23
აპრილიდღის ზოგადი ასტროლოგიური პროგნოზი
რამდენიმე პროფესიის მქონე ადამიანების შესახებ თუ გსმენიათ? ალბათ, კი, მაგრამ ისეთ ადამიანებს თუ იცნობთ, რომლებიც ერთდროულად სამედიცინო და იურიდიულ სფეროში წარმატებით საქმიანობენ და ამასთან ერთად, მღერიან კიდეც... და მათ სიმღერებს ათიათასობით მსმენელი ჰყავს? ეს ძლიერ ქალებს შეუძლიათ, ისეთებს, როგორიც ნინო ბაღიაშვილია - თავად ძლიერი ქალი და ამიერიდან უკვე ძლიერი ქალების ქოუჩი. ესეც მისი კიდევ ერთი პროფესია...
საერთაშორისო ქოუჩიგნის ასოციაციას საზოგადოებისთვის არაერთი საინტერესო ადამიანი წარუდგენია, მაგრამ ეს განსაკუთრებით საინტერესო შემთხვევაა. მით უმეტეს, ბევრი თქვენგანი ნინოს მისი სიმღერებით იცნობთ, თუმცა მალე ფართო საზოგადოების წინაშე ის ქოუჩის რანგში წარდგება.
-როგორ აღმოჩნდით ქოუჩინგში?
-როგორც ყველა წარმატებული ქალი, მეც ყოველთვის თვითგანვითარებისკენ ვისწრაფვი. ეს არის ერთ-ერთი მნიშვნელოვანი მიზეზი, რამაც ქოუჩინგის შესწავლა და ახალი პროფესიის დაუფლება გადამაწყვეტინა. პირველყოვლისა, საკუთარი თავის ახლიდან აღმოჩენა და განვითარება მსურდა. გადაწყვეტილება ძალიან სპონტანურად მივიღე, თუმცა რეალობამ მოლოდინს გადააჭარბა.
-რას საქმიანობდით, სანამ ქოუჩინგის საერთაშორისო ასოციაციაში მოხვდებოდით?
-ექთანი ვარ, ასევე სამედიცინო თარჯიმანი. წლების განმავლობაში აქტიურად ვთანამშრომლობ სხვადასხვა კომპანიასთან და პაციენტების საზღვარგარეთ მკურნალობის პროცესში ვარ ჩართული; ყველაფერი ჩემი ჩართულობით მიმდინარეობს. ამასთან ერთად, ვარ იურიდიული თარჯიმანი და ვმუშაობ „დელტას“ მთარგმნელობით ჯგუფში, სადაც უამრავ პროექტში ვიღებ მონაწილეობას. ამ პროექტების ფარგლებში, ვმუშაობ თელავის საქალაქო სასამართლოში და პროცესებს თურქულ ენაზე ვთარგმნი. გარდა ამისა, ჩემი ჰობია სიმღერა, რომელსაც ასევე ძალიან აქტიურად მივდევ. მისმენს უამრავი ადამიანი, რადიოში ხშირად ტრიალებს ჩემი სიმღერები. ამასაც ისეთივე მონდომებით ვეკიდები, როგორც სხვა საქმიანობას. გამოშვებული მაქვს საკუთარი ალბომი და ვმუშაობ ახალ სიმღერებზე.
-რომელი კურსი გაიარეთ და როგორი შედეგი მიიღეთ?
-მე ქოუჩინგის სკოლაში შევისწავლე 5 სახის ქოუჩინგი და ფსიქოლოგიის საფუძვლები. ამ სკოლას განსაკუთრებული ის აქვს, რომ საკუთარი თავის აღმოჩენაშიც გეხმარებიან და გასწავლიან, მიღებული ცოდნა როგორ შეუფარდო უკვე არსებულ პროფესიას. ერთ-ერთი მოდულის მენტორი ხათუნა მუზაშვილიც იყო. ამ მოდულმა საკუთარი თავი ახლიდან აღმომაჩენინა. ჩემს რესურსებს სხვაგვარად შევხედე და საკუთარი თავის რწმენაც გავიმყარე.
დღეს, როცა ჩემი კლიენტების მადლიერ თვალებს ვუყურებ, ქოუჩინგის სწავლებით მიღებულ შედეგებს ყველაზე მეტად სწორედ მაშინ ვაცნობიერებ. შეიძლება ითქვას, რომ მე ამით ვიკვებები. დადებითი უკუკავშირები ძალიან დიდ სტიმულს მაძლევს. ქოუჩინგის სკოლაში მივიღე ცოდნა, რომელიც ჩემს პროფესიულ საქმიანობაში გადავიტანე. სამომავლოდ ვაპირებ, სხვა მიმართულებები შევისწავლო, ტრენერობაც მინდა...
