდომაზე.
”ვმუშაობთ ტელეფონზე წვდომისთვის. ტელეფონი ჩვენს ლაბორატორიაში გავგზავნეთ“, - განაცხადა FBI-ის სპეციალურმა აგენტმა, კევინ როჟეკმა, რომელმაც დაადასტურა, რომ სროლა AR სტილის შაშხანით განხორციელდა, რომელიც კანონიერად იყო შეძენილი.
- თავდახმის შემდეგ, საკმაოდ ხმამაღალი განცხადებები გააკეთა თავად დონალდ ტრამპმა
“ბევრი ადამიანი ამბობს, რომ მე აქ არ უნდა ვიყო, მკვდარი უნდა ვიყო, იღბლის თუ ღვთის წყალობით, ჯერ კიდევ აქ ვარ. ბევრი ამბობს, რომ ეს ყველაზე საკულტო ფოტოა, რაც კი ოდესმე უნახავთ. ისინი მართლები არიან და მე არ მოვკვდი. ჩვეულებრივ, უნდა მოკვდე, რომ საკულტო სურათი გქონდეს“, - მასზე განხორციელებული თავდასხმის შემდეგ, დონალდ ტრამპმა New York Post-თან ინტერვიუში ისაუბრა.
მისი თქმით, სროლის შემდეგ საუბრის გაგრძელება სურდა, მაგრამ საიდუმლო სამსახურმა დაჟინებით მოითხოვა, რომ საავადმყოფოში წასულიყო. New York Post-ი ასევე წერს, რომ ყოფილ პრეზიდენტს დიდი თეთრი სახვევი ჰქონდა, რომელიც მარჯვენა ყურს უფარავდა და გამოცემას ინტერვიუს დროს ფოტოების გადაღების უფლება არ მისცეს.
- ტრამპის მხარდასაჭერი განცხადება გააკეთა მისმა პოლიტიკურმა კონკურენტმა, “დემოკრატების“ საპრეზიდენტო კანდიდატმა ჯო ბაიდენმა
“ჩვენს პოლიტიკაში საჭიროა “ტემპერატურის დაწევა“ და გვახსოვდეს, რომ ჩვენ არ ვართ მტრები, ჩვენ ვართ მეზობლები, მეგობრები, თანამშრომლები, მოქალაქეები და რაც მთავარია - ჩვენ ამერიკელები ვართ, ერთად უნდა დავდგეთ! გადავდგათ ნაბიჯი უკან, ავწონ-დავწონოთ სად ვართ, როგორ მივდივართ წინ. ამერიკაში მსგავსი ძალადობის ადგილი არ არის. არანაირი გამონაკლისი. არ შეიძლება დავუშვათ ამ ძალადობის ნორმალიზება“, - განაცხადა ბაიდენმა ოვალური კაბინეტიდან.
მისი თქმით, ამერიკაში უთანხმოებას საარჩევნო ყუთებთან აგვარებენ და არა ტყვიებით.
დონალდ ტრამპმა კი განაცხადა, რომ “რესპუბლიკელების“ ყრილობაზე წარმოსათქმელი სიტყვა მასზე განხორციელებული თავდასხმის შემდეგ მთლიანად გადაწერა და ის ახლა პრეზიდენტ ჯო ბაიდენის კრიტიკის ნაცვლად ერთიანობის აუცილებლობაზეა ორიენტირებული.
"სიტყვა, რომლით წარდგენასაც ვაპირებდი, შთამბეჭდავი იქნებოდა. ეს რომ არ მომხდარიყო, ის იქნებოდა ერთ-ერთი ყველაზე საოცარი გამოსვლა“, - განაცხადა ტრამპმა Washington Examiner-თან ინტერვიუში და განმარტა, რომ მისი გამოსვლა ძირითადად პრეზიდენტ ბაიდენის პოლიტიკაზე იქნებოდა ორიენტირებული.
"სიმართლე გითხრათ, ახლა სულ სხვა გამოსვლა იქნება. ეს არის ქვეყნის გაერთიანების შანსი. ეს შანსი მე მომეცა", - აღნიშნა ტრამპმა.
აშშ-ის ყოფილმა პრეზიდენტმა ის მომენტი აღწერა, როდესაც პენსილვანიაში შეკრებილ მხარდამჭერებს შეხედა მას შემდეგ, რაც გააცნობიერა, რომ ესროლეს.
"ენერგია, რომელიც იმ მომენტში იქ მყოფი ხალხისგან მოდიოდა; ძნელია იმის აღწერა, როგორი იყო ეს გრძნობა, მაგრამ ვიცოდი, რომ მსოფლიო უყურებდა. ვიცოდი, რომ ისტორია ამას განსჯიდა და ვიცოდი, მათთვის უნდა შემეტყობინებინა, რომ კარგად ვართ“, - აღნიშნა ტრაპმა.
"მე აქ არ უნდა ვიყო, მკვდარი უნდა ვიყო, იღბლის თუ ღვთის წყალობით, ბევრი ადამიანი ამბობს, რომ ღმერთის, ჯერ კიდევ აქ ვარ..." - ეს კი აშშ-ის ყოფილმა პრეზიდენტმა New York Post-თან ინტერვიუში განაცხადა.
აშშ-ის ყოფილი პრეზიდენტი მილუოკიში უკვე ჩავიდა, სადაც ის მიმდინარე კვირაში "რესპუბლიკელების“ ეროვნულ ყრილობას დაესწრება და პარტიის კანდიდატად ოფიციალურად წარადგენენ.
შეგახსენებთ, დონალდ ტრამპს პენსილვანიის შტატის ქალაქ ბატლერში მხარდამჭერებთან შეხვედრის დროს ესროლეს, რის შედეგადაც იქ დაშავდა. შეხვედრის ერთ-ერთი მონაწილე დაიღუპა, ორი მონაწილე კი - მძიმედ დაშავდა. დაღუპულია თავად შეიარაღებული პირიც, რომელიც აშშ-ის საიდუმლო სამსახურის თანამშრომლებმა გაანეიტრალეს. აშშ-ის ფედერალური გამოძიების ბიურომ (FBI-მ) ყოფილი პრეზიდენტის, დონალდ ტრამპის მკვლელობის მცდელობაში მონაწილე პირის იდენტიფიცირება მოახდინა და განაცხადა, რომ ის 20 წლის თომას მეთიუ კრუკსია. დონალდ ტრამპმა საავადმყოფო შესაბამისი სამედიცინო დახმარების გაწევის შემდეგ მალევე დატოვა.
ასევე იხილეთ:
- წარმატებით დასრულებული სკოლა და მუშაობა მოხუცთა თავშესაფარში - რა ხდება ცნობილი ბიჭზე, რომელმაც დონალდ ტრამპს ესროლა?
- "შეიარაღებულმა პირმა შემაღლებული ადგილიდან ისროლა" - რა დეტალები ხდება ცნობილი დონალდ ტრამპზე თავდასხმის შესახებ: ექსპრეზიდენტის პირველი განცხადება (ფოტოები/ვიდეო)
- "მე მესროლეს ტყვია, რომელმაც მარჯვენა ყურის ზედა ნაწილი გამიხვრიტა" - დონალდ ტრამპი განცხადებას ავრცელებს