თემურ ქეცბაიას წარმატებული დებიუტი კვიპროსის მთავარი მწვრთნელის პოსტზე და შანსი, რომელიც ჩვენს ნაკრებს კვიპროსის გამარჯვებით მიეცა
24 სექტემბერს თემურ ქეცბაიამ კვიპროსის ეროვნული საფხებურთო ნაკრების მთავარი მწვრთნელის რანგში სადებიუტო მატჩი გამართა - დებიუტი წარმატებული აღმოჩნდა. კვიპროსმა "ერთა ლიგის" С2 ჯგუფში საბერძნეთი, ანგარიშით 1-0 დაამარცხა. მატჩი ლარნაკაში გაიმართა.
შეხვედრის ერთადერთი გოლი მე-18 წუთზე "კანზას სიტის" 21 წლის ნახევარმცველმა, მარიოს ციონისმა გაიტანა.აღსანიშნავია, რომ ელადელებმა მიმდინარე ტურნირზე პირველად გაუშვეს გოლი.
- ქეცბაიას გუნდი С დივიზიონში ადგილის შენარჩუნებისთვის იბრძვის, 5 ქულით მესამე ადგილზეა და 27 სექტემბერს დასკვნით ტურში პრიშტინაში კოსოვოს დაუპირისპირდება.
ქართველებისთვის ქეცბაიას წარმატებული მატჩი ორმაგად სასიხარულო იყო. მისი ამ გამარჯვებით საქართველოს ნაკრებს შანსი მიეცა, რომ პლეი-ოფის შეხვედრა საკუთარ კედლებში ჩაატაროს, ამისთვის კი ერთადერთი რამ არის საჭირო - ჩვენმა გუნდმა გიბრალტარი დაამარცხოს.
გარდა იმისა, თუ სად გაიმართება მომდევნო ეტაპის თამაშები, ასევე გასარკვევია, რომელი გუნდი, რომელს დაუპირისპირდება. მოცემულობა კი ასეთია - თუ ყაზახეთი აზერბაიჯანს მოუგებს, მაშინ ყაზახეთს შევხვდებით, ხოლო თუ წააგებს - საბერძნეთს.
ცნობისთვის, გიბრალტარსა და საქართველოს შორის მატჩი 26 სექტემბერს, თბილისის დროით 22:45 საათზე დაიწყება.
- ნახეთ ასევე: კვარაცხელია "ნიცაში" გადასვლასთან ახლოს იყო - რატომ არ შედგა მისი ტრანსფერი ფრანგულ გუნდში