ბიჭი ყველაზე კეთილი გულით, შეყვარებული, რომელიც ფანებმა დაუწუნეს და ნარკოტიკების სკანდალი - როგორ ცხოვრობს თურქული კინოინდუსტრიის კაშკაშა ვარსკვლავი, ჩაათაი ულუსოი

თურქული კინოინდუსტრია მსოფლიოს ბევრ საინტერესო პროდუქტს სთავაზობს და კინოკრიტიკოსების შეფასებით, ქვეყანაში უკვე ისე განვითარდა ეს სფერო, რომ თუკი ადრე თურქული სერიალების დიდი ნაწილი უხარისხოდ მიიჩნეოდა, ახლა ხარისხი ბევრად გაუმჯობესდა, მსოფლიო ბაზარზე კი თურქულ ფილმებსა, თუ სერიალებზე მოთხოვნა დღითიდღე მატულობს.

ჩაათაი ულუსოი კი იმ თურქ მსახიობთა რიცხვს მიეკუთვნება, რომელსაც მთელ მსოფლიოში იცნობენ და მილიონობით გულშემატკივარი ჰყავს. ის დაკავებულია არა მხოლოდ სატელევიზიო პროექტებით, არამედ თამაშობს ციფრული პლატფორმებისთის მომზადებულ სერიალებსა, თუ ფილმებში და არის პირველი თურქი მსახიობი, რომელმაც "ნეტფლიქსის“ სერიალში მიიღო მონაწილეობა.

ჩაათაი 1990 წლის 23 სექტემბერს, სტამბოლში დაიბადა. მისი მამა ბულგარეთიდანაა და თურქეთში მაშინ გადავიდა საცხოვრებლად, როდესაც 10 წლის იყო. მსახიობს ჰყავს უმცროსი ძმა ათალაი.

სკოლის დამთავრების შემდეგ, ჩაათაი სტამბოლის უნივერსიტეტში მებაღეობასა და გამწვანების ხელოვნებას სწავლობდა. ის ჰიპერაქტიური ბავშვი იყო და ამიტომაც, მშობლებმა სპორტზე შეიყვანეს. ულუსოი ოცნებობდა, რომ წარმატებული კალათბურთელი ყოფილიყო.

ცხრა წლის განმავლობაში სწორედ ამ სპორტით იყო დაკავებული, თუმცა საბოლოოს სხვა გზა აირჩია. გარდა კალათბურთისა, გატაცებული იყო ყვინთვითა და ცურვით.

2010 წელს მეგობარს მოდელების ქასთინგზე გაჰყვა, თუმცა მეგობრის ნაცვლად, ჩაათაი შეარჩიეს და აქედან დაიწყო მისი სამოდელო კარიერა. 19 წლის ასაკში მან თურქეთის საუკეთესო მოდელის ტიტული მოიპოვა და მალევე მიიღო პირველი როლი სერიალში Adini Feriha Koydum. სერიალი ესპანეთსა და ლათინური ამერიკის ქვეყნებში დღემდე პოპულარობით სარგებლობს.

• მალე მსახიობი ნარკოტიკების სკანდალში გაეხვა. 2013 წლის 25 იანვარს 30 თურქი მსახობი და მათ შორის, ჩაათაი ულუსოი, თურქეთის პოლიციის ნარკოტიკებთან ბრძოლის განყოფილებამ დააკავა. მართალია, მალევე გაათავისუფლეს, თუმცა ეს საქმე დღემდე არაა დახურული და გამოძიებას კონკრეტულ დეტალებზე მედიასთან არ უსაუბრია.

2015 წელს ჩაათაიმ თავისი კარიერის უმნიშვნელოვანესი როლი მიიღო - ის სერიალ Medcezir-ში მთავარი გმირის, იამან კუპერის როლზე დაამტკიცეს.

ეს იყო როლი, რომელმაც მსახიობს საერთაშორისო აღიარება და მილიონობით ფანი შესძინა. ჩაათაის პარტნიორობას თურული კინემატოგრაფიის მთავარი ვარსკვლავი, სერენაი სარქაია უწევდა. აღსანიშნავია, რომ აღნიშნული სერიალი პოპულარული ამერიკული შოუს, the O.C.-ის რიმეიქია.

