ერთ ღამეში შეცვლილი საფრანგეთი, გადამდგარი პრემიერი და არეულობა ქუჩებში - რა ხდება ქვეყანაში მემარცხენე კოალიციის გამარჯვების შემდეგ (ვიდეო)
საფრანგეთის ეროვნული ასამბლეის არჩევნებში მემარცხენე პარტიების კოალიციამ, "ახალმა სახალხო ფრონტმა" გაიმარჯვა. ქვეყნის შინაგან საქმეთა სამინისტროს ოფიციალური ინფორმაციით, “ახალმა სახალხო ფრონტმა” ეროვნულ ასამბლეაში 182 მანდატი მოიპოვა.
პრეზიდენტ ემანუელ მაკრონის კოალიცია, სახელწოდებით “ერთად“ მეორე ადგილზე 168 მანდატით გავიდა. მარინ ლე პენის “ეროვნული გაერთიანება“ კი მესამე ადგილზე- 143 მანდატით. ამასთან, “რესპუბლიკელებმა“ 45 მანდატი მოიპოვეს, ხოლო დანარჩენმა პარტიებმა ერთად 39 მანდატი მიიღეს.
აღსანიშნავია, რომ ეროვნულ ასამბლეაში აბსოლუტური უმრავლესობის, 289 მანდატის მოპოვება ვერცერთმა პოლიტიკურმა ჯგუფმა ვერ შეძლო.
- ყველაფერი 7 ივლისს, არჩევნების შედეგების გამოცხადებისთანავე დაიწყო
მედიის ინფორმაციით, საფრანგეთის საპარლამენტო არჩევნებში 1981 წლის შემდეგ ამომრჩეველთა აქტივობის ასეთი მაღალი მაჩვენებელი არ დაფიქსირებულა. არჩევნებში, სადაც აქტივობამ 66,63% შეადგინა, პარლამენტში უმრავლესობის მოპოვება ვერცერთმა პოლიტიკურმა ძალამ ვერ მოახერხა. ეროვნულ ასამბლეას ჰყავს 577 დეპუტატი, უმრავლესობა კი 289 მანდატს მოითხოვს.
მას შემდეგ, რაც ცნობილი გახდა, რომ მემარცხენე ალიანსმა ყველაზე მეტი ადგილი მოიპოვა პარლამენტში, საფრანგეთის პრემიერ-მინისტრმა გაბრიელ ატალმა განაცხადა, რომ გადადგომის განცხადებით ემანუელ მაკრონს მიმართავდა.
“მართალია ალიანსმა სამჯერ მეტი მანდატი მოიპოვა, ვიდრე პროგნოზირებდნენ, მაგრამ უმრავლესობა არ გვაქვს. ხვალ დილით რესპუბლიკის პრეზიდენტს გადადგომის თხოვნით მივმართავ“, - აღნიშნა ატალმა. მან ხაზი გაუსვა, რომ პრეზიდენტ მაკრონის ალიანსის ბევრი წევრი ხელახლა აირჩიეს.
საფრანგეთის ულტრამემარჯვენე პარტია "ეროვნული გაერთიანების“ ლიდერის, მარინ ლე პენის განცხადებით კი, მისი პარტიის გამარჯვება მხოლოდ გადაიდო.
"ჩვენი გამარჯვება მხოლოდ გადაიდო. ხვალინდელი გამარჯვების თესლს დღევანდელ შედეგში ვხედავ“, - აღნიშნა მარინ ლე პენმა.
საფრანგეთის ქუჩებში, რიგგარეშე საპარლამენტო არჩევნების მეორე ტურის ხმების დათვლის პარალელურად, ათასობით ადამიანი ქუჩებში გამოვიდა და ეგზიტპოლების თანახმად გამოცხადებული შედეგები იზეიმა.
თავდაპირველად დემონსტრაციები მშვიდობიანად მიმდინარეობდა, თუმცა მოგვიანებით გამოსვლები არეულობაში გადაიზარდა და ამომრჩეველთა ზეიმის განეიტრალება პოლიციას მოუწია.
პარიზში, რესპუბლიკის მოედანზე ათასობით ადამიანი შეიკრიბა. უცნობმა პირებმა გამარჯვების აღსანიშნავად დაიწყეს ფეიერვერკების დანთება, სანაგვე ურნების, ველოსიპედების გადაწვა და ავტობუსების გაჩერებების მინების ჩამტვრევა.
პოლიციამ მათ დასაშლელად ცრემლსადენი გაზი გამოიყენა.
პოლონეთის პრემიერ-მინისტრი, დონალდ ტუსკი საფრანგეთის საპრეზიდენტო არჩევნების სავარაუდო შედეგებს ასე გამოეხმაურა:
“პარიზში- ენთუზიაზმი, მოსკოვში - იმედგაცრუება, კიევში - შვება. საკმარისია იმისთვის, რომ ვარშავაში ბედნიერი იყო", - წერს ტუსკი სოციალურ ქსელ X-ზე.
ესპანეთის პრემიერ-მინისტრმა პედრო სანჩესმა კი თქვა, რომ “მიესალმება საფრანგეთის “მემარცხენეების“ აღზევებას, რომელიც სერიოზული და გაბედული პოლიტიკით მოაგვარებს ხალხის პრობლემებს“.
შეგახსენებთ, ეგზიტპოლის შედეგების თანახმად, საფრანგეთის საპარლამენტო არჩევნებში პირველ ადგილს მემარცხენეთა ალიანსი იკავებს. მეორე ადგილზეა პრეზიდენტ ემანუელ მაკრონის ცენტრისტული ალიანსი, მესამეზე კი - ულტრამემარჯვენე პარტია „ეროვნული გაერთიანება“, რომელმაც არჩევნების პირველ ტურში გაიმარჯვა.