"კატასტროფულად გაზრდილია ორსულების მომართვიანობა" - როგორია კორონავირუსით ინფიცირებულ ბავშვთა და ორსულთა მდგომარეობა ციციშვილისა და ბოკერიას კლინიკებში?

ციციშვილის კლინიკის კლინიკური დირექტორის, მაია ჩხაიძის ინფორმაციით, კლინიკაში კორონავირუსით ინფიცირებული 165 ბავშვი მკურნალობს, საიდანაც 3 პაციენტის ჯანმრთელობის მდგომარეობა კრიტიკულად მძიმეა.

როგორც მაია ჩხაიძე "ინტერპრესნიუსთან“ საუბრისას განმარტავს, კრიტიკულად მძიმეა ორი მოზარდის და ერთი ჩვილის ჯანმრთელობის მდგომარეობა.

მისივე ინფორმაციით, ამ დროისთვის რეანიმაციულ განყოფილებაში 24 პაციენტია მოთავსებული.

ბოკერიას კლინიკაში აღნიშნავენ, რომ ბოლო პერიოდში კორონავირუსით ინფიცირებული ორსულების მიმართვიანობა გაზრდილია.

როგორც "ინტერპრესნიუსს“ კლინიკაში განუცხადეს, ამ ეტაპზე კორონავირუსით ინფიცირებული 29 ორსული მკურნალობს.

"ამ ეტაპზე, სამეანო განყოფილებაში 29 პაციენტია, 2 კი რეანიმაციაში. მომართვიანობა ძალიან არის გაზრდილი - კატასტროფულად. ამ 1 კვირაში ძალიან გაიზარდა“,- აღნიშნავენ ბოკერიას კლინიკაში.