სერიალის გადაღებების დროს ჩაათაისა და სერენაი სარიქაის შორის რომანი იყო. წყვილი რამდენიმე თვის განმავლობაში ერთად ცხოვრობდა, თუმცა მოგვიანებით, ერთმანეთს დაშორდნენ. მსახიობების ფანები დღემდე ვერ ეგუებიან მათ დაშორებას და მიუხედავად იმისა, რომ ამ ამბიდან უკვე ბევრი წელი გავიდა, მაინც აქვთ მათი შერიგების იმედი.

Medcezir-ს მოჰყვა კიდევ ერთი წარმატებული სერიალი İçerde, შემდეგ კი გადაიღეს "ნეტფლიქსის“ სერიალში The Protector, გარდა ამისა "ნეტფლიქსმა“ გადაიღო ფილმი სახელად Paper Lives, სადაც ჩაათაი მთავარ როლს ასრულებს. გადაიღეს Colin's-ის რეკლამაში, სადაც პარტნიორობას Victoria's Secret-ის მოდელი, ტეილორ ჰილი უწევდა.

ამჟამად ულუსოი სერიალ Yeşilçam-ში სემი ათეშის როლით გვევლინება. სერიალი მეოცე საუკუნის თურქულ კინოზე და მის მთავარ მსახიობ სემიზე გვიყვება. იგეგმება ასევე ორჰან ფამუქის "უმანკოების მუზეუმის" მიხედვით სერიალის გადაღება, სადაც მთავარი როლი ულუსოიმ უნდა შეასრულოს.

გარდა მსახიობობისა, ჩაათაიმ რეჟისორის ამპლუაშიც მოსინჯა ძალები. ახლახანს გამოვიდა მოკლემეტრაჟიანი ფილმი Birdie, რომლის რეჟისორიც მსახიობი თვითონვეა.

მართალია, მას სოციალურ ქსელში მილიონობით გამომწერი ჰყავს, მაგრამ რეალურად, ამ სივრცეს გაურბის, იშვიათად აქვეყნებს ფოტოებსა და ვიდეოებს. "ინსტაგრამზე" ძირითადად ისეთ ფოტოებს აქვეყნებს, რომელიც მის ახალ ნამუშევრებს ეხება.

რაც შეეხება მსახიობის პირად ცხოვრებას, უკვე წლებია ჩაათაი ურთიერთობაშია მსახიობ დუიგუ სარიშინთან, რომელსაც ის სერიალ icerde-ს გადასაღებ მოედანზე შეხვდა. არჩევანს ფანების ნაწილი უწუნებს და ამის გამო სოციალურ ქსელში ხშირად აკრიტიკებენ, თუმცა ყოველივე წყვილის ურთიერთობას ხელს ვერ უშლის და მათ მყარი, ჰარმონიული კავშირი აქვთ.

ულუსოი გაურბის ჟურნალისტებსა და პაპარაცებს, მათ წინ უიშვიათესად ჩნდება, თავისუფალ დროს ძირითადად ტყეში, სოფლის გარემოში ატარებს, გატაცებულია თევზაობით.

აღსანიშნავია, რომ მისი საუკეთესო მეგობარია კიდევ ერთი თურქი ვარსკვლავი, ქივანჩ თათლითუღი. ისინი შვებულებას ყოველ ზაფხულს ერთად ატარებენ. იახტით ზღვაში გადიან და შეიძლება რამდენიმე თვეც კი არ დაუბრუნდნენ ხმელეთს.

მსახიობი გამოირჩევა თავისი საქველმოქმედო საქმიანობით. ამის გამო მასზე ხშირად ამბობენ, რომ მსოფლიოში "ყველაზე კეთილი გული აქვს." აღსანიშნავია, რომ სწორედ ქველმოქმედების მიზნით, საქართველოსაც სტუმრობდა. ის თბილისში 2019 წლის 10 მაისს იმყოფებოდა. მაშინ ჩაათაიმ "ბერი ანდრიას სახელობის ფონდის’’ მხარდასაჭერად და სიმსივნით დაავადებული ბავშვების დასახმარებლად გამართულ საქველმოქმედო ვახშამში მიიღო მონაწილეობა. მსახიობმა თბილისში, ერთ-ერთ კლინიკაში პაციენტი ბავშვებიც მოინახულა