-რა არის თქვენთვის ქოუჩინგი?
-როგორც მომღერალს, მიმაჩნია, რომ ქოუჩინგი არის ინსტრუმენტი, რომელიც შენი სულიერი და გონებრივი მდგომარეობის მიხედვით უკრავს. ის ზუსტად ისე ჟღერს, როგორი განწყობაც გაქვს.
-რატომ გადაწყვიტეთ, გამხდარიყავით ძლიერი ქალების ქოუჩი და რა სპეციფიკა აქვს ამ მიმართულებას?
-ადამიანებს ის გვინდა ხოლმე ვურჩიოთ სხვას, რაც ჩვენ უკვე წარმატებით გავიარეთ. სხვისთვის რჩევის მიცემა, ჩემი აზრით, სწორედ ამ შემთხვევაში შეიძლება. მე ძალიან პოზიტიური ადამიანი ვარ. უკვე 10 წელია, მარტოხელა დედა ვარ და ჩემს შვილს დამოუკიდებლად ვზრდი. ამას ძალიან დიდი ძალა და რესურსი სჭირდება. აქედან გამომდინარე, მინდა ვიყო მაგალითი იმ ქალებისთვის, რომელთა ცხოვრებაშიც რთული ეტაპი დგას. სოციალური ყოფა იმდენად რთულია, ხშირად გვავიწყდება, რომ ქალები ვართ და ბევრ რამეს ვიმსახურებთ. ეს შემდეგ თვითშეფასებაზეც მოქმედებს. დაბალი თვითშეფასების მქონე ქალი მეუღლისთვისაც აღარ ხდება სასურველი და შვილების განათლება-განვითარებაშიც სათანადოდ ვეღარ ერთვება.
სიძლიერე იმას არ ნიშნავს, რომ ჩვენს ცხოვრებაში მამაკაცების მნიშვნელობა დავაკნინოთ. პირიქით, ჩვენ უნდა გამოვკვეთოთ ერთმანეთის მნიშვნელობები, შევავსოთ ერთმანეთი, გადავინაწილოთ ფუნქციები და შევქმნათ მყარი, ძლიერი ოჯახი.
-რა შეგიძლიათ, გვითხრათ ქოუჩინგის მიმართულებით თქვენს ამჟამინდელ აქტივობებზე?
-ჯერჯერობით პერსონალურ სესიებს ვატარებ და ვიდეომიმართვებს ვავრცელებ. ჩემი კლიენტები კარგად მიცნობენ, თუმცა ფართო საზოგადოება, ქოუჩინგის მიმართულებით, ახლა გამიცნობს.
ქალს კაცობრიობის ისტორიაში ყოველთვის ძალიან დიდი მნიშვნელობა ჰქონდა და რასაკვირველია, ეს დღესაც ასეა. როდესაც ამ ქალბატონებს ვუსმენ, მათ გრანდიოზული გეგმები აქვთ. მე სოციალურ პასუხისმგებლობას ვგრძნობ - მინდა, ისინი გავაძლიერო და ამ გეგმების განხორციელებაში ჩემი წვლილი შევიტანო.
-ძლიერი ქალების ქოუჩი მხოლოდ კარიერულად შემდგარ და უკვე წარმატებულ ქალებს ეხმარება?
-რასაკვირველია, არა. მე მჯერა, რომ როდესაც ქალი იბადება, ის ძალიან დიდ ძალას ატარებს. სუსტი სქესი მხოლოდ სახელია, რომლის მიღმაც ძალიან დიდი რესურსი იმალება. ჩემს ოჯახში და ჩემ გარშემო სულ ძლიერი ქალები იყვნენ. ყველა ქალშია ძალა. მთავარია, ვიპოვოთ ის და სწორი მიმართულება მივცეთ.
განსაკუთრებით აღსანიშნავია ემიგრანტებთან მუშაობა. მე ხშირი ურთიერთობა მაქვს მათთან და ვიცი, რომ მხარდაჭერა და გაძლიერება მათ ყველაზე მეტად სჭირდებათ. სწორედ ამიტომ, ონლაინ სესიების აქტიურად დაწყებას ვაპირებ, რომლებიც როგორც ემიგრანტებისთვის, ასევე საქართველოში მცხოვრები ადამიანებისთვისაც იქნება ხელმისაწვდომი. სურვილის შემთხვევაში, შესაძლებელია პირადად შეხვედრა და სესიების ცოცხლად ჩატარება როგორც ჯგუფურ, ასევე ინდივიდუალურ დონეზე. მიუხედავად იმისა, რომ ოფიციალურად ჯერ არ დამიანონსებია, უკვე ძალიან ბევრ კლიენტს ველოდები.
