ქორწინება "კამორას" ბოსის ქვრივზე და მუსიკით "გათეთრებული" ნარკოვაჭრობა - ცნობილი იტალიელი მომღერალი მაფიასთან კავშირის გამო დააკავეს
იტალიის პოლიციამ ნეო-მელოდიური ჟანრის ცნობილი მომღერალი ანტონიო "ტონი" კოლომბო და მისი მეუღლე დააკავა. მათ გარდა, დაკავებულია "დი ლაუროს“ მაფიოზური კლანის წევრი კიდევ 25 ადამიანი.
როგორც ბრიტანული გაზეთი Guardian იტალიურ პოლიციაზე დაყრდნობით იუწყება, რეიდების დროს 8 მილიონი ევროს ღირებულების ქონება ამოიღეს.
ტონი კოლომბომ სცენიდან წასვლის შესახებ განცხადება 2020 წელს გააკეთა. მანამდე ის იყო ალბათ ყველაზე ცნობილი სიმღერების შემსრულებელი ნეო-მელოდიურ სტილში, რომელიც ძალიან პოპულარულია იტალიის სამხრეთში, იმ ადგილებში, რომელიც ტრადიციულად მაფიოზური ჯგუფების დასაყრდენად მიიჩნევა.
2019 წელს, როდესაც კოლომბო თინა რისპოლიზე, ნეაპოლიტანური მაფიის ერთ-ერთი მოკლული ბოსის გაეტანო მარინოს ქვრივზე დაქორწინდა. მის ქორწილს "კამორას" (ნეაპოლური მაფია) ათობით წევრი ესწრებოდა.
კოლომბოს უახლეს სიმღერას Ti aspetto all'Altare ("მე დაგელოდები საკურთხეველთან"), რომელის კლიპში თინაც გადაითო, YouTube-ზე თითქმის 60 მილიონი ნახვა აქვს.
თინა რისპოლის პირველი ქმარი 2012 წელს იმ დროს მოკლეს, როდესაც მეუღლესთან ერთად, ზღვაზე ისვენებდა.
პროკურორები 37 წლის კოლომბოს ადანაშაულებენ მაფიის თაყვანისმცემლებისგან უკანონოდ მიღებულ შემოსავლებში, რაც შემდეგ მუსიკალური კარიერიდან მიღებული შემოსავლით "გაათეთრა“. ის და მისი მეუღლეც კრიმინალურ სამყაროსთან კავშირს უარყოფენ.
თუმცა, იტალიური საინფორმაციო საიტის, Leggo-ს ცნობით, "კამორას" რამდენიმე წევრი, რომელიც პოლიციის ინფორმატორი გახდა, ამბობს, რომ კოლომბოს კავშირი ჰქონდა მაფიასთან, განსაკუთრებით მისი მეუღლის პირველ ქმართან.
"კოლომბომ გაეტანო მარინოს სთხოვა 80 ათასი ევრო, მან ფული 2010 წელს ისესხა ჩანაწერის ალბომის გამოსაშვებად. არ ყოფილა არცერთი წვეულება, ნათლობა ან ქორწილი, რომელსაც ტონი კოლომბო არ ესწრებოდა, ის მღეროდა ყველა ღონისძიებაზე“, - განუცხადა პოლიციას ამჟამად უკვე ინფორმატორმა და ყოფილმა მაფიოზმა ჯანლუკა ჯულიანომ.
ეს არ არის პირველი შემთხვევა, როდესაც ნეო-მელოდიური სტილის სიმღერების შემსრულებელი დააკავეს. კრიმინალურ სამყაროში ამ ჟანრის პოპულარობის გათვალისწინებით, ხშირად მისი ვარსკვლავები "კამორას" ბოსების ფავორიტები ხდებიან და კლანები პირდაპირ აფინანსებენ მათ კარიერას.
- "კამორა" და "დი ლაუროს" კლანი
"კამორას" სხვა მაფიის სტრუქტურებისგან განსხვავებით რამდენიმე ჯგუფისგან შედგება, რომელთაგან თითოეულს ჰყავს თავისი ბოსი (განსხვავებით, მაგალითად, Cosa Nostra-სგან, რომელსაც მხოლოდ ერთი ადამიანი აკონტროლებს). ითვლება, რომ ამჟამად დაახლოებით 115 ჯგუფი მოქმედებს, თითოეული შედგება 500-მდე ადამიანისგან.
დი ლაურომ ჯგუფს მეთაურობა მას შემდეგ აიღო ხელში, რაც მამამისი იძულებული გახდა გაქცეულიყო. მას მეტსახელად "დიზაინერი დონ" შეარქვეს ბრენდების სიყვარულის გამო. ჟურნალისტები კი "პრინც რეგენტს" ეძახდნენ.
ახალი ბოსი ცდილობდა კლანი ახალგაზრდა, მხიარული, მაგრამ გამოუცდელი მაფიოზებით შეეცვალა, მაგრამ ის დააპატიმრეს და ციხეში გარდაიცვალა სულ რაღაც 48 წლის ასაკში.
თავად ანტონიო კოლომბო პალერმოდან არის. მისი სიმღერები იმდენად პოპულარული იყო კრიმინალურ სამყაროში, რომ იტალიელი პროკურორები ეჭვობენ, რომ განგსტერების სიყვარულმა განაპირობა, რომ მათთან მუშაობა დაეწყო.
"დი ლაუროს" კლანის აყვავების პერიოდი 1990-იანი წლების შუა ხანებში დაიწყო, როდესაც ის დღეში ნახევარ მილიონ ევრომდე შოულობდა მხოლოდ ნარკოვაჭრობით.
დღესდღეობით, კლანი ასევე იღებს შემოსავალს მზა ტანსაცმლის ხაზისგან, სახელწოდებით Corleone.
კლანის სხვა ლეგალური ბიზნესებია ტოტალიზატორი და სუპერმარკეტები.
იტალიის პოლიცია ამბობს, რომ დღეს "დი ლაუროს" კლანი ტრადიციული ნარკოვაჭრობიდან ფულის გამოძალვის მეთოდებზე გადავიდა.
პროკურატურის თქმით, ისინი აწყობდნენ უძრავი ქონების აუქციონებს, აშინებდნენ სხვა პრეტენდენტებს, ყიდულობდნენ ბინებს, სახლებს და მიწებს გარიგების ფასად და შემდეგ ყიდიდნენ მათ დიდი მოგებით. გარდა ამისა, ისინი ახორციელებენ თამბაქოს ნაწარმის კონტრაბანდას, მათ შორის ბულგარეთიდან და უკრაინიდან, ხშირად ამას შუამავლების მეშვეობით აკეთებენ.
- როგორია ნეო-მელოდური მუსიკალური სტილი
ეს ჟანრი დაიბადა 1980-იან წლებში და მიიჩნევა ტრადიციული ნეაპოლიტანური სიმღერის canzone napoletana-ს თანამედროვე ადაპტაციად. იგი აერთიანებს ტრადიციულ შესრულებას თანამედროვე პოპ კულტურასთან.