"პანიკისგან ხალხი ფანჯრებიდან ხტებოდა... ასეთი არაფერი მინახავს" - რას ჰყვებიან ჩინეთ-ყირგიზეთის საზღვართან მომხდარი მიწისძვრის თვითმხილველები

ჩინეთში, ყირგიზეთ-სინძიანის სასაზღვრო რეგიონში 7,01 მაგნიტუდის მიწისძვრა მოხდა. მიწისძვრა იგრძნობოდა რუსეთში, ყაზახეთში და უზბეკეთშიც. დაშავებულთა ყველაზე მაღალი მაჩვენებელი ყაზახეთის ქალაქ ალმათიში დაფიქსირდა - 44 ადამიანი. ჩინეთში, მიწისძვრის ეპიცენტრი სოფლად იყო, დაშავდა ექვსი ადამიანი. ადგილობრივი მედიის ცნობით, პანიკისგან ხალხი ფანჯრებიდან ხტებოდა.

• მიწისძვრის შედეგები ყაზახეთში

ყაზახეთის ჯანდაცვის სამინისტროს ცნობით, მიწისძვრის შედეგად 44 ადამიანი დაშავდა, მათგან 10 ბავშვია. მთელი ღამის განმავლობაში ქალაქის საავადმყოფოები ინტენსიურ რეჟიმში მუშაობდა.

ყაზახეთის პრემიერ-მინისტრ ალიხან სმაილოვის თქმით, მოსახლეობა შენობიდან თავის დაღწევას ფანჯრიდან გადახტომით ცდილობდა: "ადამიანები, რომლებმაც დროულად ვერ მიიღეს ინფორმაცია... პანიკაში არიან. ისინი მეორე ან მესამე სართულიდან გადმოხტომის შედეგად დაშავდნენ. აუცილებელია გამაფრთხილებელი სისტემების დროულად ამოქმედება და მოსახლეობისთვის შეტყობინებების გაგზავნა“, - განაცხადა პრემიერმა მთავრობის სხდომაზე.

ქვეყნის საგანგებო სიტუაციების სამინისტროს განცხადებით, მიწისძვრა ყაზახეთის სამ მეგაქალაქსა და ხუთ რეგიონში იგრძნობოდა. ეპიცენტრი ალმათიდან 264 კილომეტრში, ყირგიზეთის და ჩინეთის საზღვარზე მდებარეობდა. ყველაზე ძლიერი ბიძგები, 5 მაგნიტუდა (MSK-64 შკალით) ალმათიში სამშაბათს, ადგილობრივი დროით 00:00 საათზე დაფიქსირდა.

"იმ მომენტში საშინელ შოკში ვიყავი. თავიდან ვიფიქრე, რომ მეჩვენებოდა. ჩემი აზრით, მიწისძვრა მხოლოდ 10 წამს გაგრძელდა. ქუჩაში გავიქეცი და დავინახე იქ მდგომი მეზობლები. ზოგს პიჟამაა ეცვა, ბავშვები კი საბანში ჰყავდათ გახვეული - მათი ჩაცმის დროც კი არ ჰქონდათ. ამ ქალაქში 1999 წლიდან ვცხოვრობ და ვაღიარებ, რომ მსგავსი არაფერი მინახავს", - ამბობს ერთ-ერთი ადგილობრივი ჟურნალისტებთან საუბრისას.

მიწისძვრის შემდეგ მოსახლეობამ ქალაქის დატოვება გადაწყვიტა, რამაც გზებზე და ბენზინგასამართ სადგურზე საცობი შექმნა. სეისმოლოგების თქმით, ამ დროს სადგურზე ყოფნა სახიფათოა.

"თუ მიწისძვრა განმეორდა, ეს ბენზინგასამართ სადგურის აფეთქებას გამოიწვევს" - ამბობენ ისინი.

ალმათის გარდა, 2-4 მაგნიტუდის მიწისძვრა მოხდა ქალაქ შიმკენტის, ჟამბილისა და ჟეტისუს რეგიონებში. ის ასევე იგრძნობოდა ასტანას, ყარაგანდას და აღმოსავლეთ ყაზახეთის რეგიონებშიც.

ყაზახეთის პრეზიდენტი კასიმ-ჟომარტ ტოკაევი ალმათს 24-25 იანვარს ეწვევა.

• შედეგები ჩინეთსა და სხვა ქვეყნებში

7,1 მაგნიტუდის მიწისძვრა დაფიქსირდა ჩინეთში, უშის ოლქში. შემთხვევის შედეგად 6 ადამიანი დაშავდა.

ჩინური გაზეთის Huanqiu Shibao-ს ცნობით, უშის ოლქში 90 ადამიანის ევაკუაცია განხორციელდა. მათივე ინფორმაციით, ბიძგების ეპიცენტრი მთებში იყო, სადაც მოსახლეობა "უკიდურესად მცირეა“. ეპიცენტრის გარშემო 20 კილომეტრის რადიუსში ხუთი სოფელია.

უშის რამდენიმე დასახლება ელექტროენერგიის გარეშე დარჩა, თუმცა ხელისუფლებამ ელექტროენერგიის მიწოდება თითქმის აღადგინა. შეიზღუდა მატარებლის მოძრაობაც.

ძლიერი ბიძგები სინციან-უიგურის ავტონომიური რეგიონის სულ მცირე ექვს რაიონში იგრძნობოდა. პირველი ბიძგის შემდეგ კიდევ 40 ბიძგი დაფიქსირდა. ჩინეთის სეისმოლოგიური ცენტრი უახლოეს დღეებში ძლიერ ბიძგებს პროგნოზირებს.

ყირგიზეთში მიწისძვრის ეპიცენტრი ბიშკეკიდან დაახლოებით 400 კილომეტრში იყო. შემთხვევას მსხვერპლი და ნგრევა არ მოჰყოლია.

მიწისძვრა დაფიქსირდა ნოვოსიბირსკშიც (რუსეთი). დაშავებულების შესახებ ინფორმაცია არ ვრცელდება.

მიწისძვრა იგრძნობდა უზბეკეთის დედაქალაქ ტაშკენტშიც. შემთხვევის შედეგად არავინ დაშავებულა.