"თურმე ბუდუს ვუთხარი, სიტყვას არ გაძლევო.ზღვარი ხომ აქვს ყველაფერს? რა ბუდუს ვუთხარი, ხალხო, რას იგონებთ?!" - დიმა ობოლაძე განცხადებას ავრცელებს
თავისუფლების მოედანზე ეროვნული ნაკრების ფეხბურთელები გულშემატკივარს შეხვდნენ. ღონისძიების ერთ-ერთ მომენტში, პირდაპირ ეთერში ისმის საღამოს წამყვანის, კომენტატორის, დიმა ობოლაძის ხმა, რომელიც ამბობს - "შენ არ გამოდიხარ". ეს ვიდეო სოციალურ ქსელში გავრცელდა ისე, რომ თითქოსდა, ობოლაძე ბუდუ ზივზივაძეს ეუბნებოდა, სიტყვით არ გამოსულიყო.
- აღნიშნულ თემაზე დიმა ობოლაძის მისამართით არაერთი კრიტიკული კომენტარი დაიწერა. მოგვიანებით კი ობოლაძემ "ინსტაგრამის" გვერდზე ვიდეო გამოაქვეყნა, სადაც ამბობს, რომ რეალურად, ამ სიტყვებით ის ზივზივაძეს არ მიმართავდა.
"ახლა მოვრჩით საღამოს და სქრინებს მიყრიან, ბუდუს ვუთხარი მე თურმე, სიტყვას არ გაძლევო. ზღვარი ხომ აქვს ყველაფერს? მსგავსი არაფერი არ ყოფილა, საერთოდ არ მქონია ასეთი კონტაქტი ბუდუსთან.
შეიძლება სხვას ვუთხარი. უნდა გამოსულიყო ლევან კობიაშვილი სიტყვით, აღარ გამოვიდა და შეიძლება მას ვუთხარი.
მახსოვს მას ვკითხე, სიტყვით არ გამოდიხარ? და (პასუხი იყო) არა. მორჩა ეგ იყო და ეგ,
რა ბუდუს ვუთხარი, ხალხო, რას იგონებთ, ასე უსამართლოდ ადამიანის გადავლა არ არის კარგი და ლამაზი. ახლა ძალიან დაღლილი ვარ, მეტ კომენტარს ვერ გავაკეთებ. სისულელეა, შეგიძლიათ ბუდუსაც დაელაპარაკოთ", - ამბობს ობოლაძე.