-გარდა პროფესიული ცოდნისა, რა მოგცათ ქოუჩინგის სკოლამ?
-ქოუჩინგის სკოლაში მოსვლა მხოლოდ იმ ადამიანების გაცნობისთვისაც ღირდა, ვინც ეს მოდულები ჩემთან ერთად გაიარა. ჩვენ ერთ ტალღაზე ვართ. ყველა, ვინც სესიებს ატარებს, დარწმუნებული ვარ, ადამიანების ცხოვრებას დადებითისკენ ცვლის. წარმოიდგინეთ ამ სპეციალისტებისგან შემდგარი დიდი გუნდი და მათ მიერ ჩატარებული სესიები... აქ გათვლა ადამიანების ძალიან დიდ მასაზეა. შესაბამისად, დროთა განმავლობაში სულ სხვა ცნობიერების საზოგადოებას მივიღებთ.
-როგორ შეაფასებდით იმ ადამიანებთან ურთიერთობას, რომელთაც სესიებს უტარებთ? რას გაძლევთ ეს ყველაფერი თქვენ?
-ცხოვრების ყველა ეტაპზე ჩვენ მეგობრებს ვიძენთ: ბაღში, სკოლაში, უნივერსიტეტში, სამსახურში და ა.შ. ყველა მათგანი ჩვენზე გარკვეულ კვალს ტოვებს. სესიებიც ასეა. უკვალოდ არცერთ მათგანს არ ჩაუვლია. ეს გარკვეული ცოდნისა და ენერგეტიკის გაცვლის ორმხრივი პროცესია, რა დროსაც ორივე მხარე სწავლობს, ვითარდება და რაღაც ახალს აღმოაჩენს საკუთარ თავში. ეს ყველაფერი ცოცხალი პროცესი და უწყვეტი ჯაჭვია, რომელსაც ბოლომდე უნდა მიჰყვე.
NS
ქოუჩი როგორც პროფესია, ხშირად ისმის კრიტიკა, თუ რატომ არ ითარგმენა ეს სიტყვა ქართულად…
ეს ტერმინი დამკვიდრებულია ქოუჩინგის საერთაშორისო ფედერაციის მიერ. ხშირად ქოუჩს თარგმნიან როგორც მწვრთნელს, თუმცა ეს ასე არ არის. ვინაიდან პროფესიით ქოუჩი, განსხვავდება მწვრთნელისგან და მას აბსოლუტურად განსხვავებული ფუნქციები აქვს. მწვრთელი ორიენტირებული წვრთნაზე, ხოლო პროფესია ქოუჩი დაფუძნებულია არა წვრთნაზე, არამედ პარტნიორულ ურთიერობაზე. არსებობს მრავალნაირი მიმართულება ქოუჩინგში: ბიზნეს ქოუჩინგი, ლიდერობის, პიროვნული განვითარების, ემოციური ინტელექტის, ურთიერთობების, კარიერული და სხვ. თითოეული ადამიანი კი მის წინაშე მდგარი გამოწვევებიდან გამომდინარე შეარჩევს ქოუჩს. მაგალითად, თუ ადამიანს სურს თავისი ბიზნესი ახალი განვითარების დონეზე აიყვანოს, საჭიროა მიმართოს ბიზნეს ქოუჩს. თუ გამოწვევას წარმოადგენს მეუღლესთან ურთიერთობების ჰარმონიზება, აქ ურთიერთობების ქოუჩი იქნება საჭირო. თქვენ გაქვთ მიზანი, მიდიხართ ქოუჩთან და მისი კითხვების დახმარებით იგებთ რომელია სწორი გზა თქვენ მიზნამდე.
არ მიკვირს საზოგადოების რეაქციის, ვინაიდან, ეს არის შედარებით ახალი სფერო და ბუნებრივია კითხვები არსებობს. ქოუჩი არც ერთ ენაზე არ ითარგმენა, ისევე როგორც მაგალითად “ფსიქოლოგია”.
"ქოუჩი" რომ მწვრთნელს ნიშნავს ქართულად, ჯერ არ გაგიგიათ?!!!